Алтайдын Чолмоны

Ӱренчиктердиҥ јаскы байрамы

04.05.2018

Алтай Республиканыҥ ӱредӱлик аайынча министерствозы ла балдардыҥ ӱзеери ӱредӱзиниҥ республикан тӧс јери кандык айдыҥ 23-26 кӱндеринде балдардыҥ јайаандыгыныҥ «Школдыҥ јазы» деген талалык байрамын ӧткӱрди.

Фестиваль-байрамныҥ амадузы балдардыҥ ла јииттердиҥ јайаандыгына ичкери ӧзӧрине јарамыкту айалганы тӧзӧӧри. Онойдо ок башка-башка укту-тӧстӱ балдарды бой-бойлорыныҥ культуразын, јаҥжыгуларын тооп баалаарына таскадары. Jаан ла кичӱ Тӧрӧлиниҥ тӱӱкизин чӱмдемел таскамалдыҥ башка-башка бӱдӱмдери аайынча чебер ле ајарыҥкай болуп ӧзӧрине таскадары. Ончо бу текши јайаан иш ӱренчиктердиҥ ич-культуразыныҥ кемин кӧдӱрерине кӧнӱ ууламјылу болгонын ӧткӧн фестиваль јарт кереледи.

Быјылгы «Школдыҥ јазы» деген байрамныҥ туружаачылары, јайаандык ӧмӧликтери «Алтын арабеск» ле «Мӧҥӱн микрофон» деген ууламјыларда турушты. Туружаачылар Кош-Агаш, Чамал, Оҥдой, Турачак, Майма, Кан-Оозы, Кӧксуу-Оозы, Чой аймактардаҥ ла онойдо ок республикан классический лицейдеҥ, В. К. Плакастыҥ адыла адалган гимназиядаҥ, Г. К. Жуковтыҥ адыла адалган школ-интернаттаҥ. Бу фестивальда 250-неҥ ажыра ӱренчиктер турушкан.
Ӱренчиктердиҥ јазына учурлалган байрамныҥ туружаачылары јаштары аайынча ӱч бӧлӱкле маргышты. Баштапкы, орто ло јаан бӧлӱктерде ӧмӧликтер, јайалталар бойыныҥ иштериле кӧрӧӧчилерди јилбиркетти. Темдектезе, «Алтын арабеск» деген ууламјыда хореографиялык ӧмӧликтер башка-башка калыктардыҥ культуразын, бијелерин кӧргӱстилер. Мында олорло кожо иштеп јаткан ӱредӱчилердиҥ, башкараачылардыҥ ижин темдектеер керек. Онойдо ок балдардыҥ костюмдары сӱреен јаркынду ла ӧҥжик. Мында ада-энелердиҥ болужы, ижи иле болды. Ӱредӱчилер ле ада-энелер балдарды оогоштоҥ ала кеендик телекейине јолын ачып, јӧмӧп јатканы јаан керек.

Таланыҥ балдары бијеге јайалталу болгонын бу фестиваль база катап кереледи. Эки-ӱч кӱнниҥ туркунына сценада балдардыҥ бијезин кӧрӱп, бисте байлык ченемелдӱ ӱредӱчилер кӧп, олор бойыныҥ ижиниҥ устары деп айдарга јараар. «Алтын арабеск» кажы ла јыл јаҥы јайалталардыҥ ады-јолын адап турганы јакшынак јаҥжыгу.

«Алтын арабеск» ууламјыда
Jаштарыла алза, оогош бӧлӱкте јеҥӱчилдер: хореографиялык ӧмӧликтер ортодо 1-кы јерге «Ретро» чыккан (каладаҥ, 3-чи гимназия, башкараачызы С. Елисеенко); 2-чи јерде — «Незабудка» (Майма, балдардыҥ санат школы, С. Зяблицкая); 3-чи јерде — «Jылдыс» (Кичӱ Jаламан, баштамы школ, Е. Бабаева).
Орто бӧлӱктеги јеҥӱчилдер: 1-кы јерге «Фиеста» чыккан (кала, 9-чы гимназия, Н. Маралова); 2-чи јерде — «Планета детства» (Майма, балдардыҥ санат школы); 3-чи јерде — «Импульс» (РКЛ, Севинч Чугулчина).
Jаан бӧлӱкте јеҥӱчилдер: 1-кы јерде — «Стиляги» (кала, 8-чи школ, Г. Алексеенко); 2-чи јерде — «Лайм» (кала, 12-чи школ, О. Левченко).

«Мӧҥӱн микрофон» деген ууламјыда он вокал ӧмӧлик ле јирме јети кожоҥчы-солист маргышты. Мында кӧрӱ-маргаандар балдардыҥ јаштары аайынча ӱч бӧлӱкле ӧткӧн. Бу да ууламјыда олор бойыныҥ билерин кожоҥы ажыра кӧргӱстилер.

«Мӧҥӱн микрофон» ууламјыда
Оогош бӧлӱкте: 1-кы јерге «Дважды два» деген ӧмӧлик чыкты (балдардыҥ ӱзеери ӱредӱзиниҥ республикан тӧс јери, С. Огиенко).

Орто бӧлӱкте: 3-чи јерде — «Созвучие» (Турачак, Л. Михайлова).
Jаан бӧлӱкте: 1-кы јерге «Ассорти» ӧмӧлик чыккан (кала, 8-чи школ, О. Маркина).
Кожоҥчы балдар ортодо кӧргӱзӱлер мындый болды:
Оогош бӧлӱкте: 1-кы јерде — Кэтэлина Паю (балдардыҥ ӱзеери ӱредӱзиниҥ республикан тӧс јери, С. Огиенко); 2-чи јерде — Олеся Четвернина (кала, 4-чи таҥмалу кадет школ, В. Аберле); 2-чи јерде — Александра Бодрова (Турачак, Л. Михайлова).

Орто бӧлӱкте: 1-кы јерге Ильмира Максутова чыккан (Майма, 1-кы школ, А. Кречетов); 2-чи јерде — Степан Горшенин (Турачак, Л. Михайлова); 3-чи јерде — Анита Сыромолот (кала, 1-кы школ, И. Голощапова).
Jаан бӧлӱкте: 1-кы јерге Галина Шамеха чыккан (кала, 8-чи школ, О. Маркина).
2-чи јерде — Алена Анучина (Кан-Оозы, И. Шагаева); 3-чи јерде — Екатерина Куропятникова (Майма, балдардыҥ санат школы, Н. Гейман).

«Школдыҥ јазы» деген талалык байрамныҥ Гран-при сыйы Кан-Оозындагы балдардыҥ јайаандыгыныҥ тӧс јеринеҥ Байару Темеевага табыштырылды. Байаруныҥ башкараачызы Татьяна Теркишева.
Байрамныҥ окылу жюризи эҥ јаркынду туружаачыларды — Арина Черникованы (6-чы лицей, С. Манышева), Владимир Казанцевти (Дмитриевкадаҥ, В. Денисенко) ӱзеери аҥылап темдектеди.

Кӧрӧӧчилер онойдо ок Чамалдаҥ Сергей Конушевтиҥ кожоҥын темдектеген. Топшуурын согуп, ортозында кайлап, јараш кожоҥдоды. Ол тӧрт-беш класстарда Кан-Оозында Эмиль Теркишевте ӱренген болуптыр. Кийген кеп-кийими де алтай алып баатырдыҥ кеби. Jаан ус кӧктӧгӧни билдирип јат. База Оҥдойдоҥ ӱч уул јакшы кожоҥдоды.

К. ПИЯНТИНОВА