Алтайдын Чолмоны

Jайалталу јашӧскӱримге јӧмӧлтӧ

15.12.2017

Jаҥар айдыҥ 11-чи кӱнинде  П. В. Кучияктыҥ адыла адалган эл театрда јайалталу јашӧскӱримди јӧмӧӧр сыйлардыҥ лауреаттарына дипломдор табыштырары кӧдӱриҥилӱ айалгада ӧткӧн. Бу сыйлар 2017 јылда билимде, јайаандыкта ла јонјӱрӱмдик учурлу керектерде јаан једимдерге јеткен јашӧскӱримге берилген.

Алтай Республикада јайалталу јашӧскӱримди государствоныҥ јанынаҥ јӧмӧӧри 2008 јылдаҥ ала улалат. Оныҥ тӧс амадузы—Россияныҥ јашӧскӱриминиҥ јаҥырту-инновациялык  амаду-аргаларын јӱрӱмде бӱдӱрерине тӧзӧгӧ саларга јайалталу јашӧскӱримди јӧмӧӧри ле јилбиркедери.

Jайалталу јашӧскӱримге сыйлар берерине  талдаары  беш номинацияла ӧдӱп јат—јонјӱрӱмдик ле јондык иш, билим-технический јайаандык ла ӱредӱ-шиҥжӱлӱ иш, профессионал узы, кееркемел јайаандык ла спорт.

Быјылгы конкурска республиканыҥ бастыра  аймактарынаҥ ла Горно-Алтайсктаҥ текши тооло 150 угузу келген.

Алтай Республиканыҥ Башчызы, Алтай Республиканыҥ Башкарузыныҥ Председатели Александр Бердников бу кӧдӱриҥилӱ керекте туружып, мынайда айткан: «Jайалталу јашӧскӱримди јӧмӧӧри—кыйалтазы јогынаҥ Россия Федерацияныҥ, онойдо ок Алтай Республиканыҥ государственный политиказыныҥ тӧс ууламјыларыныҥ бирӱзи. Бистиҥ Президент Владимир Владимирович Путинниҥ канча катап темдектеп айтканыла, государствоныҥ кереги—јиит јайалталарды бедиреери, табып, јайалталарын ачары, олорды ӧрӧ ӧзӱминиҥ эҥ баштапкы, кезикте эҥ кӱч-чӱмдӱ ӧйинде јӧмӧӧри болуп јат. Нация јӱк сагышту, кӱчтӱ, спортчы јашӧскӱрим таскадып, ӧскӱрип, ӧскӧ ороондорло теҥдежип маргыжар аргалу болор».

—Россияныҥ келер ӧйи, Алтай Республиканыҥ келер ӧйи слердиҥ колоордо. Узак эмес ӧй ӧткӧн соҥында бистиҥ республика, бистиҥ ороон  кандый ууламјыларла ӧзӧрин слер чокымдарыгар—деп, республиканыҥ Башчызы јолду темдектеген.

Быјыл јайалталу јашӧскӱримди јӧмӧӧр лӧ јилбиркедер амадула берилип турган сыйлардыҥ лауреаттарыныҥ тоозы 52 кижи болгон. Бу сыйларды олор билимдеги, јайаандыктагы ла јонјӱрӱмдик учурлу керектери учун алгандар.

Алтай Республиканыҥ Башчызыныҥ, Алтай Республиканыҥ Башкарузыныҥ Председателиниҥ сыйын мындый јашӧскӱрим алган:

Сабина Ковалева—Горно-Алтайский государственный университеттиҥ психолого-педагогикалык факультединиҥ студенти,

Ярослав Черемных—Горно-Алтайский государственный университеттиҥ  экономико-юридический факультединиҥ студенти.

П. В. Кучияктыҥ адыла адалган ай сайын берилетен  акча-сыйды 12 ӱренеечи ле студент алган. Ол тоодо мындый студенттер:

Алена Бехине—Горно-Алтайский государственный университеттиҥ экономико-юридический факультединиҥ студенти,

Ильдар Емендеев—Горно-Алтайский государственный университеттиҥ  алтаистика ла тӱркология факультединиҥ студенти,

Серафима Сергеева—Горно-Алтайский государственный университеттиҥ  тӱӱки-филологиялык факультединиҥ студенти,

Нина Ляшко—Горно-Алтайский государственный университеттиҥ  тӱӱки-филологиялык факультединиҥ студенти,

Ксения Сылбакова—Горно-Алтайский государственный университеттиҥ   естественно-географиялык факультединиҥ студенти,

Эркеш Челчушев—Горно-Алтайский государственный университеттиҥ     алтаистика ла тӱркология факультединиҥ студенти.

П. А. Елбаевтиҥ адыла адалган ай сайын берилетен  акча-сыйды мындый јашӧскӱрим алган:

Арина Гуляева—Майма аймакта Кызыл-²зӧктӧги орто ӱредӱлӱ школдыҥ ӱренчиги,

Дмитрий Майоров—Горно-Алтайсктагы 12-чи таҥмалу орто ӱредӱлӱ школдыҥ ӱренчиги,

Дарья Маришина—Горно-Алтайсктагы 12-чи таҥмалу орто ӱредӱлӱ шоклдыҥ ӱренчиги,

Мария Пяткова—Оҥдойдогы орто ӱредӱлӱ школдыҥ ӱренчиги.

Онойдо ок Лазарь Кокышевтиҥ адыла адалган  акча-сыйды 8 ӱренчик, Павел Казанцевтиҥ адыла адалган сыйды 22 ӱренчик алган ла олорго дипломдор табыштырылган.

                                      Н. БЕЛЬЧЕКОВА