Алтайдын Чолмоны

Тӧрӧлчи кӱӱнге таскадарга

22.01.2018

Чаган айдыҥ 16-чы кӱнинде республикан черӱчил комиссариатта Алтай Республиканыҥ ветерандарыныҥ јондык организацияларыныҥ чыгартулу улузыла тегерик стол ӧткӧн.

Россия Федерацияныҥ Jуучыл ийделериниҥ (РККА и Ф) тӧзӧлгӧнинеҥ ала 100 јылдыгын темдектеерине учурлалган керек-јарактарга белетенер, јашӧскӱримди тӧрӧлчи кӱӱндӱ эттире таскадарына ууламјылалган Эземниҥ ле Мактыҥ кӱндерин ӧткӱрери аайынча иштерди јаҥыртар амадула ӧткӱрилген тегерик столдыҥ туружаачылары озо баштап Горно-Алтайск калада јууныҥ, иштиҥ, Jуучыл ийделердиҥ ле јаҥ корыыр органдардыҥ ветерандарыныҥ (пенсионерлердиҥ) јербойындагы јондык организациязыныҥ председателине јуукта талдалган Алексей Ивашкинди уткып, бу организацияла мынаҥ да ары ӧмӧ-јӧмӧ иштеерис дешкен.
Тегерик столдо РФ-тыҥ коруланарыныҥ министриниҥ 2014 јылдыҥ ӱлӱрген айыныҥ 4-чи кӱнинде кол салган «Россия Федерацияныҥ Jуучыл ийделериниҥ ветеранский организацияларыла мынаҥ ары ишти јаҥыртары аайынча аргалар керегинде» јакарузыныҥ некелтелериле, Россия Федерацияныҥ Jуучыл ийделериниҥ (РККА и Ф) 100 јылдыгын темдектеерине учурлалган керек-јарактарга белетенип ӧткӱрериниҥ планын кӧрӧриле, балдардыҥ «ЮНАРМИЯ» деп бастырароссиялык јуучыл-патриотикалык јондык кыймыгузыныҥ тергеелик бӧлӱгиниҥ ижинде Алтай Республиканыҥ јондык ветеранский организациялары туружарыла колбулу сурактар кӧрӱлген.
Алтай Республиканыҥ черӱчил комиссары Олег Денисенко РФ-тыҥ Jуучыл ийделериниҥ 100 јылдыгына учурлай кереес медальдар јазадарга акча-манатла болушсын деп, муниципалитеттерге самаралар аткарылганын айткан. Оныҥ темдектегениле, Горно-Алтайск каланыҥ администрациязы бу баштаҥкайды јӧмӧӧр болгон. Военком јашӧскӱримди тӧрӧлчи кӱӱндӱ эттире таскадар суракка ајару эткен. Оныҥ айтканыла, тергеедеги јондык ветеранский организациялардыҥ чыгартулу улузы черӱге барып јаткан уулдарга келип, олорго черӱ, бойлоры јуучыл молјузын канайда бӱдӱргени керегинде куучындаганы јилбилӱ болор. Ол мындый ишти ӧткӱрерге, айса болзо, ветерандардыҥ јондык организацияларыныҥ бирлигин тӧзӧп аларыс деген шӱӱлтезиле ӱлешкен. «Бешкӱндик сборлорго барып турган балдарга, черӱниҥ вузтарына ӱредӱге барарга јазанган јииттерге бу ишти ӧткӱргени база тузалу болор эди. Бис бойыс јашӧскӱримле иштебезеес, олорды таскатпазаас, ӧштӱлерис олорды таскадар. Ол ло Украинаныҥ ченемели мыны јакшы кӧргӱсти» — деп, О. Денисенко айткан.
Ветерандардыҥ организацияларыныҥ тегерик столго келген чыгартулу улузына «слердиҥ шылтугарда республикада јашӧскӱримди тӧрӧлчи кӱӱндӱ эттире таскадар иш кидим ӧдӱп јат. Мынаҥ да ары јуук колбуда, бирлик иштезеес, патриотикалык иште оноҥ до јаан једимдерге једерис» — деп, јуучыл комиссар темдектеген.
Алтай Республиканыҥ јууныҥ ла иштиҥ ветерандарыныҥ, Jуучыл ийделердиҥ ле јаҥ корыыр органдардыҥ республикан совединиҥ председатели Борис Алушкин Горно-Алтайсктыҥ администрациязы калада јаткан јууныҥ ветерандарына, Афганистанда, Чечняда болгон јуу-согуштарда турушкан ла эмди калада јадып тургандарга РФ-тыҥ Jуучыл ийделериниҥ 100 јылдыгыла колбой юбилейлик медальдар белетеер иште туружып турганы јакшы деген. Ол «муниципалитеттерде канча кире Ада-Тӧрӧл учун Улу јууныҥ, локальный јуу-согуштардыҥ туружаачылары бар болгонын чокымдап, бастыразына ла кереес медальдар белетеер керек. Бу иште бастыра муниципалитеттер эрчимдӱ туружар учурлу» —деген.
—Алтай Республикада ветерандардыҥ јондык организацияларын бириктирери јанынаҥ айдар болзо, бӱгӱн бу организациялардыҥ кажызы ла юридический лицо болуп јат. Олорды бириктиретени кӱч керек. Оныҥ учун кажызы ла таҥынаҥ болзын. Jе бу организациялардыҥ тӧс тӧргизинеҥ эмезе активинеҥ, јуучыл-патриотический таскаду ишти ӧткӱрерге болуп, координационный совет тӧзӧп аларга јараар. Анайып, бирлик амадуга ууламјылалган ишти бӱдӱрерге, биригерге јараар – деп, Борис Алушкин айткан.
Jуунныҥ туружаачылары координационный совет тӧзӧӧр керек болгоныла јӧпсинген деп айдар керек. Анайда иштегенде, эптӱ болор эди. Текши план болор, айса болзо, республикан Башкарудаҥ акча-манатла кандый бир јӧмӧлтӧ эдилер. Jуунныҥ туружаачылары кереес медальдар јазадарга акча-манатла болуш јетирзин деп айдылган самараны тергеениҥ башкараачызына база белетеер керек дешкен.
Балдардыҥ «ЮНАРМИЯ» деп бастырароссиялык јуучыл-патриотикалык јондык кыймыгузыныҥ тергеелик бӧлӱгиниҥ ижинде Алтай Республиканыҥ ветерандарыныҥ јондык организациялары туружарыла колбой мынайда айдылган:
—Бӱгӱн республикада балдарды черӱниҥ вузтарына ӱредӱге кийдирери аайынча иштерге јаан ајару эдилет. Анчада ла ӧскӱс ле ада-энезиниҥ ајарузы јок арткан балдарды. Черӱниҥ вузтарына ӱредӱге кирерге турган балдардыҥ кезиги физический белетенишле экзамендерди табыштырып болбойт. Андый айалгага база ајару эдилген ле спортчылар андый ӱредӱге кирерге турган балдарды белетеерге белен болгонын айткан. Тергеедеги ветерандардыҥ јондык организацияларыныҥ чыгартулу улузы черӱчил ӱредӱге кирерге јазанган балдарла база иштеген болзо, турулталар оноҥ до артык болор эди.

К. ЯШЕВ