От-очоктогы от качан да ӧчпӧзин...

От-очоктогы от качан да ӧчпӧзин…

14.08.2018

Майма аймактыҥ Сайдыс јуртында куран айдыҥ 11-чи кӱнинде Телекейдиҥ ӧс калыктарыныҥ кӱнине учурлалган байрам ӧтти.

Кӧдӱриҥи Россияда ӧдӱп јаткан граждан кӱӱн-таптыҥ эрчимниҥ ле болушты бойыныҥ кӱӱниле эдип турган улустыҥ јылына учурлалат. Ӧс калыктардыҥ кӱни телекей кеминде элбеде темдектелет. Шак бу тереҥ учурлу байрам республикада база бийик кеминде ӧдӧт. Бирликтиҥ, најылыктыҥ байрамыныҥ амадузы амыр-энчӱ, нак, бой-бойын тооп ло јӧмӧп, јуртап јаткан тургун калыктардыҥ культуразын, кӧгӱс байлыгын чеберлеп, келер ӱйелерге ӧзӱмдӱ јолло апарары. Бистиҥ республикада 8 муҥнаҥ ажыра ӧс калыктар эзен-амыр јуртап јат. Олор телеҥит, туба, чалканду, куманды ла шоор калыктар.

Россия Федерацияныҥ президенти Владимир Путинниҥ айтканыла, ӧс калыктардыҥ јаҥжыккан јаҥжыгулары, јаткан јадыны, иштеген ижи бистиҥ кӧп тоолу башка-башка культуралардыҥ кайкамчылу байлыгы, эрјинези.
Кӧдӱриҥиниҥ туружаачыларын, айылчыларын Алтай Республиканыҥ башчызыныҥ, башкарузыныҥ председателиниҥ ордынчызы Роман Птицын, Алтай Республиканыҥ Эл Курултайыныҥ депутады Укмет Альпимов, Майма аймактыҥ јааны Евгений Понпа, Алтай Республиканыҥ Jондык палатазыныҥ турчызы Борис Алушкин, Алтай Республиканыҥ ас тоолу ӧс калыктарыныҥ «Звенящий кедр» деген ассоциациязыныҥ јааны Любовь Пешперова ла оноҥ до ӧскӧ кӧп тоолу улус уткыды.

Роман Птицын байрамныҥ туружаачыларын Алтай Республиканыҥ башчызы Александр Бердниковтыҥ адынаҥ уткып, талада јуртап јаткан ӧс калыктарга амыр-энчӱ, эҥке-тоҥко јадын-јӱрӱм кӱӱнзеди. Ол бойыныҥ уткуулду куучын-эрмегинде: «Бистиҥ республикага Ӧс калыктардыҥ телекейлик кӱни аҥылу, учурлу. Нениҥ учун дезе Туулу Алтайда 91 ук-тӧстӧрдиҥ, калыктардыҥ чыгартулу улузы, онойдо ок Тӱндӱктиҥ, Сибирьдиҥ ле Ыраак Кӱнчыгыштыҥ 5 албатызы нак јуртап јат. Бис экономиканыҥ, јонјӱрӱмдиктиҥ, су-кадыкты корыырыныҥ, ӱредӱликтиҥ сурактарыныҥ аайы-бажына ӧмӧ-јӧмӧ чыгадыс.

Онойдо ок ӱйелер колбузы ӱзӱлбезин, ӧткӧн ӧйди эзедип, ук-тӧстӧриске быйанысты айдып, артыргыскан энчи-байлыгысты ӧскӱрели. От-очоктогы, јӱректеги от ӧчпӧзин»— деп айтты.
Кӧдӱриҥи ӧйинде озочыл иштӱ, ичкери кӧрӱмдӱ, јаркынду, јайалталу ӧс калыктардыҥ чыгартулу улузы Кӱндӱлӱ грамоталарла, Быйанду самараларла кайралдаттылар.

Тӱӱкизи байлык, ады-чуузы јер-алтайды ӧткӧн Сайдыс јуртта ӧткӧн байрамныҥ программазы байлык болды. Мында культураныҥ, калык чӱмделгезиниҥ, спорттыҥ байрамы эртен турадаҥ ала орой эҥирге јетире бийик кеминде ӧтти. Шак бу кӱн ӧс калыктардыҥ најылыгын лапту кереледи. Телекейде гран-кыйу јок, калыктарды чӱм-јаҥы, культуразы бириктирет, олорго ӧрӧ ӧзӧргӧ ийде берет деген кычырула ӧткӧн байрам бачым ундылбас.

К. Пиянтинова
(Байрам керегинде толо бичимел газеттиҥ келер номеринде јарлалар)

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина