Алтайдын Чолмоны

Алгаирде врачтыҥ јаҥы участогы

22.01.2018

Алтай Республиканыҥ Башчызы Александр Бердников Майма аймактыҥ Алгаир микрорайонында врачтыҥ участогыныҥ кӧдӱриҥилӱ ачылтазында турушкан.

«Бистиҥ государствоныҥ башчызыныҥ јаантайын айтканыла, јаҥныҥ органдарыныҥ РФ-тыҥ Президентинеҥ баштайла, јурт језеениҥ јаанына јетире башкараачыларыныҥ ижиниҥ тӧс кереги—ол эл-јонды кичееп корулаары. Эл-јонныҥ су-кадыгын тыҥыдары, демографиялык айалганы јарандырары—јаантайынгы ајаруда болотон сурактар» — деп, тергеениҥ Башчызы чокымдаган.
Александр Бердников калганчы он јылдыҥ ичинде республикада сегис тӧс эмчилик тудулган, тургуза ӧйдӧ Маймадагы тӧс эмчилик тудулат деп, эске алындырган. Jуук ӧйдӧ Майма аймакта Подгорное, Ыны-Оозы, Карасук јурттарда јаҥы ФАП-тар иштеп баштаар. Алгаирде врачтыҥ участогын ачканы—ол эл-јонго медицина јанынаҥ ӧйлӱ-ӧйинде чыҥдый јеткилдеш эдеринде база бир јаан алтам.
Кӧдӱриҥилӱ ачылтада кайралдаштар болгон. Майма аймактыҥ эмчилигиниҥ поликлиника бӧлӱгиниҥ медсестразы Светлана Ивановага эл-јонныҥ су-кадыгын корыырында једимдери, медицинада узакка ак-чек иштегени учун «Алтай Республиканыҥ су-кадыкты корыырыныҥ нерелӱ ишчизи» деп кӱндӱлӱ ат адалган.
Майма аймактыҥ эмчилигиниҥ врач-педиатры Наталья Воронинага профессионал ижинде једимдери ле кӧп јылдарга ак-чек ижи учун Алтай Республиканыҥ Кӱндӱлӱ грамотазы табыштырылган.
Алтай Республиканыҥ Башчызыныҥ, Башкарузыныҥ Председателиниҥ Быйанду самаразы Алтай Республикада ипотечный ла жилищный кредиттер аайынча агентстводо технический шиҥжӱлештиҥ бюрозыныҥ јааны Любовь Куликовага табыштырылды.
Микрорайонныҥ эл-јонын врачтыҥ участогы ачылганыла онойдо ок Алтай Республиканыҥ парламентиниҥ спикери Владимир Тюлентин ле Майма аймактыҥ администрациязыныҥ јааны Евгений Понпа уткыгандар.
Алтай Республиканыҥ ипотечный ла жилищный кредиттер аайынча агентствозыныҥ генеральный директоры Михаил Карпенко кӧдӱриҥилӱ айалгада Майма аймактыҥ эмчилигиниҥ баш врачы Сергей Коваленкого јаҥы участоктыҥ тӱлкӱӱрин табыштырган, байрамныҥ айылчылары дезе, кызыл лентаны кескендер.
Врачтыҥ участогы 3250 кижи, ол тоодо 810 бала јуртаган Алгаирде кӧп кат тураныҥ баштапкы кадында ачылган. Мында врач-педиатр ла участковый терапевт улусты кӧрӧр, онойдо ок процедуралар ӧткӱрер кабинет бар. Келген улус специалисттерге кӧрӱнер, јеҥилтилген эмдерге рецепттер, бюллетеньдер бичидер, прививкалар тургустырар, анализке кан табыштырар, ЭКГ ӧдӧр аргалу.
Врачтыҥ участогы бӱгӱнги кӱнниҥ јепселдериле јеткилделген, медишчилерге су-кадыкты корыырында бирлик јетирӱлик системага кирип турган автоматизированный ишеер јерлер тӧзӧлгӧн. Бу офистиҥ кыптарына, капитальный ремонтына, керектӱ јепселдерле, мебельле јеткилдеерине республиканыҥ бюджединеҥ 5 миллион салковойдоҥ ажыра акча-манат барган.
Эл-јоны кӧп, је эмчиликтеҥ ле поликлиникадаҥ ыраак, автобустар кӧнӱ јӱрбей турган бу микрорайондо врачтыҥ участогын ачарына Александр Бердников алдынаҥ бери ајару эткен болгон.

Jурт эмчиликтер—интернетте
«Ростелеком» Алтай Республиканыҥ јурттарындагы эмчиликтерге, амбулаторияларга ла поликлиникаларга колбуныҥ оптикалык каналдарыла интернетке колболор элбек арга берген.
Оператордыҥ тӧзӧгӧн инфраструктуразы медицинаныҥ јеткилдежиниҥ чыҥдыйын бийиктедерге јаҥы технологиялар тузаланар, онойдо ок јурт јерлерде колбуны ӧскӱрерин улалтар арга берет. Бу ӱлекер медицинаныҥ учреждениелерин элбек полосалу интернетке колбооры јанынаҥ федерал программа аайынча бӱдӱп туру.
Алтай Республикада бу иштер кӱчӱрген айда тӱгенген, Россияныҥ бастыра тергеелеринде дезе, былтыр јаҥар айда ӱлекер учына чыккан. Эрчимдӱ иштиҥ шылтузында ӱлекер эки айга ла бӱткен. ¯лекерге Кош-Агаш аймактыҥ Кӧкӧрӱ, Жана-Аул, Jаҥы Белтир јурттарында, Улаган аймактыҥ Саратан, Балыктујул јурттарында, Кан-Оозы аймактыҥ Чаргы-Оозы јуртында, Шабалин аймактыҥ Ильинка, Барагаш јурттарында, онойдо ок Чой аймактыҥ Каракокшо, Сейка јурттарында 12 медучреждение кирген.
Интернетке кийдирерге колбуныҥ 211 км оптикалык линиялары (ол тоодо станциядаҥ медучреждениеге јетиреги «калганчы миля») тудулган. Эҥ јаан иш Кан-Оозы аймактыҥ Чаргы-Оозы јуртында участковый эмчиликке јетире эдилген, ого јетире 42 км оптикалык кабель чӧйилген, Кӧкӧрӱде врачтыҥ амбулаториязына јетире—37 км, Ильинкада участковый эмчиликке јетире—25 км, Барагаштагы амбулаторияга—23 км, Каракокшодо амбулаторияга 25 км кабель чӧйилген.
«Jаҥар айдыҥ учында алты јурттыҥ амбулаториялары «Ростелекомло» интернетке колбооры јанынаҥ контаркт тургускан. Кочкор айда бис Кош-Агаш ла Улаган аймактардыҥ медучреждениелерин тӱрген скоростьту интернетке колбоорын пландайдыс»,—деп, «Ростелекомныҥ» Алтайский филиалыныҥ директорыныҥ ордынчызы Лариса Имедоева куучындады.
Оныҥ айтканыла, компания компьютерный медјепселдерди турулталу тузаланарында ла јурт эл-јонды јеткилдеериниҥ чыҥдыйын јарандырарында болушту телемедициналык јаҥы технологияларды тузаланарында јӧмӧжӧргӧ белен.
«Ростелеком» государственный контракт-јӧптӧжӱни бӱдӱрип, Россияныҥ 3134 медучреждениезин интернетле јеткилдеген, ол тоодо олордыҥ 349-ы Сибирьде. 2018 јылдыҥ учына чыгара Россияда интернетке 13 890 медучреждение колболоры пландалат.