Алтайдын Чолмоны

«Атлантты» тудар иштер кӧндӱгер

03.10.2017

Алтай Республиканыҥ Башчызы, Башкарузыныҥ Председатели А. В. Бердников бу кӱндерде Майма јуртта «Атлант» деп адалган спортивно-оздоровительный комплексти тудар иштер канайда ӧдӱп турганы аайынча ишмекчи јуун ӧткӱрди.

Республиканыҥ бир канча министрлери, Майма аймактыҥ јааны Е. А. Понпа, «Горно-Строй» ООО-ныҥ башкараачы ишчилери ле ӧскӧ дӧ улус турушкан бу јуун Майманыҥ «Најылык» деп стадионыныҥ јанында тудулып јаткан бу комплекстиҥ јеринде ӧтти.
Тергеениҥ Башчызы калганчы ӧйлӧрдӧ јербойында спорттыҥ учреждениелериниҥ материально-техникалык тӧзӧлгӧзин јарандырарына, албаты-јонды, озо ло баштап јаш ӱйени спортло тазыктырарына тартып аларына јаан ајару эдилип турганы керегинде айткан. Бистиҥ республиканыҥ кӧп тоолу спортчылары бийик једимдерге једип, спорттыҥ телекейинде јарлу болгоны бистиҥ тергеениҥ тоомјызын кӧдӱрерине камаанын јетирет. Jаҥы тудулып јаткан бу комплекс спорттыҥ бистиҥ тергееге јаан учурлу объеги болуп јат: озо ло баштап текши спорттыҥ ӧзӱмине јаҥы тебӱ берер, ол тоодо јаш ӱйе спорттыҥ башка-башка бӱдӱмдериле тазыктырынарына.
—Бисте эмдиги ӧйдиҥ некелтелерине келижип турган стадион, бассейн бар. Бу ла кӱндерде спортивный акробатиканыҥ эмдиги ӧйдиҥ јазалдарыла јеткилделген тӧс јери тузаланарына табыштырылды. Jе бу ла ок ӧйдӧ бистиҥ республика Россия Федерация ичинде бойында јабынтулу тош ӧргӧӧ јок сок јаҥыс субъект болуп јат—деп, тергеениҥ Башчызы айтты. Оноҥ ол бу объектти тударыла колбой ӧткӱрилген иштерди эзедип айтты.
Россия Федерацияныҥ туризм, спорт ло јашӧскӱримниҥ политиказы аайынча министри Виталий Мутко ло бистиҥ тергеениҥ Башчызы ортодо 2011 јылда ишмекчи туштажу ӧдӧрдӧ, Маймада тош ӧргӧӧ тударын баштаары керегинде јӧп јарадылган. Тӧс јердеҥ чыгарылган акчаныҥ чодыла объектти тудатан јер казылган ла белетелген, тоштыҥ ареназы ла площадка болотон јердиҥ фундаменти тӧзӧлгӧн, комплекстиҥ темир карказы тургузылган. Ӧткӱрилген тудум иштерге 100 миллион салковой кире акча чыгымдалган. Jе оноҥ ороонныҥ экономиказында болгон кызалаҥнаҥ улам акча-манатла јеткилдеш 2014 јылда токтой берген. Объектле колбой мындый айалга тӧзӧлӧ берерде, федерал тӧс јердеҥ акча-манатла болуш керек боло берген.
Алтай Республиканыҥ Башчызы А. В. Бердников бу суракла Россия Федерацияныҥ Президенти В. В. Путинге баштанарда, ол бу объектти учына јетире тударына акча-манат чыгарзын деп јакылта берген. Оныҥ шылтузында 2017 јылда федерал бюджеттеҥ 367,6 миллион салковой акча чыгарылган.
Мынайып, тудум иштер объектте улалган. Тургуза ӧйдӧ фундаментке гидроизоляция эдери, ӧрт ӧчӱрерине керектӱ резервуардыҥ оро-котлованын белетеери, арена болотон јердиҥ тӧзӧлгӧзине таш-кумак урары, јерди јыра-немелердеҥ арутаары аайынча иштер ӧткӱрилген.
Тергеениҥ Башчызы мындагы тудум иштерди шиҥдеп кӧрӱп тура, подрядчик јаҥыс ла иштиҥ чыҥдыйына эмес, је анайда ок иштер тӱрген ӧдӧрине аҥылу ајару этсин деген. «Мында јаҥыс ла тош арена эмес, је анайда ок спорттыҥ волейбол, баскетбол, теннис ле ӧскӧ дӧ бӱдӱмдериле улус тазыктырынатан аҥылу залы болор. Искусственный тошту ла текши кеми 6831 квадратный метр болотон ӧргӧӧдӧ кӧрӧӧчилер отуратан јерлердиҥ тоозы 500. Бу келер ӧйдӧ эмдиги ӧйдиҥ јазалдарыла јепселген объект болор, иштиҥ тебӱзин бир де јабызатпас керек. Республикага сӱрекей керектӱ бу комплексти 2018 јылдыҥ сыгын айыныҥ башталганы кирезинде табыштырар деген амаду тургузылган»—деп, ол айткан.
Тудум иштер ӧдӱп турган јерди кӧрзӧҥ, бӱдӱретен иштер эмди де баштаҥ ажыра—ӧргӧӧниҥ бойынаҥ јӱк ле темир каркас тургузылган болуптыр. Объектти тудуп турган организацияныҥ чыгартулу кижизиниҥ айтканыла, каркасты учына јетире тударына керектӱ темир эдимдер јанынаҥ Барнаулдыҥ бир организациязыла јӧптӧжӱ тургузылган. Мындагы айалгадаҥ кӧрзӧ, акча ла бар болзо, тудум иштер јыл туркунына бӱткедий.

А. СУЛУКОВ