Сыйлар ырысту кычыраачыларда

19.10.2018

«Алтайдыҥ Чолмоны» республикан газеттиҥ редакциязы 2018 јылдыҥ экинчи јарымына бичидер ӧйдӧ кычыраачылардыҥ ортодо сыйлардыҥ ойын-лотереязы ӧдӧрин јарлаган эди. Ӱлӱрген айдыҥ 16-чы кӱнинде, текши республикабыста Алтай тилдиҥ кӱниле колбой керек-јарактар ӧдӱп турарда, ойын-лотерея ӧдӱп калды.

Јайгыда газетте јарлалган ойынныҥ ээжилериле болзо, бу ӧйгӧ газетке бичиткен улус квитанциязын эмезе оныҥ копиязын редакцияга экелер учурлу болгон. Баштапкы јер учун – мотоцикл, экинчи јер учун – планшет ле ӱчинчи јер учун смартфон сыйлалары јарлалган. Је ӱлӱрген айдыҥ 16-чы кӱнинде Горно-Алтайскта Најылыктыҥ туразыныҥ јаан залында ӧткӧн ойын-лотереяныҥ сыйлары јарлалганынаҥ кӧп болды.

Ойынды ӧткӱрерге комиссия тӧзӧлгӧн лӧ ого бистиҥ газеттиҥ баш бухгалтери М. В. Татанакова, бухгалтери И. Н. Кадыева ла бичик чыгарар «Алтын-Туу» тураныҥ генеральный директоры Т. Н. Туденева кирдилер. Председатели газеттиҥ менеджери Е. Н. Испокова болды.

Ойынды «Алтайдыҥ Чолмоны» газеттиҥ редакциязыныҥ баш редакторы Айсулу Мереевна Кыйгасова ачып, кычыраачыларга газеттиҥ ӧмӧлигиниҥ адынаҥ телекейде сок јаҥыс алтай газетке канча јылдарга улай бичидип тургандары учун јаан быйанын айтты. Газет јирме сегис јыл кайра атту-чуулу Г. И. Чорос-Гуркинниҥ адыла адалган јондык сыйды тӧзӧп, оны бир де ӱзӱктелтпей апарып јат. Ээчиде лауреатты јартаар иш башталып калды – бу айдыҥ туркунына јерлештердеҥ јаҥы кандидаттардыҥ аттарын сакыйдыс деп, баш редактор айтты. Ол онойдо ок газеттиҥ ӧмӧлигиниҥ узактаҥ бери ӧткӱрип турган јаҥжыккан да, јаҥы да солун керектерин, ол тоодо национальный ойындардыҥ фестивалин, бӱгӱнги ойын-лотереяны темдектеди. Национальный ойын-маргаандардыҥ фестивали «Алтайдыҥ Чолмоны» газеттиҥ 95 јылдыгына учурлалып былтыр ӧткӧн лӧ аймактардаҥ кӧп спортчыларды јууган. Эзенде Ирбизектиҥ ойындары ла Сартакпайдыҥ согоондоры деген маргаандар база ӧткӱрилери темдектелет. «Алтайдыҥ Чолмоны» газеттиҥ редакциязы ла Григорий Чорос-Гуркинниҥ адыла адалган јондык фонд быјыл онойдо ок балдардыҥ јуруктарыныҥ «Мениҥ тӧрӧл Алтайым» деп конкурсын тӧзӧп ӧткӱрген.

Газеттиҥ кычыраачылары ортодо мындый ойын-лотерея ӧткӱрери газетте ӱчинчи катап болуп јатканын ол айтты. Ойын-лотереяны ӧткӱрерин эрчимдӱ јӧмӧгӧн-болушкандардыҥ тоозында алдында ӧйдӧ «Алтайдыҥ Чолмонында» иштеген, бӱгӱн Сайлугемдеги нацпарктыҥ каруулу ишчизи болуп турган, Алтай Республиканыҥ Јондык палатазыныҥ культура, экология, СМИ ле јондыкла колбулар аайынча комиссиязыныҥ председатели Артур Сабин. Ол онойдо ок бу ойынды ӧткӱрерин баштаган кижи болуп јат.

Артур Семенович јуулгандарга баштанып, бӱгӱнги телекейде алтай тилдиҥ јаан учурын темдектеп, тил – ол калыктыҥ тирӱ эземи, оныҥ ич-кӧгӱс эрјинези, оныҥ чактардаҥ арткан энчи-байлыгы деп угусты. Оныҥ да учун тӧрӧл тилди ӱренери ле ӧскӱрери бӱгӱнги ӱйениҥ јаан каруулу кереги. Алтай калыктыҥ јебреннеҥ улалып келген байлык культуразын, чӱм-јаҥдарын, ич-кӧгӱс ӧскӧ дӧ байлыктарын корулаарыныҥ ла ӧскӱрериниҥ курч сурактарын, онойдо ок алтай тилди корыырыныҥ ла келер ӱйелерге артырарыныҥ сурактарын улайын кӧдӱрип турган «Алтайдыҥ Чолмоны» газетке бичидери база тӧрӧлчи кӱӱндӱ ончо элдиҥ каруулу кереги деп, ол темдектеди.

Кычыраачылардаҥ бастыразы 450 кирези кви-танция келген. Онойып, алты јашту Ангелина Кудачина кажы ла ырысту квитанцияны ӧткӱш шилдеҥ чыгарып, ойынды ӧткӱреечи Тамара Яковала кожо јеҥӱчилди јарладылар.
Баштапкы јерди Горно-Алтайсктаҥ Григорий Кудирмеков алды, ого мотоцикл келишти.
Экинчи јерге Улаган аймактыҥ тӧс јуртынаҥ Наталья Енчинова чыгып, планшет ойноп алды.
Кан-Оозы аймактыҥ Кӧзӱл јуртынаҥ Остап Кыйынов ӱчинчи болуп, смартфонло сыйлатты.
Јарлалган сыйларга ӱзеери база бир смартфонло Кан-Оозы аймактыҥ Мӧндӱр-Соккон јуртынаҥ Мира Тодошева сыйлатты.

Онойдо ок база тогус сыйдыҥ сертификаттары мындый улуска келишкен:
Фотохудожник Олеся Течиновага фотосессияга барып, фотого соктырар сертификат Горно-Алтайсктаҥ Любовь Ютановада.
«АЧ» газеттиҥ 500 кв. см. кемине бичимел берер сертификатты Оҥдой аймактыҥ Кӱпчеген јуртынаҥ Любовь Курдашева алды.
2019 јылдыҥ јарым јылына тӧлӧбӧзинеҥ газетке бичидер сертификат Горно-Алтайсктаҥ Леонид Кулунаковко келишти.
А. В. Анохинниҥ адыла адалган эл музейге эки кижи барып, экспонаттарла экскурсоводту таныжар сертификат Горно-Алтайсктаҥ Инга Белековага сыйлалды.
Газетке јал јогынаҥ уткуулдар берер сертификат Кӧксуу-Оозы аймактыҥ Сугаш јуртынаҥ Айана Бутушевага келишти.
«АЧ» газеттиҥ 1000 кв. см. кемине бичимел берер сертификатла Горно-Алтайсктаҥ Индира Савина (Алабанова) сыйлатты.
П. В. Кучияктыҥ адыла адалган эл театрга эки кижи барар сертификат Оҥдой аймактыҥ Шибее јуртынаҥ Эйа Ямановага келишти.
«Летуаль» магазиннеҥ садыжар сертификат Кан-Оозы аймактыҥ Кырлык јуртынаҥ Наталья Бабаковага сыйлалды.
«АЧ» газетке 2019 јылга акча тӧлӧбӧзинеҥ бичидер сертификат Горно-Алтайсктаҥ Алтынай Дединада.

Сыйлар келишкен кычыраачыларысты акту кӱӱнистеҥ уткып, тӧрӧл газедине мынаҥ да ары эрчимдӱ бичидип, оны кычырып јӱрзин деп кӱӱнзейдис!

Н. БЕЛЬЧЕКОВА
Е. БУТУШЕВТИҤ фотојуругы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина