Кӱч, jе кӱндӱлӱ иш

16.11.2018

Кӱчӱрген айдыҥ 9-чы кӱнинде П. В. Кучияктыҥ адыла адалган эл театрда Ичбойындагы керектер аайынча органдардыҥ ишчилериниҥ кӱнине учурлай кӧдӱриҥилӱ јуун ӧткӧн.

Ол кӱнде Алтай Республиканыҥ башчызы, башкарузыныҥ председатели Александр Бердников иш аайынча республиканыҥ тыштында командировкада болгон. Је башчы арга табып, јуунныҥ туружаачыларын видеоколбу ажыра уткыган.

Республиканыҥ башкараачызы ичбойындагы керектер аайынча органдардыҥ ветерандарын ла ишчилерин профессионал байрамыла уткып, олорго бӱдӱрип турган кӱч ле кӱндӱлӱ ижи учун быйан айткан. Ол ичбойындагы керектер аайынча органдардыҥ ижине бийик баа берип, олорды јаҥ корулаарында государствоныҥ иженчилӱ куйагы деп айткан. Башчы «Полицияныҥ органдарына тегин улус келбей јат. Мында бӱдӱрип јаткан керегине чындык улус иштейт. Полицияныҥ ижине Россия Федерацияныҥ Јуучыл Ийде-кӱчтериниҥ главнокомандующийи, Россияныҥ Президенти Владимир Путин јаан ајару эдип јат» — деп темдектеген.

Полицияныҥ ишчилерин олордыҥ профессионал байрамыла јербойындагы башкараачы органдардыҥ чыгартулу улузы база уткыган. Алтай Республиканыҥ башкарузыныҥ председателиниҥ ордынчызы Игорь Коршунов тергеениҥ эҥ артык полицейскийлерине кайралдар табыштырган. «Алтай Республиканыҥ јаҥ корулаар органдарыныҥ нерелӱ ишчизи» деген кӱндӱлӱ ат республиканыҥ ичбойындагы керектер аайынча министерствозыныҥ бӧлӱгиниҥ јааныныҥ ордынчызы, полицияныҥ полковниги Сергей Анкудиновко ло уголовный розысктыҥ башкартузыныҥ бӧлӱгиниҥ јааны, полицияныҥ подполковниги Андрей Шпрингерге адалган.

Бойыныҥ ижин ак-чек бӱдӱрип, јаҥ корулаар керекте јозокту иштеп турганы учун Алтай Республиканыҥ Кӱндӱлӱ грамотазыла ичбойындагы керектер аайынча министерствоныҥ поликлиниказыныҥ јааны, ичбойындагы службаныҥ майоры Римма Досмаилова ла полицияныҥ Улаган аймактагы бӧлӱгиниҥ участковыйы, полицияныҥ капитаны Евгений Сартаков кайралдаткандар. Алтай Республиканыҥ башчызыныҥ, башкарузыныҥ председателиниҥ Быйанду самараларын бистиҥ республика аайынча МВД-ныҥ участковый инспекторы Владимир Кыдатов, МВД-ныҥ Горно-Алтайсктагы бӧлӱгиниҥ аҥылу патрульно-постовой службазыныҥ взводыныҥ командири Геннадий Лыков, Россияныҥ МВД-зыныҥ Турачак аймактагы бӧлӱгинде јажы јетпеген балдардыҥ керектери аайынча иштеп турган баш участковый Аржан Очурдяпов, МВД-ныҥ Горно-Алтайсктагы бӧлӱгиниҥ патрульно-постовой службазыныҥ полицейскийи Бекбол Солтанов алгандар.

Алтай Республиканыҥ ичбойындагы керектер аайынча министри, полицияныҥ генерал-майоры Павел Гаврилин полицейскийлерди байрамла уткып, оныҥ башкарып турган службазына 2018 јылдыҥ тогус айыныҥ туркунына эл-јонноҥ 36536 баштану болгон деп айткан. Тергеениҥ ишкӱчиле јаткандары дезе јаҥ корулаар органдардыҥ ижин бийик баалап јадылар. Темдектеп айткадый керектер службада кӧп. Майма аймактыҥ полицейскийи иштеҥ бош ӧйдӧ тӧрт јашту уулчактыҥ јӱрӱмин аргадап алган. Турачак аймакта полицияныҥ бӧлӱгиниҥ ишчизи тӧрт кижиниҥ јӱрӱмин аргадаган. Аргадап алган улустыҥ экӱзи балдар болгонын аҥылап темдектеер керек. Министр бойыныҥ куучынында анайда ок тергеениҥ полицейскийлери каршулу керектердиҥ 74% ачып, олорды учына јетирип јат деп ајарган. Бу тоо текши Россия ичиндеги ле Сибирь федерал округтагы кӧргӱзӱлердеҥ канча катапка бийик. П. Гаврилинниҥ айтканыла, улустыҥ су-кадыгына ла јӱрӱмине эдилип турган каршулу керектерди коскорып, олорды илезине чыгарар иште кӧргӱзӱлер оноҥ бийик. Республикада эзирик тушта эдилип турган керектердиҥ ле байа бытовой дейтен бузуштардыҥ тоозы, алдындагызына кӧрӧ, чик јок астаган.

Министр Ада-Тӧрӧл учун Улу јууныҥ ветерандарына јаан быйанын айткан. Бӱгӱнги кӱнде ичбойындагы керектер аайынча органдарда иштегендердеҥ ӱч ле ветеран арткан. Олор: 95 јажын темдектеген Иван Федорович Пашков, Николай Захарович Долгов ло байрамга учурлай ӧдӱп јаткан кӧдӱриҥилӱ јуунда туружып јаткан Сергей Иванович Гончаров. Кӧдӱриҥиниҥ туружаачылары службазын ичбойындагы керектердиҥ органдарында ӧткӧн 39 јуучылдыҥ эземин кереестеп, бир минут ӧйгӧ унчукпазынаҥ тургандар.

Кӧдӱриҥилӱ јуунда уткуулду сӧстӧрин анайда ок тергеениҥ јаҥ корулаар ӧскӧ дӧ органдарыныҥ чыгартулу улузы айткан. Алтай Республиканыҥ Эл Курултайыныҥ вице-спикери Михаил Терехов полицияныҥ ишчилерин байрамла уткып, Эл Курултайдыҥ Быйанду самараларын полицияныҥ подполковниги Виктор Абраменкого, полицияныҥ майоры Наталья Дробышевага, полицияныҥ капитаны Петр Тандинге, полицияныҥ старший лейтенанты Эркин Тайтаковко, полицияныҥ капитаны Ренат Ямангуловко табыштырган.

П. КАБАР

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина