Будына бек туруп алган ӧмӧлик

05.09.2017

Тергеебисте «Солнечная Энергия+» деп каруузы кирелӱ ӧмӧлик иштеп баштаганынаҥ ала кӧп тоолу ӱлекер-проекттер јӱрӱмде бӱткен. Бу ӧмӧлик эмди будына бек туруп калган јаан компания болуп јат. Ол јаҥыс ла Алтай Республика ичинде эмес, је анайда ок ӧскӧ дӧ тергеелерде объекттер тудат.

Тергеебисте тудулган јаан объекттердеҥ Кош-Агаш, Кан-Оозы аймактарда кӱнниҥ чогыныҥ ийдезиле иштеер электростанцияларды айдарга јараар. Тургуза ӧйдӧ Майма аймакта эки ле Оҥдойдо бир јаан электростанциялар тудулат.
«Солнечная Энергия+» ООО-ныҥ специалисттери ижин јаҥы баштап турарда, турлуларда, турбазаларда, ыраак јурттарда кӱнниҥ чогынаҥ, сууныҥ ла салкынныҥ ийдезинеҥ электроот берип турган јазалдар (панельдер) тургускан эди.
«Солнечная Энергия+» ООО-ныҥ технический директоры Эжер Яжанкинниҥ айтканыла болзо, бу ӧмӧлик тӧзӧлгӧнинеҥ ала ийде-кӱчи ас, аргазы электролампочканы, спутниковый антеннаны иштедерине, мобильный телефонныҥ зарядказын толтырарына једер 400-теҥ кӧп станция туткан. Jаан станциялардыҥ тоозы онды ажа берди. Алтай Республиканыҥ тыштында тудулган объекттер база бар. Ол тоодо Башкир Республикада ла Оренбургский областьта.
Бутка туруп калган бу јаан компанияда јербойыныҥ улузы иштейт. Jе технический специальностьторлу специалисттер, ол тоодо инженерлер, энергетиктер једишпей турган деп айдарга јараар. ²мӧлик јаан ла иштеп турган улустыҥ тоозы кезикте 500-ке једе берет. Байа тергеебисте тудулган станциялардыҥ ижин база јербойыныҥ улузы јеткилдейт. Олорды јӧптӧжӱлер аайынча белетеп јат.
«Солнечная Энергия+» ООО-ныҥ бӱдӱреечи директоры Аржан Трифанов ӧмӧликтиҥ текши сурактары аайынча иштейт. Улусты ишке алатаны, кемди кандый ууламјы аайынча иштедетени, олорго инструктаж ӧткӱретени, ӧмӧликтиҥ тӧзӧмӧл сурактары, кандый фирмаларла јӧптӧжӱ тургузатаны, ол јӧптӧжӱни канайда тургузатаны, кандый материалдар алатаны, бухгалтерский отчетторды канайда тургузатаны ла оноҥ до ӧскӧ иштер Аржанныҥ молјузына кирет. Компанияныҥ генеральный директоры јок болзо, оныҥ ордына документ-чаазындарга кол салат.
Аржан Трифанов мынаҥ озо он јыл Сбербанкта иштеген. Оныҥ айтканыла, банковский бӧлӱк бир неме, бизнес дезе чек башка. Тузаланып турган эп-сӱмелери, аргалары аҥыланат. Оныҥ да учун баштапкы ӧйдӧ иштеерге эмеш кӱч болгон. Эмди дезе оҥдоп, ӱрениже берген.
Новосибирсктиҥ НГТУ-ны ӱренип божоткон эки уул бери келип, бу ӧмӧликте канча јылдардыҥ туркунына једимдӱ иштеп јат. Олордыҥ бирӱзи «Солнечная Энергия+» ООО-ныҥ коммерческий директоры Александр Балуев. Ол баштап тарый инженер болуп иштеген. 2012 јылдаҥ ала бу ӧмӧликте иштеп турган улустыҥ тоозы кӧптӧй берерде, коммерческий директордыҥ ижин бӱдӱрип баштаган. Александрдыҥ айтканыла, баштап ла Jайлудагы объект табыштырылган. Анда ийде-кӱчи 100 кВт гибридный электростанция тудулган. Ол ло объекттеҥ ала ӧмӧликтиҥ ижи кӧндӱгип барган. Тургуза ӧйдӧ республика ичинде кӱнниҥ чогынаҥ иштеер, текши ийде-кӱчи 25 мВт, станциялар тудулат. Маймада тудулып јаткан электростанциялардыҥ кажызыныҥ ла ийде-кӱчи 10 мВт болор. Оҥдойдогы объект 5 мВт. Олор табыштырылган кийнинде, станциялардыҥ ижин јеткилдееринде кайда да јирмеге јуук кижи иштеер. Анайып, база ла јербойыныҥ улузына иштеер јерлер тӧзӧлӧр, јербойыныҥ бюджедине каландар келер.
Александр Балуев Новосибирскте НГТУ-да энергетиканыҥ факультединде электроэнергияны иштеп аларын орныктырары аайынча ӱредӱ алган. Оныҥ айтканыла, «Солнечная Энергия+» ООО-ныҥ директоры, оныҥ ордынчылары бастыра ла ижи аайынча ууламјылу ӱредӱлер алган улус. Мында иштеп турган электромонтажниктер узын бийиктедер ӱредӱ ле иштеерине јараду алгылайт. Кандый ла јаан компанияда чылап, «Солнечная Энергия+» ООО-до бойыныҥ бухгалтерлери, юристтери бар. Мында иштеп тургандардыҥ кӧп лӧ сабазы бийик ӱредӱлӱ улус.
Оҥдойдо тудулып јаткан электростанцияда Олег Ялатов иштейт. Ол бойы инженер-геодезист. Бу компанияда 2016 јылдаҥ ала, Кош-Агашта экинчи электростанцияны тударында иштеп баштаган. Кийнинеҥ Кан-Оозында, Башкирияда, Оренбургский областьта объекттерди тударында турушкан. Бойы Барнаулда јол тудары аайынча ӱредӱ алган. Мынаҥ озо «Алтай Резортто» эки јыл, кийнинеҥ БТИ-де база эки јыл иштеген.
Бутка бек туруп калган бу јаан компанияда иштеп турган специалисттердиҥ бастыразына јуугы јиит улус. Олордыҥ кемизи де ижи аайынча технический чотомолдор эдет, кӱнниҥ чогынаҥ иштеер электростанцияны кандый јерде тургузарын шиҥдеп кӧрӧт. Кемизи де клиенттерле колбулу сурактар аайынча иштейт. СЭС-терди јазаары, салкынныҥ ла кӱнниҥ чогынаҥ иштеер станцияларды тургузары аайынча иштеп тургандар бар. Компанияныҥ офизине кирип барзаҥ, тегин отурган кижи кӧрбӧзиҥ. Бастыразы ла эрчимдӱ иште.
Бӱгӱн республика ичинде ӧдӱп турган кӧп тоолу окылу керек-јарактар «Солнечная Энергия+» ООО-ныҥ спонсорлык јӧмӧлтӧ-болужыла болот. Компания таҥынаҥ да улуска болуш јетирип турганын темдектебеске болбос.
Jиит те болзо, ӧмӧлик келер ӧйгӧ јаан амадулар тургузат. ²йлӧ теҥ алтап, кӱннеҥ кӱнге билгирлерин бийиктедип јаткан бу ӧмӧлик тургускан амадуларына кыйалтазы јоктоҥ јединер деп бӱдедим.

К. Яшев

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина