Алтайдын Чолмоны

Jакшынак керектер улалат

03.11.2017

Кӱчӱрген айдыҥ 1-кы кӱнинде Горно-Алтайск каланыҥ Мелиорация микрорайонында балдардыҥ спортивный площадказыныҥ кӧдӱриҥилӱ ачылтазы ӧткӧн.

Бу объект «Единая Россия» политический партияныҥ баштаҥкайыла ӧткӱрилип турган «Калада јадарга јакшынак айалга тӧзӧӧри» деп ӱлекер-проект аайынча тудулган. Бу кӱн микрорайондо јадып турган эл-јонныҥ, анчада ла оогош болчомдордыҥ санаазында узакка артар болор.
Бу кӧдӱриҥилӱ ачылтага келген јамылулардаҥ Горно-Алтайск каланыҥ мэри Юрий Нечаев уткуулду сӧс айткан:
—Горно-Алтайск каланыҥ кӱндӱлӱ эл-јоны, кару айылчылар ла балдар, бӱгӱн бу микрорайондо чындаптаҥ да јакшынак байрам. Алдында јылдарда мында јаткан улус бу микрорайондо балдардыҥ площадказы качан ла тудулбагай деп иженетен. Бӱгӱн бу ижемји јӱрӱмде бӱткен деп айдар керек. Алтай Республиканыҥ Башкарузыныҥ, «Единая Россия» политический партияныҥ программазыныҥ шылтузында беш јылдыҥ туркунына мындый площадкалар калабыстыҥ башка-башка микрорайондорында тудулар. Онызы сӱреен јакшы, мында балдар ойноор, спортло тазыктырынар аргалу. Бис билерис: бӱгӱнги кӱнниҥ некелтелериле ГТО-ныҥ нормативтерин де табыштырарга келижет. Бу площадкаларда ого до белетенерге јараар болор. Jажы јаандай берген улус мында баркаларын ээчидип, амыраар, шахмат эмезе домино ойноор. Бу площадканы туткан строительдерге быйан айдар керек. Олор бу объектти тузаланарына ӧйинде табыштырган. Микрорайонныҥ эл-јонына, мындагы балдарга бу площадкага чебер болзын деп кӱӱнзеери артат. Площадка узак јылдарга амырайтан ла спортло тазыктырынатан јер болзын. База катап бастырагарды байрамла!
Юрий Нечаев Горно-Алтайск каланыҥ администрациязыныҥ Быйанду самаразыла таҥынаҥ аргачы Агаран Аркилянды ла Балдардыҥ художественный школын кайралдаган.
Каланыҥ мэриниҥ уткуулыныҥ кийнинеҥ «Созвездие» деп эстрадно-вокальный студияныҥ кожоҥчызы јуулгандарга кожоҥын сыйлаган.
Ээчий сӧс Алтай Республиканыҥ депутады, «Калада јадарга јакшынак айалга тӧзӧӧри» деп ӱлекер-проекттиҥ координаторы Герман Чепкинге берилген. Оныҥ темдектегениле, «Единая Россия» партияныҥ «Калада јадарга јакшынак айалга тӧзӧӧри» деп ӱлекер-проектке 20 миллиард салковой чыгарар деген баштаҥкайын Госдума јӧмӧгӧн деп, партияныҥ тулаан айда ӧткӧн форумында јарлагандар. «Оноҥ бери кӧп тӧ ӧй ӧтпӧгӧн, је мындый объекттер тузаланарына табыштырылып башталган. Каланыҥ администрациязыла кожо эрчимдӱ иштеп, тургузылган бу амадуларды бӱдӱрерге, бис белен деп, јаан изӱ айда оҥдогоныс ла бӱдӱрип баштаганыс. Бис «Jакшынак дворлор» деп адалган программа аайынча иштедис, ӱлекердиҥ ээчий бӧлӱги—«Эл-јон јӱрер јерлер». Кадастровый палатаныҥ јанында Билениҥ скверин тудар иштер учына једип барат. Бастырагарды площадканыҥ ачылтазыла уткып турум. База бир айдарга турганым: 2018 јылда бу ууламјыларга чыгарылатан акча-манаттыҥ кеми база да кӧп болор. Керектиҥ аайы андый болор деп, биске кичӱ изӱ айда бӱдӱмјилегендер. Бу программа беш јылдыҥ туркунына улалар. Мен сананзам, бу кире ӧйдиҥ туркунына Горно-Алтайск каланыҥ бастыра микрорайондорында мындый площадкалар тудулар»—деп, ол айткан.
Алтай Республиканыҥ талалык ӧзӱм аайынча министриниҥ ордынчызы Марина Носованыҥ айтканы мындый болды:
— Jакшылыкту кӱнле, кару јерлештер ле балдар! Мында кӧп балдар јуулганы сӱӱндирет. Алтай Республиканыҥ талалык ӧзӱм аайынча министерствозы «Калада јадарга јакшынак айалга тӧзӧӧри» деп ӱлекер-проектти јӱрӱмде бӱдӱрери учун каруулу болуп јат. Оныҥ да учун министерствоныҥ ӧмӧлигиниҥ адынаҥ слерди јакшынак, эмдиги ӧйдиҥ некелтелерине келижип турган площадканыҥ ачылтазыла уткыйдым. Мен сананзам, бу площадкада јаҥыс ла јанында турган кӧп катту туралардыҥ балдары эмес, је анайда ок микрорайонныҥ ӧскӧ дӧ јерлеринде јадып турган балдар ойноор. Олор мында бой-бойлорыла таныжар ла најылажар. Бастырагарга бийик кӱӱн-санаа ла јӱрӱмигерде мындый јакшынак ӧйлӧр кӧп болзын деп кӱӱнзейдим.
Марина Носова Алтай Республиканыҥ талалык ӧзӱм аайынча министерствозыныҥ адынаҥ бу площадканы тударында турушкан подрядный организацияларга быйанын айдып, таҥынаҥ аргачы Владимир Кобдевке ле «Алтайстройгарант» ООО-ныҥ генеральный директоры Арман Маргабянга министерствоныҥ Быйанду самараларын табыштырган.
Мелиорация микрорайондо јадып турган Валерий Суханов мында јаткан эл-јонныҥ адынаҥ каланыҥ администрациязына, бу площадканы туткан строительдерге быйанын айткан. Оныҥ темдектегениле, тургуза ӧйдӧ јаҥы тудулган площадкада футбол до ойноорго јараар. Адакыда ол «бис бу площадканы чебер тузаланарыс» деп бӱдӱмјиледи.
Быйанду сӧстӧрин анайда ок болчомдор Марина Ефимова ла Арина Толкочокова айткандар. Олор площадка сӱрекей јараш, јарык ӧҥдӧрлӧ кееркедилгенин аҥылап темдектегендер.
Бу Горно-Алтайскта тудулган бежинчи площадка болуп јат. Бу объектти тударына 2 321 921 салковой чыгарылган, ол акчаныҥ 2,2 миллион салковойы федерал бюджеттеҥ.
Тургуза ӧйдӧ Горно-Алтайскта Мебельныйдагы кӱрдиҥ јанында Билениҥ сквери тудулат. Jеҥӱниҥ паркында локальный јуулардыҥ ветерандарыныҥ керек-јарактарын ӧткӱрер площадка тудулар.
Бу программа аайынча 2017 јылда Горно-Алтайскка 50 миллион салковой чыгарылган.
Адакыда, бу тудулган площадкалар балдарды компьютерлердеҥ ле планшеттердеҥ бир кезек те болзо ӧйгӧ айрыыр деп иженели. Балдарыс мындый объекттерде су-кадыгын кӱнӱҥ сайын тыҥытсын.

К. ЯШЕВ