Алтайдын Чолмоны

Коррекционный школ-интернатта кӧдӱриҥилӱ ачылта

05.09.2018

Алтай Республиканыҥ башчызы Александр Бердников Билгирлердиҥ кӱнине ле Горно-Алтайскта коррекционный школ-интернаттыҥ балдар ӱренер туразыныҥ јазашту иштердиҥ кийнинде ачылтазына учурлалган кӧдӱриҥилӱ керек-јаракта турушкан.

«Бистиҥ балдарга јарамыкту айалгалар тӧзӧӧри – Россияныҥ Президенти Владимир Путин аҥылу ајару эдип турган тӧс учурлу сурактардыҥ бирӱзи. Алтай Республиканыҥ јаҥдары кӱнӱҥ сайынчы ижинде бу суракка база јаан ајару эдет. Оныҥ да учун коррекционный школдо јазашту иштер ӧткӱрерине республикан бюджеттеҥ акча-манат чыгарар деген јӧп јарадылган болгон» – деп, Александр Бердников кӧдӱриҥи ӧйинде айткан.

«Бу школ 1974 јылда тудулган ла калганчы ӧйгӧ јетире мында јазашту иштер ӧткӱрилбеген. Калганчы јылдарда школдыҥ туразыныҥ айалгазы коомойтыган болгон. Бу ӱредӱлик учреждениениҥ сурагыла бис эки јыл кайра јууктада иштеп баштаганыс» – деп, башчы темдектеген. Јазашту иштер мында ӱч бӧлӱкле ӧткӧн. 2016 јылда балдар ӱренер туралардыҥ бирӱзи јазалган, былтыр балдар уйуктаар турада ла медпунктта капремонт ӧткӱрилген. Анайда ок пищеблок јаҥыртылып, балдарга спортплощадка тудулган. Школдыҥ јеринде волейбольный, футбольный, баскетбольный площадкалар ла ГТО табыштырарыныҥ зоназы, 100 метрге јӱгӱрериниҥ јолы, ыраагына калыырыныҥ кумакту орозы јазалган.

Быјыл эки кат ӱредӱлик корпуста кеми јаан јазашту иштер ӧткӱрерине ресбюджеттеҥ 63 миллион салковой кире акча чыгарылган. Бу акча-манаттыҥ чодыла стенелер тыҥыдылган ла јылулалган, тураныҥ јабынтызы солылган, тыш ла ич јанында инженерный сетьтер ӧткӱрилген. Анайда ок каттар ортодо темир сейсмопояс тургузары, радонноҥ корулаш, кыптардыҥ ичин јазаары јанынаҥ иштер ӧткӱрилген. Ӱредӱлик заведениениҥ јеринде балдар ойнойтон јаҥы площадка база јазалган.

«Бӱгӱн бу јаҥы объект болуп калган деп айдарга јараар, ол эмдиги ӧйдиҥ бастыра ээжи-некелтелерине келижет, ол тоодо ӧрт болдыртпазы јанынаҥ некелтелерге» – деп, Александр Бердников темдектеген.

Тургуза ӧйдӧ коррекционный школдо бастыра республикадаҥ 200-теҥ кӧп бала ӱренет, олордоҥ 90 бала интерната јадат. Тергеениҥ башчызы ӱренчиктерди Билгирлердиҥ кӱниле уткып, ӱредӱде бийик једимдер кӱӱнзеген. Коррекционный школ-интернаттыҥ ишчилерине кайралдар кӧдӱриҥилӱ айалгада табыштырылды.

Балдарды ла јашӧскӱримди ӱредер, таскадар бӧлӱкте јаан једимдери, кӧп јылдардыҥ туркунына ак-чек ижи учун РФ-тыҥ ӱредӱ ле билим аайынча министерствозыныҥ Кӱндӱлӱ грамотазыла чечектер ӧскӱрери ле декоративный садоводство аайынча ӱредӱчи Елена Дубоделова, таскадаачы Елизавета Матина кайралдаткан.

Профессионал ижинде једимдери, јаш ӱйени ӱредерине ле таскадарына јаан камаанын јетиргени, кӧп јылдардыҥ туркунына ак-чек ижи учун Алтай Республиканыҥ Кӱндӱлӱ грамотазыла баш бухгалтер Марина Антонова, курсак азаачы Людмила Бердюгина, физический культура аайынча ӱредӱчи Михаил Сапрыкин, алтай тилдиҥ ӱредӱчизи Сурлай Тадинова кайралдатты.

Бийик профессионал узы, школ-интернаттыҥ административно-ээлемдик ижин јеткилдеерине таҥынаҥ камаанын јетиргени, кӧп јылдардыҥ туркунына ак-чек ижи учун АР-дыҥ башчызыныҥ, башкарузыныҥ председателиниҥ Быйанду самаразы кухняныҥ ишчизи Любовь Елечековага, кастелянша Светлана Кессельге, таскадаачы Петр Назаровко, слесарь-сантехник Сергей Соколенкого, медицинский диетический сестра Ирина Шмаковага табыштырылды.

Јакшы ӱредӱзи ле школдыҥ јӱрӱминде эрчимдӱ туружып турганы учун ӱчинчи класстыҥ ӱренчиктери Антон Захаров ло Семен Шоюнов, 8-чи класстыҥ ӱренчиктери Андрей Томкевичус ла Виктория Шлапакова, 9-чы класстыҥ ӱренчиги Дарья Кордоева планшеттерле кайралдаткан. Тергеениҥ башчызы Александр Бердников анайда ок школго спорттыҥ јазалдарын садып аларына сертификат табыштырды.

АР-дыҥ башкарузыныҥ пресс-службазы