Настройки отображения

Размер шрифта:
Цвета сайта:
Ностройка изображения
Ностройка изображения

Настройки

Алтайдын Чолмоны

Санитар ла эпидемиологиялык айалгалар — ајаруда

17.04.2018

Роспотребшиҥжӱниҥ Алтай Республикадагы башкартузы кандык айдыҥ 12-чи кӱнинде санитар ла эпидемиологиялык айалгаларды шиҥдеер иште тап-эриктерди тузаланар иш канайда ӧдӱп турган суракка учурлай ээчиде база бир јуунын ӧткӱрди. Анда су-кадыкты корыыр министерствоныҥ, республиканыҥ прокуратуразыныҥ, јондык палатаныҥ, кичӱ ле орто аргачылыктыҥ, садуныҥ организацияларыныҥ, гигиенаныҥ ла эпидемиологияныҥ тӧс јериниҥ, туризмниҥ бӧлӱгиниҥ чыгартулу улузы турушкан. Jуунды Роспотретбшиҥжӱниҥ республикан башкартузыныҥ јааны, республиканыҥ государственный баш санитар врачы Леонид Щучинов баштап ӧткӱрген.
Jуунныҥ туружаачлары 2018 јылдыҥ баштапкы кварталында бӱдӱрген иштердиҥ турулталарын кӧргӧн.

Республиканыҥ баш государственный врачы «Ижистиҥ тӧс учуры ол ло бойы артып јат — деп темдектеген. — Бистиҥ служба бу јылдыҥ баштапкы кварталында, алдында ла јылдарда чылап ок, республикада санитар ла эпидемиологиялык айалгаларды јеткилдеериниҥ, эл-јонныҥ су-кадыгын кичееп тыҥыдарыныҥ кемин јабызатпай иштегендер. Бу ӧйдиҥ туркунына бӱдӱрген иштердиҥ кӧргӱзӱлерин коомой эмес деп айдарга јараар. Jе биске јеткен једимдериске болорзынып отурарга арай ла эрте. Jастыҥ келгениле колбой салјалар «тирилип», улуска ла мал-ашка јаан каршузын јетирет. Быјыл туристтер Туулу Алтайга былтыргызынаҥ кӧп келери билдирип јат. Айдарда, бистиҥ службаныҥ ишчилерине јаантайын беленде болор керек.

Л. Щучиновтыҥ айтканыла, Роспотребшиҥжӱниҥ Алтай Республикадагы башкартузы тергеениҥ јаҥ корулаар органдарыла, јондык организацияларла, кичӱ ле орто аргачылыктыҥ бӧлӱктериле јуук колбуда иштеп јат. Шиҥжӱ ӧткӱрер иштердиҥ кеми эмди, алдындагызына кӧрӧ, чик јок астадылган. Оныҥ ордына јартамалду иштер элбеде ӧткӱрилет. Бистиҥ тергееде потребительдердиҥ тап-эриктерин ле кижиниҥ чыдуларын корыырын шиҥдеп, олорды јӱрӱмде толо бӱдӱрерин јеткилдеп турган јербойыныҥ органдары ижин федерал службаныҥ ээжилерине, федерал јасактарга тӧзӧлгӧлӧнип ӧткӱрип јат деп айдар керек.

Бу јуун-кычырыштарда Роспотребшиҥжӱниҥ башкартузыныҥ тӧзӧмӧл лӧ юридический иш аайынча бӧлӱгиниҥ јааныныҥ ордынчызы Татьяна Лямкина республиканыҥ баш санитар врачыныҥ айтканын јӧмӧп, бӱткен иштерди чокым тоолор ажыра кӧргӱсти. Анайып, бу службаныҥ ишчилери быјылгы јылдыҥ баштапкы кварталында бастыра 176 шиҥжӱ ӧткӱргендер. Бу тоо, 2017 јылга кӧрӧ, 11 процентке ас. ²рӧ айдылган ӧйдиҥ туркунына план аайынча организациялар сайын 56 рейд болгон. Тургузылган планга ӱзеери база 120 шиҥжӱ ӧткӱрилген.

Шиҥжӱ-рейдтердиҥ ӧйинде јасакты бускан 935 учурал јарталган. Эҥ ле кӧп једикпестер аш-курсакла садышкан јерлерде, ашканаларда, ӱредӱлӱ заведениелерде ле су-кадыкты корыырыныҥ организацияларында темдектелген. Шиҥжӱлӱ иштердиҥ турулталарыла 214 протокол тургузылган. 53 протокол дезе јаргыныҥ органдарына аткарылган. Анайда ок 193 административный керек кӧрӱлген. 923 муҥ салковой административный штраф салынган. Jасакты бускандарга анайда ок башка-башка јаргылардыҥ чыгарган јӧптӧрин бӱдӱрерге база келишкен. Анайып, јаргыныҥ јӧптӧри аайынча 28 штраф салынган ла јасакты бускан улус 247 муҥ салковой штраф тӧлӧгӧндӧр.

Эпидемиологиялык айалгаларды ла тап-эриктерди бускан учуралдарда казнага кайра 1153,6 муҥ салковой акча (98,6%) јандырылган. Jаргыныҥ органдары 8 объекттиҥ ижин токтоткондор. Jуунда республиканыҥ баш санитар врачы Л. Щучинов кичӱ ле орто аргачылыктыҥ ишчилерин шиҥжӱ ӧткӱрер иштердиҥ 2017 јылда чыккан јаҥы бӱдӱмдериле таныштырган. Jуунда анайда ок Россия Федерацияныҥ Государственный Думазы 2018 јылдыҥ кандык айыныҥ 3-чи кӱнинде ӱчинчи адакы кычырышла Роспотребшиҥжӱниҥ ишчилерине садуныҥ јерлеринде шиҥжӱлӱ закупкалар ӧткӱрери јанынаҥ јӧп јаратканы керегинде јетирӱ эдилген.

П. Кабар

ТОП

Россия Федерациязыныҥ президентиниҥ JАРЛЫГЫ

Россия Федерацияныҥ государственный кайралдарыла кайралдаары керегинде

Jурт ээлем: тоолор ло керектер

2017 јылда государствоныҥ акча-манат јанынаҥ јӧмӧлтӧзин бистиҥ тергееде 3720 ээлем алган: ол тоодо 841 КФХ, јурт ээлемниҥ 57 организациязы, јурт ээлемниҥ 38 потребкооперативи, 2784 ЛПХ.

2017 јыл: культураныҥ ундылбас элестери

Баштапкы катап ороонныҥ тӧс калазы Москвада Алтай Республиканыҥ кайчыларыныҥ учурыла, кемиле јаан ойын-концерти ӧткӧн. Ол республиканыҥ культуразыныҥ тӱӱкилик учурлу кереги деп јолду чотолот.