Алтайдын Чолмоны

Элитный бӧлӱктердиҥ бирӱзи

03.04.2018

Тулаан айдыҥ 29-чы кӱнинде П. В. Кучияктыҥ адыла адалган республикан эл театрда Национальный гвардияныҥ черӱлериниҥ кӱнине ле Росгвардияныҥ Алтай Республика аайынча бӧлӱгиниҥ СОБР-ыныҥ 25 јылдыгына учурлай кӧдӱриҥилӱ керек-јарак ӧткӧн.

Ол тӱштиҥ 14 саадында башталган. Бу ок кӱнниҥ баштапкы јарымызында Майма јуртта Энергетиктердиҥ оромында СОБР-дыҥ ла ОМОН-ныҥ јаҥы тудулган административный туразы тузаланарына табыштырылган. Оныҥ кӧдӱриҥилӱ ачылтазында РФ-тыҥ Национальный гвардиязыныҥ Сибирьдеги округтагы черӱзиниҥ командующийи, генерал-полковник Виктор Стригунов турушкан. Ол Россияныҥ Национальный гвардиязыныҥ черӱлериниҥ тӱӱкизи ле јаҥжыгулары керегинде куучындап, Росгвардияныҥ республикан бӧлӱгиниҥ таҥынаҥ составына бӱдӱрип турган ижи учун быйанын айткан. Стригунов мынаҥ ары кандый јаҥыртулар болорын база темдектеген. Оныҥ айтканыла, јылдыҥ учында мында бӧлӱктиҥ ордына башкарту тӧзӧлӧр, кадровый политика ла материально-технический тӧзӧлгӧ јаҥыртылар.

Кӧдӱриҥилӱ ачылтада республикан башкаруныҥ ла тергеениҥ башчызыныҥ адынаҥ уткуулду сӧстӧрди вице-премьер Роберт Пальталлер айткан. Ол Росгвардияныҥ Алтай Республика аайынча бӧлӱгиниҥ јааны Дмитрий Расчетовко квадрокоптер аларына сертификат табыштырган.
ОМОН-ныҥ ла СОБР-дыҥ јаҥы туразыныҥ тӱлкӱӱрин «Горно-Строй» компания-подрядчиктиҥ директоры Валерий Вавилкин табыштырган кийнинеҥ, Горно-Алтайский епархияныҥ кафедральный храмыныҥ настоятели Сергей Коньков јаҥы тураны аластаган.

Jаҥы табыштырылган ӱч кат административный тураныҥ кеми 4 745 квадратный метр. Анда иштейтен кыптар, спортивный зал, тренажерлорлу кыптар, актовый залдар ла ӱренер класстар бар.

П. В. Кучияктыҥ адыла адалган республикан эл театрда ӧткӧн кӧдӱриҥилӱ керек-јаракта государственный јаҥныҥ органдарыныҥ, јербойында башкарынарыныҥ чыгартулу улузы, Росгвардияныҥ Алтай Республика аайынча бӧлӱгиниҥ ишчилери ле башкараачылары, ветерандар, иш-молјузын бӱдӱрип турала божогон ишчилердиҥ билелериниҥ улузы турушкан.

РФ-тыҥ Национальный гвардиязыныҥ Сибирьдеги округтагы черӱзиниҥ командующийи, генерал-полковник Виктор Стригунов уткуулду сӧзинде Россияныҥ Национальный гвардиязыныҥ черӱлери граждандардыҥ амырын јеткилдеерине керектӱ бастыра иштерди бӱдӱрет деген.
«Сибирьдеги округтыҥ 30-таҥ ажыра аҥылу ууламјылу бӧлӱктери профессионал молјуларын ак-чек бӱдӱрет. Бӱгӱн 500-теҥ кӧп кижи Тӱндӱк Кавказта јаҥ буспазын јеткилдеп, терроризмле, экстремизмле тартыжат. Кажы ла кӱн спецназтыҥ 500-теҥ кӧп ишчилери јаҥ корыыр структураларда коллегаларына јаан јӧмӧлтӧзин јетирет» — деп, ол темдектеген.

Виктор Стригунов анайда ок «Ирбис» СОБР-дыҥ ишчилери 25 јылдыҥ туркунына кандый ла уур-кӱчтерди јеҥип, профессионал молјузын једимдӱ бӱдӱрип турганын темдектеген. Ол офицерлерге ле ветерандарга молјузын кандый ла уур-кӱч айалгаларда јалтанбай бӱдӱргени учун быйанын айткан. Национальный гвардияныҥ Сибирьдеги округтагы черӱзиниҥ командующийи Росгвардияныҥ Алтай Республика аайынча бӧлӱгиниҥ једимдӱ иштӱ ишчилерин кайралдаган. Анайып, «За проявленную доблесть» деп 3-чи степеньдӱ медальла полицияныҥ полковниги Дмитрий Расчетов кайралдаткан. РФ-тыҥ Национальный гвардиязыныҥ черӱлериниҥ федерал службазыныҥ Кӱндӱлӱ грамотазы полицияныҥ полковниги Евгений Гороховко ло полицияныҥ капитаны Евгений Ожмеговко табыштырылган. РФ-тыҥ Национальный гвардиязыныҥ черӱлериниҥ главнокомандующийиниҥ быйаны полицияныҥ подполковниги Олег Сухихке айдылган.

Аҥылу таҥынаҥ једимдери, баштаҥкайлары, јӱткимелдери учун баалу сыйла полицияныҥ полковниктери Олег Бобылев ле Андрей Кука кайралдаткандар.
Росгвардияныҥ ишчилерине анайда ок «За отличие в службе» деп тӧшкӧ тагар темдек ле баалу сыйлар табыштырылган.

«Ирбис» отрядтыҥ 25 јылдыгыла, Национальный гвардияныҥ черӱлериниҥ кӱниле Алтай Республиканыҥ башчызыныҥ адынаҥ башкаруныҥ председателиниҥ баштапкы ордынчызы Роберт Пальталлер уткыган.

«Ирбис» отряд тӧзӧлгӧнинеҥ ле ала Алтай Республиканыҥ ичбойындагы керектер аайынча министерствозыныҥ эҥ артык бӧлӱктериниҥ бирӱзи деп чоттолот. Оны тӧзӧгӧн кижи АР-дыҥ башчызы Александр Бердников болуп јат» — деп, Пальталлер темдектеген.

Ол анайда ок СОБР-дыҥ ишчилери јуу-согушту јерлерде кӧп катап командировкаларда болгонын, анда бойлорын јалтанбас, билгир јанынаҥ кӧргӱскенин аҥылаган.

«Jуучылдардыҥ алдында кандый да кӱч иш-амадулар тургузылза, олор оны једимдӱ бӱдӱрет. Мынызын кӧп тоолу государственный ла ведомственный кайралдар керелейт. Росгвардияныҥ Алтай Республика аайынча бӧлӱгиниҥ СОБР-ныҥ 10 ишчизи «Орден мужества» кайралла, 13 кижи «За заслуги перед Отечеством» орденниҥ 1-кы степеньдӱ медалиле, 24 кижи «За заслуги перед Отечеством» орденниҥ 2-чи степеньдӱ медалиле, 36 ишчи «За отвагу» медальла, 41 кижи «За отличие в охране общественного порядка» медальла кайралдаткан. Бир кижи «Россияныҥ МВД-зыныҥ кӱндӱлӱ ишчизи» болуп јат» — деп, Пальталлер айткан.

Вице-премьер РФ-тыҥ Национальный гвардиязыныҥ черӱлериниҥ Алтай Республика аайынча бӧлӱгиниҥ эҥ артык ишчилерине государственный кайралдар табыштырган.
Анайып, тап-эриктерди буспазын корыырында ла эл-јонло јеткер болдыртпазын јеткилдееринде служебный молјуларын једимдӱ бӱдӱрип турганы ла профессионализми учун Алтай Республиканыҥ Кӱндӱлӱ грамотазыла полицияныҥ подполковниги Андрей Вязников, полицияныҥ капитаны Андрей Молодых, полицияныҥ полковниги Игорь Потапов ло полицияныҥ майоры Сюнер Тошпоев кайралдаткан.

АР-дыҥ башчызыныҥ Быйанду самаразы Росгвардияныҥ Алтай Республика аайынча бӧлӱгиниҥ штабыныҥ јааныныҥ ордынчызы Александр Поповко табыштырылган.
Депутаттардыҥ адынаҥ уткуулду сӧстӧрин АР-дыҥ Эл Курултайыныҥ председатели Владимир Тюлентин айткан.

«Росгвардияныҥ тӧзӧлгӧни ХХI чактыҥ уур-кӱч некелте-кычыруларына каруу болуп јат. Слердиҥ ишчилер ле јуучылдар баштапкы ла эткен керектериле мындый черӱни тӧзӧгӧни чын шӱӱлте болгонын керелеген. Росгвардия бойын граждандарыстыҥ тап-эриктерин ле јайымын корып ийер, терроризмле, экстремизмле тартыжары аайынча тургузылган каруулу ла кӱч сурактарды бӱдӱрер сӱрекей тузалу структура деп угузып салган» — деп, республикан парламенттиҥ спикери айткан.

Владимир Николаевичтиҥ шӱӱлтезиле, Росгвардияныҥ Алтай Республика аайынча бӧлӱгиниҥ ишчилери билгирлери бийик, ижине каруулу профессионалдар болуп јат ла служебно-јуучыл јакылталарды бӱдӱрерине јаантайын белен.

Бойыныҥ уткуулду сӧзинде парламентарий Тӱндӱк Кавказтыҥ республикаларында ӧткӧн операцияларда турушкан јуучыл-ветерандарды аҥылап темдектеген.
«Тергеебисте кӧп улус јуулып турган керек-јарактарда јеткер болбозын јеткилдеп турганар учун, бу јылдыҥ эҥ јаан учурлу јондык-политический кереги — РФ-тыҥ Президентиниҥ талдаштарын ӧткӱреринде ижер учун быйанысты айдадыс» — деп, В. Тюлентин айткан.
Республикан парламенттиҥ спикери Владимир Тюлентин бир канча кижиге Эл Курултайдыҥ Кӱндӱлӱ грамотазын ла Быйанду самаразын табыштырган.

Кӧдӱриҥилӱ керек-јарак ӧдӧр тушта јуулган улус «Ирбис» СОБР-дыҥ ла «Беркут» ОМОН-ныҥ служебный молјузын бӱдӱрип турала божогон јуучылдарын бир минут ӧйдиҥ туркунына туруп эзеткендер. Бӱгӱн ол офицерлердиҥ ады-јолдорыла оромдор адалган, кереестер ле мемориальный досколор тургузылган. Олордыҥ эземине учурлай спортивный маргаандар ӧдӧт.

Росгвардияныҥ Алтай Республика аайынча бӧлӱгиниҥ «Ирбис» СОБР-ы элитный бӧлӱк болуп јат. 1993 јылда тӧзӧлгӧн бу отряд каршулу керек эдип тургандарды тудар, мылтык-јепсел суккан јажытту јерлерди јоголтор операциялардыҥ кажызында ла туружат.

Баштапкы чечен кампания ӧйинде командировкага бу отрядтыҥ 57 ишчизи аткарылган болгон. «Ирбистиҥ» тӧзӧлгӧнинеҥ ала Тӱндӱк Кавказтӧӧн узун командировкаларга 46 катап бастыра 394 ишчи барып јӱрген.

К. ЯШЕВ