Сӱӱнедис, оморкойдыс!

16.11.2018

Кӱчӱрген айдыҥ 8-12 кӱндеринде Румынияныҥ тӧс калазы Бухарестте самболо телекейдиҥ чемпионады ӧткӧн. Јуучыл самбодо тартышкан јерлежис Родион АСКАНАКОВ бойыныҥ бескезинде јеҥӱчил болуп чыккан.

52 килограммга јетире бескеде тартышкан Родион финалда Арменияныҥ спортчызы Григор Мхитарянды јеҥген.

Бу маргаандарда 80 ороонноҥ 750 спортчы турушкан. Россияныҥ јуунты командазы 15 алтын, 4 мӧҥӱн ле 5 кӱлер медальдар ойноп алып, текшикомандалык зачетто баштапкы јерге чыккан. Экинчи јерде Грузияныҥ ла ӱчинчи јерде Беларусь Республиканыҥ командалары.

Родион Асканаков Россияныҥ нерелӱ тазыктыраачызы Геннадий Яйтаковто тазыктырынат. Бу учурлу маргаанда тазыктыраачызы Родионныҥ јанында болгон.

Телекейдиҥ чемпионын ла оныҥ тазыктыраачызын кӱчӱрген айдыҥ 13-чи кӱнинде республиканыҥ гран-кыйузында уткыгандар. Анда јуулган улустыҥ тоозында Родионныҥ јуук улузы, спортчылар ла јамылулар болгон. Олор јерлежиниҥ јаан једимине сӱӱнип, Родионго ло тазыктыраачызы Геннадий Яйтаковко кур курчап, алкыш сӧстӧрин айткан.

Телекейдиҥ чемпионадына баратан путевканы Родион Россияныҥ тулаан айда ӧткӧн чемпионадында јеҥӱчил болуп чыккан соҥында алган. Быјылгы сезондо јерлежис кӧп једимдерге јеткен деп айдар керек. Родион Францияныҥ тӧс калазында ӧткӧн «Гран-при Парижа-2018» деп албатылар ортодогы маргаанда јеҥӱчил болгон. Оны ээчий президенттиҥ кубогына ӧткӧн, кийнинеҥ «Кубок Байкала» деген албатылар ортодогы маргаандардыҥ јеҥӱчили болуп чыккан. Европаныҥ тулаан айда Афиныда ӧткӧн чемпионадына барарга виза алып болбогон спортчы Мухтар Гамзаевтиҥ ордына барып, ӱчинчи болгон.

Телекейдиҥ чемпионы – Родионныҥ эҥ бийик једими. Ол јаҥыс ла бу спортчыныҥ эмес, је анайда ок текши республикабыстыҥ јаан једими болуп јат. Јерлеш кӱрешчилеристеҥ мынаҥ озо ӧйдӧ телекейдиҥ чемпионы болуп Виталий Уин чыккан эди. Ол 2011 јылда Вильнюста ӧткӧн телекейлик маргаанда спортивный самболо бойыныҥ бескезинде баштапкы болгон.

Родион Асканаков јуучыл самболо эҥ бийик једимге јеткен баштапкы јерлежис болуп јат. Родионго 28 јаш. Ол Россияныҥ спортыныҥ узы, јуучыл самболо Россияныҥ чемпионадыныҥ эки катап јеҥӱчили, ӱч катап кӱлер призеры, Европаныҥ 2018 јылда ӧткӧн чемпионадыныҥ кӱлер призеры.

Родион спортко 2000 јылда келген. Баштап тарый грек-рим кӱрешле Геннадий Бачимовто тазыктырынган ла кӱрештиҥ бу бӱдӱмиле Россияныҥ спортыныҥ узына јеткен. Оогоштоҥ ала телекейдиҥ, Олимпий ойындардыҥ јеҥӱчили болорго амадаган Родионныҥ грек-рим кӱреште кӱрешкен бескезин јоголтып саларда, ол самбого кӧчкӧн лӧ амадузына јеткен. Родион Асканаковтыҥ фотојуругы каланыҥ эҥ артык спортчыларыныҥ Кӱндӱниҥ доскозында тургузылган.

Бис Родионды, оныҥ тазыктыраачыларын, текши республиканыҥ эл-јонын мындый јаан једимле уткыйдыс!

К. ЯШЕВ

Фотојурукта: Г. Яйтаков, Р. Асканаков, Г. Бачимов

Е. БУТУШЕВТИҤ фотојуругы

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым