Настройки отображения

Размер шрифта:
Цвета сайта:
Ностройка изображения
Ностройка изображения

Настройки

Алтайдын Чолмоны

Тӧрӧлистиҥ ийдезин тыҥыдарга

11.05.2018

—В. В. Путинниҥ Россияныҥ Президентиниҥ јамызына кирерине учурлалган кӧдӱриҥи Улу Jеҥӱниҥ байрамыныҥ чике ле алдында ӧтти.

Ол бу керектиҥ учурын там кӧдӱрди. Инаугурация Кремльдиҥ Jаан ӧргӧӧзинде ӧткӧни база тегиндӱ эмес. Оныҥ Георгиевский, Александровский, Андреевский залдарыныҥ стенелеринде бистиҥ государствоныҥ тӱӱкизи бичилген. Мында ороонныҥ ӧзӱми учун тартышкан, ол учун јӱрӱмин берген јарлу улустыҥ ады-јолдоры база бичилген. Бу кӱнде телкем орооныстыҥ тӱӱкизиниҥ тыныжы бастыра улусты олјологон деп айтсам, байла, јастыра болбос. Мындый айалгаларда кижиниҥ кӱӱни кӧдӱрилет. 300 јыл мынаҥ кайра алтай калык бойыныҥ тынын корулап аларга, Россияныҥ государствозына бойыныҥ кӱӱниле киргени база тегиндӱ эмес.

Президенттиҥ инаугурациязын јаан тепсеҥде, элбек стадиондо ӧткӱрер аргалар болгон. Jе ол тӱӱкилик учурлу залда ӧтти. Кӧдӱриҥиниҥ учуры сӱрекей јаан болды деп, база катап айдарга турум. Инаугурацияда менеҥ ӧскӧ талдаштарда В. Путинниҥ бӱдӱмјилӱ кижизи болуп иштеген Горно-Алтайсктагы госуниверситеттиҥ ректоры Валерий Бабин, «Эл Алтай» ГТРК-ныҥ председатели, республиканыҥ Jондык палатазыныҥ јааны Татьяна Кончева ла В. В. Путинди Президенттиҥ кандидадына јондык кыймыгудаҥ кӧстӧгӧн тӧзӧмӧл советтиҥ јааны Светлана Кудрявцева база турушты.

Инаугурацияда јиит улус кӧп болгонын ајарулу кӧрдим. Олордыҥ тоозында Jуучыл-ийде кӱчтердиҥ орто јашту генералдары база ас эмес болды. Башка-башка иштӱ, башка-башка укту улус талдаштарда эҥ кӧп ӱн алган кандидаттыҥ Россияныҥ Президентиниҥ јамызына турганына учурлалган кӧдӱриҥиде бийик кӱӱн-санаалу турушкан. Олор Георгиевский залдыҥ кызыл јолыла келип јаткан В. В. Путинди изӱ колчабыжула уткыгандар.

Кӧдӱриҥи Улу Jеҥӱниҥ байрамыныҥ сыраҥай ла алдында ӧткӧни керегинде ӧрӧлӧй айткан эдим. Тӧрӧлин корулаарында Туулу Алтайдаҥ муҥдар тоолу јуучылдар турушкан. Эҥ јалтанбас 25 јуучылга дезе Советский Союзтыҥ Геройыныҥ ады адалган. Эмди бис 73 јылдыҥ туркунына амыр-энчӱ айалгада јуртайдыс. Jуу-чак биске керек јок. Jе ороонныҥ коруланар ийдезин ле аргазын тыҥыдары биске сӱрекей учурлу. В. В. Путин кӧдӱриҥиде ол керегинде база айткан. Президент Тӧрӧлистиҥ экономиказын, јонјӱрӱмдик ӧзӱмин ичкерледеринде кажы ла кижиниҥ учуры јаан деп темдектеген. Jерлештерим Президенттиҥ баштанузын бир кижидий јӧмӧӧр деп иженип турум.

Россияныҥ Jондык палатазыныҥ турчызы,
Президентке талдаштар ӧдӧр ӧйдӧ В. Путинниҥ бӱдӱмјилӱ кижизи

Б. Алушкин.

ТОП

Россия Федерациязыныҥ президентиниҥ JАРЛЫГЫ

Россия Федерацияныҥ государственный кайралдарыла кайралдаары керегинде

Jурт ээлем: тоолор ло керектер

2017 јылда государствоныҥ акча-манат јанынаҥ јӧмӧлтӧзин бистиҥ тергееде 3720 ээлем алган: ол тоодо 841 КФХ, јурт ээлемниҥ 57 организациязы, јурт ээлемниҥ 38 потребкооперативи, 2784 ЛПХ.

2017 јыл: культураныҥ ундылбас элестери

Баштапкы катап ороонныҥ тӧс калазы Москвада Алтай Республиканыҥ кайчыларыныҥ учурыла, кемиле јаан ойын-концерти ӧткӧн. Ол республиканыҥ культуразыныҥ тӱӱкилик учурлу кереги деп јолду чотолот.