Алтайдын Чолмоны

Jадын-jӱрӱмди jарандырарга

13.11.2018

Кӱчӱрген айдыҥ 10-чы кӱнинде «Единая Россия» политический партияныҥ Алтай Республикада тергеелик бӧлӱгиниҥ конференция-јууны ӧткӧн. Анда ӧдӱп јаткан јылда эдилген ишиҥ уч-турулталары кӧрӱлген. Конференцияныҥ туружаачылары анайда ок «Единая Россия» партияныҥ Москвада ӧдӧтӧн ХVIII съездине барып туружатан делегатты талдагандар ла партияныҥ тергеелик политсовединиҥ составында јаҥыртулар эткен.

Конференциядаҥ озо «Единая Россия» бастырароссиялык политический партияныҥ тергеелик политсовединиҥ јууны ӧткӧн. Оныҥ туружаачылары Алтай Республикада 2018 јылдагы партийный ӱлекер-проекттер аайынча иштердиҥ турулталарын кӧргӧн. Тергеебисте он тӧрт партийный ӱлекер аайынча иштер ӧдӧт. Олор: «Каладагы айалганы јарандырары», «Кичӱ Тӧрӧлиниҥ культуразы», «Балдардыҥ спорты», «Јаҥы школ», «Јеткер јок јолдор», «Бек биле», «Су-кадык келер ӧй», «Тӱӱкилик кереес», «Россияныҥ јурты», «Јаан јашту ӱйе» ле оноҥ до ӧскӧлӧри. Кажы ла ууламјыда бойыныҥ координаторлоры бар. Тергеелик политсоветтиҥ јуунында шак бу улус байа ууламјылар аайынча кандый иштер эдилгенин айткандар. Кажы ла ӱлекерге акча чыгарылат ла чокым иштер ӧткӱрилет. Темдек эдип, јаҥыс ла «Каладагы айалганы јарандырары» деген ӱлекерди алзабыс, Горно-Алтайсктыҥ кӧп квартираларлу тураларыныҥ јанында јакшынак площадкалар тудулып турганын эл-јон јарадып кӧрӧт.

Тергеелик политсоветтиҥ јууныныҥ кийнинде П. В. Кучияктыҥ адыла адалган эл театрда «Единая Россия» политический партияныҥ Алтай Республикадагы тергеелик бӧлӱгиниҥ конференция-јууны ӧткӧн. Оныҥ ижинде тергеелик политсоветтиҥ ле партияныҥ јербойындагы бӧлӱктериниҥ турчылары турушкан. «Единая Россия» политический партияныҥ тергеелик бӧлӱгиниҥ качызы, Алтай Республиканыҥ Эл Курултайыныҥ председатели Владимир Тюлентин ӧдӱп јаткан јылдыҥ тӧс политикалык керек-јарактары – ол Россия Федерацияныҥ Президентиниҥ тулаан айда ӧткӧн талдаштары ла сыгын айдыҥ 9-чы кӱнинде ӧткӧн муниципал талдаштар болгонын темдектеген.

«Тулаан айдыҥ 18-чи кӱнинде ӧткӧн талдаштар Алтай Республиканыҥ эл-јоны Владимир Путинге бӱдӱп турганын керелеген. Бу талдаштардыҥ турулталары аайынча республикада талдаштарга келген ӱнбереечилердиҥ 70 проценти Владимир Путинди јӧмӧгӧн. Ол тушта талдаштарга текши ӱнбереечилердиҥ 64 проценти келген» – деп, Владимир Тюлентин айткан.

Муниципал талдаштардыҥ турулталары керегинде айдып тура, партияныҥ тергеелик бӧлӱгиниҥ качызы «Единая Россияныҥ» республика аайынча кӧргӱзӱзи бастыра кемдӱ мандаттардыҥ 59 проценти болгонын темдектеген. «877 мандаттаҥ 515 мандат единоросстордыҥ. Олордоҥ аймак кеминде 79, јурт јеезе кеминде 408 депутат ла 28 јурт јеезелердиҥ јаандары – деп, республикан парламенттиҥ спикери айткан. –«Единая Россия» партия озо барып јаткан политический ийде-кӱч болуп јат ла ӱнбереечилердиҥ чын талдаш эткенине бӱдедим. Бистиҥ амадубыс – Алтай Республиканыҥ кажы ла кижизиниҥ јадын-јӱрӱмин јарандырарына иштеери болуп јат».

Алтай Республиканыҥ башчызыныҥ, «Единая Россия» партияныҥ тергеелик бӧлӱгиниҥ политсовединиҥ тӧргизиниҥ турчызы Александр Бердниковтыҥ адынаҥ республикан башкаруныҥ председателиниҥ баштапкы ордынчызы Наталья Екеева сӧс айткан. «Алтай Республикада јондык-политикалык ла јонјӱрӱм-экономикалык айалга турумкай болгоны кӧп сабада республикан башкаруныҥ ла «Единая Россия» политический партияныҥ ӧмӧ-јӧмӧ ижиниҥ шылтузы. Бӱгӱн «Единая Россия» республиканыҥ политический системазыныҥ тӧс элементи болуп јат» – деп, баштапкы вице-премьер айткан. Наталья Екееваныҥ шӱӱлтезиле, «Единая Россияныҥ» фракциязыныҥ депутаттарыныҥ тоозы кӧп болгоны партияга јаҥныҥ органдарыныҥ ижинде эрчимдӱ туружар, Алтай Республиканыҥ башкарузыла кожо президенттиҥ јарлаган ла эл-јонныҥ јадын-јӱрӱминиҥ чыҥдыйын бийиктедер Национальный ӱлекер-проекттерди јӱрӱмде бӱдӱрер арга берет. Партияныҥ ӱлекерлер аайынча ӧткӱрип турган ижи, бӱгӱнги кӱнге јетире јединген турулталар керегинде «Единая Россия» партияныҥ тергеелик бӧлӱгиниҥ качызыныҥ ӱлекер-проект иштер аайынча ордынчызы, Алтай Республиканыҥ депутады Константин Криворученко куучындаган. Ол партия бойына алынган молјулар аайынча он тӧрт ӱлекерди јӱрӱмде једимдӱ бӱдӱргенин темдектеген. Бу ӱлекерлердиҥ бастыразы ла јонјӱрӱмдик бӧлӱктиҥ курч сурактарына, ол тоодо ӱредӱликке, су-кадыкты корыырына, билимге ле культураныҥ ӧзӱмине, јерлерди јарандырып јазаарыныҥ аайына чыгарына ууламјылалганын темдектеген.

«Единая Россия» политический партияныҥ председатели Дмитрий Медведевтиҥ тергее-лик јондык приемныйыныҥ ижи керегинде оныҥ башкараачызы, Эл Курултайдыҥ јонјӱрӱмдик корулаш ла эл-јонныҥ су-кадыгын корыыры аайынча комитединиҥ председатели Наталья Никитенко айткан.

Конференцияныҥ делегаттары партияныҥ уставыныҥ некелтези аайынча тергеелик политсоветте јаҥырту-ротация ӧткӱрген. Јажытту ӱнберишле политсоветке «Единая Россияныҥ» Чойдогы бӧлӱгиниҥ качызы, Чой аймактыҥ депутаттар Совединиҥ председатели Зураб Колосов, партияныҥ Маймадагы бӧлӱгиниҥ качызы, Майма аймактыҥ администрациязыныҥ јааны Роман Птицын, Алтай Республикада иштиҥ государственный инспекциязыныҥ башкараачызы Эжер Ялбаков ло партияныҥ Чамалдагы бӧлӱгиниҥ качызы, Чамал аймактыҥ депутаттар Совединиҥ председатели Пантелей Яманов кийдирилген.

Конференцияныҥ делегаттары анайда ок «Единая Россия» политический партияныҥ Москвада ӧдӧтӧн XVIII съездинде туружатан делегатты талдагандар. Съездке партияныҥ Шабалиндеги бӧлӱгиниҥ качызы, Шабалин аймактыҥ јааны Эрчим Сарбашев барар. Партияныҥ бастырароссиялык съездинде анайда ок тергеениҥ башкараачылары ла айттыру алгандар туружар.

К. ЯШЕВ