Алтайдын Чолмоны

Кӧстӧринде чокту улус, эмезе Слердиҥ турагарга элекроот!

22.12.2017

Jаҥар айдыҥ 22-чи кӱнинде Энергетиктердиҥ кӱни темдектелип турарда, бу бӧлӱкте иштеп турган јайалталу, иштеҥкей, предприятиениҥ оморкодузу болуп турган улуска сӧс. Газеттиҥ бӱги ажыра олордыҥ бастыразы керегинде бичиир, айдар арга јок. Jе андый да болзо, республиканыҥ албаты-јонын компания туткан станцияларда иштеп турган кӧп тоолу ол специалисттердиҥ кезигиле де болзо, таныштырадыс.

Ирина СУРТАЕВА, генеральный директордыҥ болушчызы:
—Бистиҥ республиканыҥ бастыра албаты-јонына от, јылу ла айыл-јуртта тыш-амыр болорын кӱӱнзейдим! Кожо иштеп тургандарга—иште турумкай болорын, профессионал ӧзӱм ле иште јаҥы солун объекттер. Нениҥ учун дезе ондор муҥ турага элекроот келери кӧбизинде бистеҥ камаанду ине. Су-кадык болугар!
Аржан ТОБОЕВ, строительство аайынча бӧлӱктиҥ јааны:
—Энергетиктердиҥ кӱни меге—мениле кожо иштеп турган улустыҥ байрамы. Кандый ла ай-кӱн турза, кандый ла ӧйдӧ бистиҥ граждандардыҥ тураларына ла россиялык предприятиелерге электроэнергия болорын јеткилдеп турган улустыҥ байрамы. Энергетиканыҥ бӧлӱгинде иштеп турган муҥдар тоолу ишчилердиҥ ижиниҥ шылтузында миллиондор тоолу тураларда электроот кӱйет ле јылу јеткилинче болот. Бу сӱрекей каруулу керек, је онызыла кӧп јылдардыҥ туркунына јаан учурлу ла сӱрекей керектӱ ишти бӱдӱрип турган улуска тоомјы колбулу. Байрамла, слерди, бистиҥ профессияныҥ ветерандары!
Антон ПЕТРОВ:
—Россияда генерирующий ийде-кӱчтердиҥ кеми кыйалта јогынаҥ кӧптӧӧрине алаҥзыбайдым. Кӱнниҥ чогынаҥ иштеп турган јаҥы станциялар бӱгӱн тӱрген тудулып, тузаланарына табыштырылат. Ээчиде объекттердиҥ ӱлекерлерин тургузары ла олорды јӱрӱмде бӱдӱрери ӱзӱктелбейт. Ийде-кӱчи јаан ветрогенераторный станциялар тӧзӧӧри там элбейт. Бистиҥ ороон атомный электростанциялар тударында телекейлик лидер болгоны, баштапкы термоядерный реактор тӧзӧӧринде туружып турганы кемге де јажыт эмес. Оныҥ да учун математикала, физикала, јаҥы технологияларла јилбиркеп турган јиит улуска айдарга турум: шак ла энергетика слердиҥ арга-јайалталарыгарды тузалангадый, иште карьера эткедий бӧлӱк болордоҥ до айабас.
Jаҥы билгирлер аларга ӱредӱлӱ заведениелерде ӱренип тургандарга чыдамкай, турумкай болорын кӱӱнзейдим! Бойыныҥ амадузына, врачтыҥ, ӱредӱчиниҥ, актердыҥ эмезе инженердиҥ профессиязына, турумкай барып јаткандар једим-јеҥӱлерге кыйалта јогынаҥ једер эмей! Энергетика бӧлӱктиҥ бастыра ишчилериниҥ билелерин база уткып турум! Ончогорго амыр-энчӱ ле эҥке-тоҥко јадын-јӱрӱм кӱӱнзейдим!
Бийнигер ЭРКЕНОВ, инженер:
—Албаты ээлемде учуры јабыс эмезе бийик бӧлӱктер јок, олор бастыразы обществоныҥ толо јӱрӱмин јеткилдееринде туружып јат. Энергетика экономиканыҥ инфраструктурный бӧлӱги болуп турарда, оныҥ ижинде кандый бир шылтактаҥ улам ӱзӱктелиш болзо, онызы арткан бӧлӱктердиҥ ижине јаан салтарларын јетирер, ол тоодо суујеткилдештиҥ системазына, котельный ла јылу берер сетьтерге. Электроэнергия берилбезе, кӧп тоолу системалар иштеп те болбос. Оныҥ да учун энергетика кӧп учуралдарда бойыныҥ учурыла баштапкы јерде турат.
Евгений УЧАЙКИН, инженер:
—Мениҥ бу бӧлӱкле колбулу тӱӱким јаш тужымда башталган: школдо ӱренип турала, јаҥы иштеп баштаган инженердиҥ ижиндий керектеҥ баштагам. Шак ла бу иш-керекле мениҥ салымым колбулу болор деп кӧргӧм. Компанияга (ол керегинде јетирӱ алатаны андый ла кӱч эмес болгон, «Солнечный энергия» керегинде ол ӧйлӧрдӧ айдыжып турган—кӧп лӧ јилбилӱ) Горно-Алтайсктагы государственный университеттиҥ физико-математический факультедин божодоло келгем. Бери келеримде ле јарт болгон: јаҥы јилбилӱ объекттер јанынаҥ мында јайаандык та ишке, кӱнӱҥ сайынгы ишти де бӱдӱрерине аргалар јеткилинче бар.
Мен бойымныҥ талдап алгам ижим јанынаҥ бир де катап алаҥзыбагам—профессияны талдап та турарымда, бистиҥ компанияга иштеп келеримде де. Байрамла, кӱндӱлӱ коллегалар!
Михаил КАТЫНОВ, баш электромонтажник:
—Бистиҥ компаниядагы иштиҥ тӧс ээжилери—ак-чек, иштеҥкей, ачык-јарык ла бой-бойлорын тооры. Кандый бир суракты аайлаштырар тушта бой-бойына болужары, ченемелдӱ улус јашӧскӱримди јӧмӧӧри бистиҥ ӧмӧликте јакшынак јаҥжыгу болуп калган. Мениҥ шӱӱлтемле, ижин јаҥыс ла кирелтелер аларына эмес, је анайда ок бойыныҥ аргаларын тузаланарына, бойыныҥ ишчилериниҥ материальный јанын јеткилдеерине ууландырган кажы ла предприятие ол ээжилерге тӧзӧлгӧлӧнӧт.
Улус јӱк ле бойыныҥ јилбӱлери керегинде сананбай, ӧмӧликте кӱӱнзеп иштеер, бойыныҥ тузазын јетирер, бой-бойына болужып иштеер айалга тӧзӧӧри предприятиениҥ башкартузынаҥ да, ишмекчилердиҥ бойынаҥ да камаанду, Бистиҥ компанияда иш ол ээжилер аайынча тӧзӧлгӧн, ӧскӧ дӧ предприятиелерде мындый ок болор керек деп сананадым.
Бу јолдыктарды кычырып јаткан бастыра улуска бой-бойын тоорын, турумкай ла чыдамкай болорын, чындыкка јӱткӱмел, ачык-јарык кӱӱн-санаа ла бой-бойын оҥдожорын кӱӱнзейдим. Бу ээжилердиҥ бастыразы бистиҥ кажыбыска ла сӱрекей керектӱ—јаҥыс ла иште эмезе службада эмес, је анайда ок најылар ортодо ло бистиҥ байлыгыс болуп турган билебисте.
Эҥ ле сӱӱнчилӱ байрамдардыҥ бирӱзин, ол јууктап келди, сакып тура, бастыра јерлештерди ле бистиҥ јаркынду тергеебистиҥ айылчыларын келип јаткан Jаҥы јылла, 2018 јылла, уткып турум! Слерге ле слердиҥ тӧрӧӧн-туугандарыгарга, јуук улузыгарга бек су-кадык, амыр-тыш кӱӱн-санаа, материальный јанынаҥ толо јадын-јӱрӱм!

х х х

Бастыра уткуулдарды ла јылула, отло, ырысла, су-кадыкла, амыр-энчӱле колбулу кӱӱнземелдерди «Солнечная энергия» компанияныҥ бастыра ишчилери ле анайда ок предприятиениҥ башкартузы јӧмӧйт.

П. Александрова