Алтайдын Чолмоны

Президентис, орооныс учун оморкойдыс

11.05.2018

АР-дыҥ башчызы, башкарузыныҥ председатели Александр Бердников:
—РФ-тыҥ Президенти Владимир Путинниҥ инаугурациязында турушканым јаан тоомјылу керек деп бодойдым.

Анда бистиҥ национальный лидердиҥ куучынын угуп, калганчы ӧйлӧрдӧ болгон бастыра иш-керектерди ле једимдерди эске алып, Владимир Владимирович чындап та тыҥ лидер деп чикезинче айдар аргам бар. Ол бойы албатынаҥ чыккан, ол учун кӧгӱс-јӱрегиле оорыйт, бастыра јӱрӱмин Россияныҥ ӧзӱмине учурлаган. Бу иш-керегин ол оноҥ до ары улалтар.
Президенттиҥ бастыра телекейге јарлалган сӧстӧринде бистиҥ улу ороонныҥ албаты-јонына чындык болгоны јарт айдылган. Россияныҥ ийде-кӱчин тыҥыдарга, оныҥ ӧзӱмин эрчимделтерге, ороонныҥ албатызы ого эткен бӱдӱмјиге турарга, ол чындап та бастыра ийде-кӱчин берер.

Jаан текшинациональный иш-амадулар ла кӱнӱҥ сайынгы курч сурактар ортодо колбу бар болорын Владимир Владимирович аҥылап темдектеген. Онызы ороонныҥ башкараачызы бистиҥ телкем орооныстыҥ кажы ла кижизиниҥ айтканын угуп ла ундыбай јӱргенин, кажы ла кижи јаан учурлузын ајаруда тудуп турганын керелейт.

АР-дыҥ Эл Курултайыныҥ председатели Владимир Тюлентин:
—Владимир Путин РФ-тыҥ Президентиниҥ јамызына киргенине учурлалган кӧдӱриҥини телекейлик кеминде јондык-политический керек деп айдарга јараар.
Бистиҥ ойгор албаты ороонды тӧртинчи катап башкарып јаткан Владимир Путинниҥ шылтузында Россия телекей кеминде ийде-кӱчтӱ, озочыл ороон болуп калганын јакшы оҥдоп јат.
Орооныс бу кӱндерде ӧзӱмниҥ јаҥы бӧлӱгине кирип јат. Президент инаугурацияда јадын-јӱрӱмниҥ бастыра бӧлӱктеринде ичкерлеш болоры, тӧс ууламјы јаҥыртуларга эдилери керегинде чокым айткан. Ичкери ӧзӱм кажы ла кижинеҥ, ол кайда иштеп турганынаҥ, кандый укту ла мӱргӱӱл јаҥду болгонынаҥ, кандый партияны јӧмӧп јӱргенинеҥ камаан јогынаҥ, камаанду болор деп бодойдым.
Меге анчада ла бистиҥ ороонныҥ јаражы ла ийде-кӱчи оныҥ аҥылузында ла бирлик болгонында, бойыстыҥ јилбӱлеристи корып аларына ӱренип алганыста, Тӧрӧлис учун оморкудуны орныктырганыста, бистиҥ јаҥжыккан байлыктарыста ла једимдеристи бӱгӱн чеберлеп, ичкери ӧзӱмниҥ јолыла оноҥ ары барар керек деп айтканы сӱрекей јараган.
Бистиҥ ороонго учурлай ӧмӧ-јӧмӧ иштеерис, нениҥ учун дезе бӱгӱнгидий Россиядый Тӧрӧлис бисте јок ло база качан да болбос.

Федерация Совединиҥ турчызы Татьяна Гигель:
—Ӱнбереечилердиҥ 80 процент кирези ӱндерин РФ-тыҥ Президентиниҥ талдаштары ӧйинде Владимир Путин учун бергени ого бӱдӱмји јаан болгонын керелейт.
Ороонныҥ башчызыныҥ инаугурацияда куучынында телекей ичинде амыр-энчӱ болорын ла орооныстыҥ албатызыныҥ јадын-јӱрӱминиҥ чыҥдыйы бийиктеерин јеткилдеери керегинде айтканы тӧс шӱӱлте болуп темдектелген.
Ӱнбереечилерим меге инаугурацияны кӧргӧнис деп аткарган sms-јетирӱлери јаан учурлу. Олор бойыныҥ орооны, Президенти учун оморкоп турганын бичиген.

«Шабалин аймак» МО-ныҥ јааны Эрчим Сарбашев:
—Инаугурация — јаан учурлу керек. Бӱгӱн анаҥ јаҥы политикалык ӧй-бӧлӱк, јаҥы јаҥыртуларды ла јаан учурлу јӧптӧрди сакыыры башталып јат. Владимир Путин бойыныҥ куучынында тӧс ајаруны ороонныҥ ичбойындагы сурактарына эткен. Албаты орооныс кызалаҥнаҥ канайып чыгарын билерге амадайт — келер ӧйдӧ кандый иштер ӧдӧрин, бистиҥ бала-баркабыстыҥ келер ӧйи кандый болорын, кандый јонјӱрӱмдик быжулаштар јӱрӱмде бӱдерин.

Оҥдой аймактыҥ депутаттарыныҥ Совединиҥ председатели Эдуард Текенов:
—Бис 1990-чы јылдардагы кызалаҥдарды качан да ундыбазыс. Оноҥ Владимир Путин ороонныҥ башчызы болуп келерде, текши айалга јакшы јанындӧӧн бир эмештеҥ кубулып башталган. Кӱнбадыш ороондор бис качан да колго-бутка туруп болбозыс деп сананган, је олордыҥ андый санаазы калас керек болуп калды. Бӱгӱн де кызу тартыжу ӧдӧт. Бистиҥ государство телекейдиҥ эҥ тыҥ деген ороондорыныҥ бирӱзи болуп калганында бӱгӱнги Президенттиҥ ле оныҥ командазыныҥ канча јылдардыҥ туркунына бӱдӱрип келген ижиниҥ уч-турултазы.