Алтайдын Чолмоны

Jалакай јӱректӱлер албатыга керектӱ

12.12.2017

Jаҥар айдыҥ 5-чи кӱнинде тергеениҥ аймактарыныҥ ла каланыҥ волонтерлорыныҥ баштапкы тергеелик слет-јууны Горно-Алтайскта ӧтти. Эмди бу кӱн Волонтердыҥ кӱни деп адалып, кажы ла јыл темдектелер. Ол керегинде јакаанга колды Россияныҥ Президенти В. В. Путин кӱчӱрген айдыҥ 27-чи кӱнинде салган.

Слетты ӱредӱликтиҥ ле билимниҥ министерствозы, педколледж, Россияныҥ ӱренчиктериниҥ кыймыгузыныҥ Алтай Республикадагы бӧлӱги ле јашӧскӱрим политиканыҥ, јуучыл-тӧрӧлчи таскадуныҥ ла граждандарды черӱге белетеериниҥ республикан тӧс јери биригип ӧткӱрген.
Jуунныҥ туружаачыларын АР-дыҥ Башкарузыныҥ Председателиниҥ ордынчызы М. Маргачев уткыды: «Эмди кажы ла кӱӱнзеген кижи волонтердыҥ ижин бӱдӱрер аргалу. Волонтер болорго кӱӱнзегендердеҥ кандый да ӱредӱ некелбей јат, ого јаҥыс ла јалакай јӱректӱ, буурзак кижи болор керек. Ол качан ла болзо улуска болушка келерге белен болор учурлу. Чынын айтса, болужы керек јок јер јок. Олор бистиҥ республикада, анайда ок текши Россия ичиндеги кӧп иштерде туружып турганы иле кӧрӱнет. Волонтерлор кӧп учурлу керектерде туружат, ченемелин, билгирин тузаланып, алдында тургузылган сурактардыҥ аайына тӱрген чыгат».
Jӱрӱмниҥ кӱч айалгазына кирген улуска, каргандарга бу килеҥкей улустыҥ ижи чын ла сӱрекей керектӱ. Оныҥ учун тергеелик штабта тургуза ӧйдӧ волонтерлордыҥ биригӱзиниҥ келер ӧйдӧ иштейтен планы шӱӱжилет. Анда айдылганыла, студенттерле туштажулар, тегерик столдор, ишке кирер арга бергедий организацияларла колбу тудары. Алтай Республиканыҥ Башкарузы јашӧскӱримди волонтерлордыҥ ижиле јилбиркедер амадула база иш ӧткӱрет. Темдектезе, јылдыҥ сайын волонтерлор болорго кӱӱнзегендерге ӱредӱ-семинарлар ӧткӱрилет. Быјыл кӱӱк айдаҥ ала јаҥар айга јетире «Доброволец России-2017» деп текшироссиялык конкурс јарлалган. Ол «Jеҥӱниҥ волонтерлоры», «Jонјӱрӱмдикте волонтерлор», «Учуралдарда волонтерлор», «Медицинада волонтерлор», «Культурада волонтерлор», «Сакыбаган јанынаҥ тура берген айалгада волонтерлор», «Экологияда волонтерлор», «Тӧзӧӧчи волонтерлор» ло «Мӧҥӱн волонтерлор» деп ууламјыларла иштегендер ортодо ӧткӱрилген.
Бистиҥ тергееде бойыныҥ кӧрӱмјилӱ ижиле «Бала туштыҥ сурузы», «Болуштыҥ ӧмӧлиги», «Jакшы керектердиҥ агентствозы», «СТОПнаркотик», «ДобРАцентр» аҥыланат. 2017 јылдыҥ тулаан айында јашӧскӱримниҥ политиказыныҥ, физкультураныҥ ла спорттыҥ комитеди бистиҥ тергееде волонтерлордыҥ ижин тыҥыдар деген амадула Jолдыҥ картазын јараткан. Алтай Республикада јашӧскӱримниҥ политиказыныҥ, јуучыл-тӧрӧлчи таскадуныҥ ла граждандарды черӱге белетеериниҥ тӧс јери јашӧскӱримди јӧмӧп, гранттарла, субсидияларла болужат.
Кӱӱк айдаҥ ала волонтерлордыҥ «ДобРАцентр» тӧс јеринде 50-неҥ ажыра кижи бичиткен. Калада ӧткӱрилип турган кӧп керек-јарактарда бу волонтерлор эрчимдӱ туружат.
Анайда ок тузалу иш бӱдӱрип, бойыныҥ ӧйин кысканбастаҥ, туш улуска болужып јӱргени учун олордыҥ керектерин баалаганын керелеп, аҥыланган волонтерлорго бу кӱн Быйанду самаралар ла конкурстарда турушкан јеҥӱчилдерге дипломдор, волонтерлордыҥ тоозына јаҥыдаҥ кожулып, ӱредӱ ӧткӧндӧргӧ сертификаттар табыштырылды.

М. ЯБЫКОВА