Садик танылбас болуп кубулган

07.09.2018

Сыгын айдыҥ 5-чи кӱнинде Горно-Алтайскта јазал иштердиҥ кийнинде балдардыҥ 11-чи таҥмалу «Колокольчик» деп садигиниҥ ачылтазы ӧткӧн. Кӧдӱриҥиде Алтай Республиканыҥ башчызы, башкарузыныҥ председатели Александр Бердников, башкаруныҥ председателиниҥ баштапкы ордынчызы Наталья Екеева, ӱредӱниҥ ле билимниҥ министри Алексей Бондаренко, Горно-Алтайсктыҥ мэри Юрий Нечаев, каланыҥ администрациязыныҥ ӱредӱ бӧлӱгиниҥ ишчилери, ада-энелер ле садиктиҥ таскадаачылары турушкандар.

Тергеениҥ башчызы кӧдӱриҥилӱ ачылтада уткуулду сӧс айдып, бу садикте 1978 јылдаҥ бери јазалду иштер ӧтпӧгӧн, эмди ол эскидегизинеҥ эки, озогызынаҥ он катапка јаранып калган деп темдектеген. Чындап та, балдарга, олордыҥ таскадаачыларына ла ада-энелерине јаан сый эдилген деп айдар керек. Садиктиҥ туразыныҥ јазал иштерине 2018 јылда 17,6 миллион салковойдоҥ ажыра акча чыгарылган. 15 миллион салковой акчаны республикан, 2,6 миллион салковойды јербойындагы бюджеттер берген. Айдарда, быјыл тӧзӧлгӧнинеҥ ала тӧртӧн јылдыгын темдектеп јаткан садик јаркынду юбилейине учурлалган байрамдарын ла ӧскӧ дӧ кӧдӱриҥилӱ керек-јарактарын телкем ле јарык кыптарлу јаҥы турада ӧткӱрер. Балдардыҥ «Колокольчик» деп садигине јаан болушты тергеениҥ башкарузы ла каланыҥ администрациязы јетирген деп айдар керек.

Александр Бердников школго баргалак балдардыҥ бу учреждениези эмдиги ӧйдиҥ эдим-јазалдарыла толо јеткилделген деп айткан. «Јаҥы јазалдар эмчилердиҥ кыбында, балдардыҥ уйуктап турган корпусында, казан азаачылардыҥ јеринде тургузылган. Строительдер бастыра иштерди чыҥдый бӱдӱрген. Тураныҥ јабынтызы база солынган, полдор ло кӧзнӧктӧр јаҥыртылган. Суу агызатан ла јылыдатан јазалдарынаҥ бери јаҥыдаҥ чыныкталган. Бир сӧслӧ, садик танылбас болуп кубулган. Россия Федерацияныҥ президенти Владимир Путин школго баргалак балдардыҥ учреждениелерине јаан ајару этсин деп јакып јат. Бис президенттиҥ јакылтазын толо бӱдӱрип, таскадаачыларга ла ӱредӱчилерге иштеер јакшынак айалгалар тӧзӧп јадырыс. Је кичинек болчомдор јаан улустыҥ туура салбас ајарузында јаантайын ла болор учурлу. Алтай Республиканыҥ башкарузы шак андый кӱӱн-санаалу иштеп јат».

Балдардыҥ 11-чи таҥмалу «Колокольчик» деп садигине бӱгӱнги кӱнде 180 бала јӱрӱп јат. Мында текши ӱредӱниҥ ле таскадуныҥ алты группазы иштейт. Садикте кӱӱниҥ ӱредӱчизи, ӱредӱчи-логопед, ӱредӱчи-психолог ло физкультураныҥ инструкторы бар. Балдарла бастыра он эки таскадаачы иштеп јат.

Башчы Алтай Республиканыҥ башкарузы бир, бӱдӱн-јарым јылдыҥ туркунына Горно-Алтайскта база ӱч садикти тудуп, ишке табыштырарын темдектеп јат, биске анайда ок эҥ оогош болчомдорды – эки айдаҥ ала ӱч јашка јетире балдарды садикте јерлерле толо јеткилдеер керек деп айткан. Балдардыҥ садиктеринде яслялардыҥ группалары ачылза, олор балдардыҥ энелерине сӱрекей тузалу болор. Јиит билелер балдарын андый ясляларга табыштырып, ишке темдектелген ӧйдӧҥ эрте чыгар кӱӱндӱ. Бис јиит ада-энелерге бастыра јанынаҥ болужар учурлу деп, башчы айткан.

Садиктиҥ јаан јашту балдарыныҥ группазыныҥ ла олордыҥ ада-энелериниҥ адынаҥ тергеениҥ башчызына Быйанду самара кӧдӱриҥилӱ айалгада табыштырылган. Башчы дезе балдарды таскадарында јеткен бийик једимдери ле узак јылдарга ак-чек иштегени учун садиктиҥ ӱредӱлӱ ле таскадулу иш аайынча јааныныҥ ордынчызы Ирина Жарованы ла казан азаачызы Надежда Жданованы башчыныҥ ла башкаруныҥ Быйанду самараларыла, сый-акчала кайралдаган. Кӧдӱриҥиде андый ок кайралдар «СибКапСтрой» ООО-ныҥ участогыныҥ јааны Михаил Докучаевке ле плотник-бетонщиги Олег Мовсисянга табыштырылган. Садикте јазалду иштер шак бу строительдердиҥ шылтузында чыҥдый ӧткӧн. Александр Бердников кӧдӱриҥилӱ ачылтада анайда ок 11-чи таҥмалу садиктиҥ јааны Татьяна Ивановага одус муҥ салковойдыҥ сертификадын ла балдардыҥ чӱмдӱ ле јараш ойынчыктарын сыйлаган.

Горно-Алтайсктыҥ мэри Юрий Нечаев таскадаачыларды, балдарды ла олордыҥ ада-энелерин јаҥы садиктиҥ ачылганыла уткып, каланыҥ администрациязы школго баргалак болчомдордыҥ учреждениелерин ле ясляларын тудатан ла чыныктап јазайтан иштерди мынаҥ да ары эрчимдӱ ӧткӱрер деп бӱдӱмјилеген. Республиканыҥ башчызы, «СибКапСтрой» ООО-ныҥ гендиректоры, 11-чи таҥмалу «Колокольчик» деп садиктиҥ јааны ла школго јӱргелек балдардыҥ бу учреждениезиниҥ эҥ оогош болчомдоры кызыл лентаны кескен кийнинде, бастыра айылчылар чыныкталып јазалган садиктиҥ туразына ӧдӱп, оныҥ телкем ле јарык кыптарыла јилбиркеп танышкандар.

П. КАБАР

Е. БУТУШЕВТИҤ фотојуругы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина