Jайаандыктыҥ ишчилерине быйанду сӧстӧр

27.03.2018

Культураныҥ ишчилериниҥ кӱнине учурлалган кӧдӱриҥилӱ јуун тулаан айдыҥ 22-чи кӱнинде П. В. Кучияктыҥ адыла адалган эл драмтеатрда ӧткӧн.

Культураныҥ ишчилерин профессионал байрамыла Алтай Республиканыҥ башчызы Александр Бердников уткыган. Ол бойыныҥ уткуулду сӧзинде аҥылап айтканыла, Россияныҥ президенти Владимир Путин ороонныҥ јер-телекей ичинде аҥылузын ла јаҥжыгуларын чеберлееринде, оныҥ тоомјызын кӧдӱреринде культураныҥ учуры сӱрекей јаан болгонын јаҥыс катап эмес темдектеген. «Алтай Республикада бирлик кӧгӱс байлык тӧзӧлгӧн, онызына јаан камаанын культураныҥ бӧлӱгинде иштеп тургандар јетирген. Бис бойыстыҥ јайаандык ӧмӧликтерисле, артисттерисле оморкойдыс. Олор бойыныҥ јайалтазыла јаҥыс ла республиканыҥ кӧрӧӧчилерин эмес, је анайда ок оныҥ тыштында да јадып турган калыктарды сӱӱндирет. Бистиҥ јайалталарыс јылдыҥ ла текшироссиялык, албатылар ортодогы кӧрӱлерде ле фестивальдарда јеҥӱчилдер болуп, кӧп тоолу сыйларла кайралдадат» — деп, башчы айткан. Республиканыҥ јайалталарыла ӧскӧ дӧ ороондордыҥ кӧрӧӧчилери таныш болгонын темдектеер керек.

Башчы культураныҥ бӧлӱгиниҥ ветерандарына база јаан быйан сӧзин айткан. Оныҥ темдектегениле, шак ла ол улус Алтай Республиканыҥ албатызыныҥ кӧгӱстик байлыгын тӧзӧӧриниҥ тӧзӧлгӧзи болуп јат.

«Бастыра ӧйлӧрдӧ бистиҥ тӧрӧл Алтайыс тергее де, ороон до кеминде культураныҥ ӧзӱмине јаан камаанын јетирген улусла бай болгон. Бӱгӱн де бистиҥ јайалталарыстыҥ тоозы сӱрекей кӧп. Олордыҥ јайаандык јайалтазы бисти байыдат, айландыра телекейди кееркедет. Онызын бис баалап, олорды јӧмӧп јӱрер учурлу. Ижигер учун, кезикте, чынынча айтса, ол слердиҥ ле эрчимигерге тӧзӧлгӧлӧнӧт, јаан быйанымды айдарга турум» — деп, АР-дыҥ Эл Курултайыныҥ спикери Владимир Тюлентин айткан.

Jаҥжыкканы аайынча культураныҥ ишчилерин профессионал байрамыла анайда ок тергеениҥ министерстволорыныҥ ла ведомстволорыныҥ чыгартулу улузы база уткыган.
Алтай Республиканыҥ тӱӱки-культурный энчилигин чеберлеп аларына, музейдиҥ иш-керектериниҥ ӧзӱмине јаан камаанын јетиргени ле кӧп јылдардыҥ туркунына ак-чек ижи учун А. В. Анохинниҥ адыла адалган эл музейдиҥ баш билим ишчизи Сергей Киреевке РФ-тыҥ Федерал Jууныныҥ Федерация Совединиҥ председателиниҥ адынаҥ быйанду сӧс јарлалган. «Алтай Республиканыҥ культуразыныҥ нерелӱ ишчизи» деген кӱндӱлӱ ат балдардыҥ Горно-Алтайсктагы 1-кы таҥмалу кӱӱлик школыныҥ преподаватели Елена Кендзорго, балдардыҥ Горно-Алтайсктагы 2-чи таҥмалу кӱӱлик школыныҥ преподавательдери Людмила Михеевага ла Юлия Товаровага, Оҥдой аймакта Коргобы јурттыҥ клубыныҥ јааны Алефтина Савинага адалган.

Алтай албатыныҥ кӧгӱстик энчилигин чеберлеерине, ӧскӱрерине ле албатылар ортодо таркадарына јаан камаанын јетиргени учун Алтай Республиканыҥ литератураныҥ ла искусствоныҥ бӧлӱги аайынча Г. И. Чорос-Гуркинниҥ адыла адалган государственный сыйы АР-дыҥ Бичиичилер биригӱзиниҥ јааны Бронтой Бедюровко табыштырылган.
Алтай Республиканыҥ Кӱндӱлӱ грамотазыла кайралдаткан улустыҥ тоозында: «Россияныҥ јурукчыларыныҥ биригӱзи» ВТОО-ныҥ Алтай тергеелик бӧлӱгиниҥ турчызы Владимир Ельников, П. В. Кучияктыҥ адыла адалган национальный драмтеатрдыҥ художественный башкараачызы Эмма Иришева, Майма аймактыҥ культура аайынча тӧс јериниҥ ле ЦБС-ыныҥ баш библиотекари Светлана Капитонова, балдардыҥ искусствозыныҥ Чойдогы школыныҥ директоры Виктор Лазарев, Чой аймактыҥ администрациязыныҥ культура аайынча бӧлӱгиниҥ јааныныҥ качызы Светлана Субботина, балдардыҥ искусствозыныҥ Улагандагы А. Г. Калкинниҥ адыла адалган школыныҥ преподаватели Суркура Танзаева, балдардыҥ республикан библиотеказыныҥ баш библиотекари Зоя Чичинова, М. В. Чевалковтыҥ адыла адалган национальный библиотеканыҥ ведущий библиотекари Валентина Чукина.

Анайда ок АР-дыҥ башкарузыныҥ сый-акчазы культураныҥ ла искусствоныҥ бӧлӱгинде бийик једимдерге јеткен бир бӧлӱк ишчилерге табыштырылган. Кеми 50 муҥ салковой бир катап берилип турган сый-акча ветерандардыҥ «Печки-лавочки» вокал группазыныҥ солисти Виктор Евсеевке, балдардыҥ искусствозыныҥ Кош-Агаштагы школыныҥ преподаватели Ерболат Нуримановко, Чамал јурттаҥ јурукчы, поэт, кожоҥчы, композитор Алексей Тадиновко, кийистеҥ эдимдер эдери аайынча ус Айдана Тадыкинага, балдардыҥ искусствозыныҥ Шабалиндеги школыныҥ преподаватели Алла Терешевага табыштырылды.

Культураныҥ ла искусствоныҥ бӧлӱгинде једимдери учун Алтай Республиканыҥ башчызыныҥ тергеениҥ јайалталу балдарына ла јашӧскӱримине деп адалган кеми 20 муҥ салковой сый-акчазыла балдардыҥ искусствозыныҥ Кош-Агаштагы школыныҥ ӱренеечизи Алима Аменова, балдардыҥ јайаандыгыныҥ Оҥдойдогы тӧс јериниҥ ӱренеечизи Карина Крачнакова кайралдаткан.
Культураныҥ бӧлӱгинде једимдери ле кӧп јылдардыҥ туркунына ак-чек ижи учун АР-дыҥ Эл Курултайыныҥ Кӱндӱлӱ грамотазыла јеезелер ортодо библиотечный системаныҥ јетирӱлик-технический ле программный јеткилдеш аайынча бӧлӱгиниҥ јааны Сабыржан Абизиев, культураныҥ Шабалин аймактагы тӧс јериниҥ режиссер-тургузаачызы Татьяна Архипова, Чамал аймакта Эликманардагы Культураныҥ туразыныҥ методисти Евгений Горночаков, Кӧксуу-Оозы аймактаҥ артист Ольга Ковтун, Кӧксуу-Оозы аймакта Катанду јурттагы Культураныҥ туразыныҥ јааны Елена Козлова, Чой аймакта Паспал јурттагы Культураныҥ туразыныҥ јааны Светлана Мартьян, Шабалин аймактыҥ культура аайынча тӧс јериниҥ директоры Елена Тахтаева, Кош-Агаш аймакта Мукур-Таркаты јурттагы Культураныҥ туразыныҥ јааны Динара Чилбаева кайралдаткан. Анайда ок республикан парламенттиҥ спикериниҥ Быйанду самаразы албатыныҥ јайаандыгыныҥ Шабалин аймакта Чаргы јурттагы туразыныҥ художественный башкараачызы Сергей Порсевке табыштырылган.
Байрамныҥ кӧдӱриҥизинде јакшынак ойын-концерт болгон.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина