«Иш јок отурбайдыс»

27.04.2018

Олег Суворов Оҥдой аймакта «СтройКомАлтай» ООО-до экскаватордыҥ машинизи болуп иштейт. Кӱӱк айдыҥ 1-кы кӱнинде оныҥ фотојуругы, иштиҥ ӧскӧ озочылдарыла кожо, республикан Кӱндӱниҥ доскозында тургузылар.

Ижине кичееҥкей машинисттиҥ иштеги ле јадын-јӱрӱминдеги биографиязы Оҥдой аймактыҥ јолдор јазаачыларыныҥ организациязыныҥ ижиле јуук колбулу. Олег Юрьевич јаҥыс ла јолдор јазаачылардыҥ 222-чи таҥмалу акционер обществозында јирме беш јылдыҥ туркунына ӱзӱги јогынаҥ иштеген. Тӧрт јыл мынаҥ кайра ол «СтройКомАлтай» ООО-го машинисттиҥ ижине кӧчкӧн. Эмди ол бу нак ӧмӧликтиҥ турчызы.

Организацияныҥ башкараачыларыныҥ айтканыла, Олег Юрьевич ижин јакшы бӱдӱрип јат. Бойын кажы ла керекте јакшынак специалист деп кӧргӱзет. Оныҥ экскаваторы кандый ла айалгада иштеер аргалу. Ол экскаваторын јаантайын јакшы ла чынык јазалда тудат. Бу кижиде иштиҥ планын бӱдӱрбеген учурал болбогон. 2014 јылда агын суулар ажынып кӧпчиирде, Олег Юрьевич оныҥ салтарын јоголтор иштерде бригадазыныҥ ишчилериле кожо эрчимдӱ иштеген.
Бӱдӱрип јаткан керегине каруулу машинист ак-чек ле јозокту ижи учун «Оҥдой аймак» муниципал тӧзӧлмӧниҥ, јолдордыҥ «Алтай» деген федерал кеминде башкартузыныҥ, Алтай Республиканыҥ Эл Курултайыныҥ Кӱндӱлӱ грамоталарыла кайралдаткан. Иштиҥ озочылыныҥ јарлалып јаткан фотојуругы бу ла кӱндерде Оҥдой аймактыҥ јолдорыныҥ бирӱзинде согулган. Тургуза ӧйдӧ ол Хабаровка јурттыҥ Алтыгы-Карасуу деген јеринде аҥдар турган турлуга јол тудуп јат. Мергендӱ иштӱ машинист бӱдӱретен иштер кӧп, ӧй чек јок деп кемзинип, јӱк ле фотојурукка тӱжерге јӧпсинген. Олег Юрьевич јылдыҥ бу ӧйинде аймакта ӱрелген јолдор кӧп болуп јат, мындый айалгаларда кезикте тӱни-тӱжи де иштеерге келижет, бис качан да иш јок отурбай јадырыс деп айткан. Ол башка-башка јылдарда Улаган ла Шабалин аймактардыҥ јолдорын тударында ла чыныктап јазаарында база эрчимдӱ турушкан.

«СтройКомАлтай» ООО-ныҥ баш инженери Григорий Мокляктыҥ айтканыла, олордыҥ организациязында одустаҥ ажыра кижи иштеп јат. Олег Юрьевич дезе олордыҥ ортозында эҥ капшуун ла улусла тилди чӱрче ле табыжып билер кылык-јаҥду кижи. Бойы Бийскте механизацияныҥ орто ӱредӱлӱ аҥылу техникумын ӱренип божоткон. Ол билезинде анайда ок кару ла јалакай ада. Кызы школды божодып салган. Тургуза ӧйдӧ Горно-Алтайскта ӱредӱлӱ заведениелердиҥ бирӱзинде једимдӱ ӱренип јат.

Оҥдой аймактыҥ озочыл иштӱ машинизи 1 Майдыҥ байрамында јол јазаачыныҥ тоозынду комбинезонын илӱде турган јап-јаҥы чамчазына ла јуунак кебине удурумга солып, иштеги ӧмӧликтердиҥ бойындый ла ок озочылдарыла кожо Алтай Республиканыҥ тӧс калазыныҥ тепсеҥинде ӧдӧтӧн кӧдӱриҥиде туружар. Ол кӱн мында бийик ле омок-седеҥ айалгада республиканыҥ Кӱндӱниҥ јаҥыртылган доскозы ачылып, ого Оҥдой аймактыҥ озочыл иштӱ јол јазаачызыныҥ ӧҥдӱ фотојуругы база тургузылар. Айдарда, кемзинчеҥ кылык-јаҥду бу ишчини ырысту кижи деп айдарга јараар. Jол тудаачыныҥ туткан ла чыныктаган јолдорыла ӧскӧ улус јӱрзе, оныла тӱни-тӱжиле кош тарткан кӧлӱктер маҥтаза, ол эл-јонго тузалу болзо, јолдор тударыныҥ узына оноҥ бийик ле артык је база кандый быйан-алкыш керек. Олег Юрьевич Суворов дезе шак ла андый улустыҥ бирӱзи болуп јат.

П. КАБАР

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина