Туралардыҥ јаны јаранат, экстрим-парк ачылган

18.09.2018

Алтай Республиканыҥ тӧс калазы Горно-Алтайск кӱннеҥ кӱнге јаранат. Бу ла јуукта Жилмассив деген микрорайондогы туралардыҥ јанында јерлер јарандырылды ла каланыҥ паркында экстрим-парк ачылды.

Каладагы Коммунистический проспекттеги 158-чи таҥмалу ла Поселковый оромдогы 10-чы таҥмалу туралардыҥ јанында јарандырылган јерлердиҥ ачылтазы кӧдӱриҥилӱ айалгада ӧткӧн. Бу керек-јаракта ол микрорайондо јадып турган эл-јон, подрядчиктер, каланыҥ администрациязыныҥ ла тергеелик ӧзӱм аайынча министерствоныҥ башкараачылары ла ӧскӧ дӧ улус турушкан. Коммунистический проспекттеги ол тураныҥ јанында јерди јарандырарына федерал, тергеелик ле јербойындагы бюджеттердеҥ 4 миллион салковойдоҥ кӧп акча тузаланылган, тураныҥ квартираларында јадып турган улустыҥ бу ишке ууландырган акчазыныҥ кеми 220 муҥ салковойдоҥ кӧп.
Ол туралардыҥ јанында балдар ойноор площадкалар тудулган, туралардыҥ подъездтери ле кӧлӱктер турар јерлер келиштирте јазалган, тротуарлар ла јолдыҥ асфальты солылган. Балдар ойноор площадкаларда качелилер, спорт јазалдар, карусельдер тургузылган ла оогош болчомдорго кумакту јер јазалган.

Туралардыҥ јанын јарандырар иштерди «Дормостстрой» ла «Маймадагы ДРСУ» ООО-лор бӱдӱрген. Албаты-јонго тузалу ла сӱӱнчи экелген иштерде турушкандарга Быйанду самаралар табыштырылган. Байрамдык кӧдӱриҥи ӧдӧр тушта ол тураларда јадып турган оогош болчомдорго соотоштыҥ программазы ӧткӱрилген.

Каланыҥ оромдорын, тураларыныҥ јанында јерлерди јарандырар иштер эмди де ӧткӧнчӧ. Тургуза ӧйдӧ андый иштер Алтайский оромдогы сегис тураныҥ ла Коммунистический проспекттеги 74-чи таҥмалу тураныҥ јанында ӧдӧт. Автобустардыҥ Коммунистический проспекттеги В. И. Ленинниҥ адыла адалган тепсеҥ ле Ткацкий деген токтодулары ортодогы тротуарлар, Алтайский оромныҥ јанында Майма сууныҥ јарадыныҥ јанында јерлер јазалары темдектелип калган.

«Единая Россия» партияныҥ албаты-јон јаткан јерлерди јарандырары јанынаҥ «Городская среда» деген ӱлекери муниципалитеттерде албаты-јон јадып турган јерлерди улустыҥ баштануларына ла баштаҥкайларына тӧзӧлгӧлӧнип, текшилей јарандырарына ууландырылган. Андый иштер канай ӧдӱп турганы јондык шиҥжӱниҥ ајарузында тудулат.
Каланыҥ ичин јарандырары аайынча иштер экинчи јыл ӧдӧт, былтыр бу ӱлекер аайынча туралардыҥ јанында беш јер јарандырылган болгон. Горно-Алтайск каланыҥ администрациязыныҥ јааны Ольга Сафронова бу иште турушкан бастыра улуска быйанын айдып, олорго Быйанду самаралар табыштырган.

«Площадкалардыҥ ачылтазыла колбулу кӧдӱриҥи Горно-Алтайск кала тӧзӧлгӧнинеҥ ала 90 јылдыгын темдектеп јаткан ӧйдӧ ӧдӱп јатканы учурлу. Бастыра улуска ырыс, эҥке-тоҥко јадын-јӱрӱм, бийик кӱӱн-санаа кӱӱнзеп турум» — деп, ол айткан.

Кӧдӱриҥиле колбулу уткуулду сӧстӧрин Алтай Республиканыҥ тергеелик ӧзӱм ааайынча министриниҥ ордынчызы Марина Носова база айдып, активисттерге ле подрядный организациялардыҥ чыгартулу улузына Быйанду самаралар табыштырган. «Единая Россия» партияны јӧмӧӧчилердиҥ тергеелик совединиҥ турчызы, АР-дыҥ Журналисттер биригӱзиниҥ председатели Борис Алушкин уткуулду сӧстӧрин айдып, микрорайондо јадып турган улус јарандырылган јерлерин кичееп јӱрзин деп кӱӱнзеди.

Јазашту иштер ӧткӧн турада јадып турган улустыҥ адынаҥ быйанду сӧсти тураныҥ комитединиҥ председатели Екатерина Неверова айдып, подрядчиктерге ле специалисттерге, каланыҥ администрациязыныҥ башкараачыларына сыйлар ла Быйанду самаралар табыштырды.

База бир јакшынак керек калада культураныҥ ла амыраштыҥ паркында болды, мында экстрим-парктыҥ ачылтазы ӧтти. Бу экстрим-парк база ла «Городская среда» деген партӱлекер, муниципал программа аайынча тудулган ла јазалган. Ол текши парктыҥ бӱдӱжине келиштирте јазалганын темдектеер керек. Соҥында мында спорт-јондык, ӱредӱ-тазыктыру, байрамдык ла ӧскӧ дӧ керектер ӧткӱрилер база бир јер ачылганы каланыҥ эл-јоныныҥ јадын-јӱрӱмин јилбилӱ эдерине камаанын јетиреринде алаҥзу јок.

Экстрим-парк бӱткӱл комплекстеҥ турат: искусственный скалодром, буулардыҥ городогы, балдардыҥ боулдер-зоназы. Кайкамчылу ла солун мындый паркты тударына ла јазаарына текшилей 1,1 миллион салковойдоҥ кӧп акча ууландырылган, оныҥ кӧбизи федерал бюджеттеҥ чыгарылган болгон.

«Бис соҥында мында јап-јакшынак экстрим-парк болорыныҥ, ол ӧзӧриниҥ тӧзӧлгӧзин салып койдыс. Мында кайага чыгарыла тазыктырынып турган балдарыс тазыктырынар аргалу. Мынаҥ да ары бис болужарыс, ӧмӧ-јӧмӧ иштеп, бу јерди оноҥ јараш ла эптӱ эдип аларыс» — деп, каланыҥ администрациязыныҥ јааны Ольга Сафронова айткан.
Экстрим-парктыҥ ачылтазында ла Каланыҥ кӱнине учурлалган маргаандарда бистиҥ каланыҥ ла Бийсктиҥ спортчылары турушкан.

«Городская среда» деген ӱлекер аайынча быјыл Горно-Алтайскта ӧткӱрилетен иштер тӧрӧл калабыстыҥ бӱдӱмин јарандырар, ол иштиҥ уч-турулталары улусты су-кадык јӱрӱм јӱрерине кӧптӧҥ тартып аларына камаанын јетиреринде алаҥзу јок. Мынаҥ озо сӱр јок болгон јерлер јаранып турганы кӧсти сӱӱндирет деп айдарга јараар.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина