Тӧс ӱредӱниҥ бирӱзи — айыл-јурттыҥ байы

16.03.2018

«Алтайдыҥ Чолмоны» газеттиҥ редакциязы калыктыҥ јаҥжыккан јаҥжыгуларына учурлалган тизӱ бичиктерди белетеп чыгарар ижин улалтат.

«Алтайдыҥ Чолмоны» газет албатыныҥ чӱм-јаҥын орныктырар амадула кычыраачылары ортодо конкурс јарлап ӧткӱрген. Кычыраачылар бу иште эрчимдӱ туружат. Темдектезе, «Баланыҥ байы» (2015 ј.), «Аржан суулардыҥ байы» (2016 ј.) деген бичиктер ак-јарыкка чыгып, јон ортодо суруда, јилбӱде болгоны оморкодулу.

Ӧткӧн јылда тӧрӧл газедис бу ижин улалтып, «Айыл-јурттыҥ байы» деген конкурсты јарлаган. Мында кычыраачылар айыл-јурттыҥ, от-очоктыҥ, айылдыҥ эр ле эпши јаныныҥ учуры, байы керегинде јилбилӱ бичимелдерин ийип, јаан иште акту кӱӱндеринеҥ турушты.

Тоолу кӱндер кайра «Алтайдыҥ Чолмоны» газедис шак бу бичимелдердеҥ турган «Айыл-јурттыҥ байы» деген јап-јакшынак бичикти кепке базып чыгарды. Бичикти газеттиҥ редакциязынаҥ келип садып алар јарамыкту арга бар.

«Айыл-јурттыҥ байы» деген бичиктиҥ редакторы А. Кыйгасова, јурукчызы Ч. Барсукова (дизайны, верстказы бу јурукчыныҥ), фотојуруктары Е. Бутушевтиҥ.

Албатызыныҥ кӧгӱс байлыгын, культуразын, эрјинеге бодолду энчи байлыгын чаракчадаҥ јууп, бичикке салганы келер ӱйелерге керектӱ, тузалу ӱредӱ деп, тӧрӧл газетти јӧмӧп, бичикти чыгарарга акча-манатла болушкан «МЕРКИТ» ООО-ныҥ башкараачызы А. Кулаковко, «ЮНИКОН» ООО-ныҥ башкараачызы Э. Темдековко «Алтайдыҥ Чолмоны» јаан алкыш-быйанын айдат. Мынаҥ ары мындый ак санаалу, тӧрӧлчи кӱӱн-тапту улустыҥ тоозы кӧп болзын.

Jилбилӱ јуунты ӱредӱчилердиҥ, таскадаачылардыҥ, јонјӱрӱмдик ууламјылу ла ӱредӱлик учреждениелердиҥ ишчилерине, ада-энелерге баштапкы болушчы бичик болорында алаҥзу јок.
Бичикте, темдектезе, Т. Паштакованыҥ, С. Тектиеваныҥ, Л. Майчикованыҥ, З. Боделукованыҥ, Э. Делдошпоеваныҥ, И. Саданованыҥ, У. Адыековтыҥ, В. Суруновтыҥ, Р. Темееваныҥ, У. Чараганованыҥ, З. Манзырованыҥ, В. Кармакованыҥ бичимелдери јарлалды. Бичикти садып аларга меҥдегер, тиражы јӱк ле бир муҥ.

К. ПИЯНТИНОВА

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым