Туулу Алтайдыҥ jаркынду jаҥарчызы

16.11.2018

Балдардыҥ республикан библиотеказында тоолу кӱндер кайра бичиичи, ӱлгерчи, јурукчы Лазарь Кокышевтиҥ чыкканынаҥ ала 85 јылдыгына учурлалган «Тӧрӧл јериниҥ кожоҥчызы» деп адалган маргаан каланыҥ школдорыныҥ ӱренчиктери ортодо ӧтти.

Балдардыҥ библиотеказы куран айда Л. Кокышевтиҥ чӱмдемелдерин эске кычырары аайынча маргаан јарлаган болгон. Мында ӧткӧн маргаанда каланыҥ 7-чи, 8-чи, 10-чы, 12-чи школдорынаҥ, «Гармония» деген 9-чы гимназиядаҥ, В. К. Плакастыҥ адыла адалган республикан гимназиядаҥ, коррекционный школ-интернаттаҥ одуска шыдар балдар эрчимдӱ туруштылар.

Маргаанда 4-5 ле јаан класстардыҥ ӱренчиктери калыктыҥ сӱӱген бичиичизиниҥ лирикалык ӱлгерлерин, кокыр кептӱ ле драмалык чӱмдемелдерин ӱч ууламјыла кычырдылар.

Маргаанныҥ жюризинде балдардыҥ библиотеказыныҥ чындык најылары РФ-тыҥ культуразыныҥ нерелӱ ишчизи, балдардыҥ «Солоҥы» журналыныҥ баш редакторы Кӱлер Тепуков, режиссер, АР-дыҥ санадыныҥ нерелӱ ишчизи Николай Паштаков, АР-дыҥ нерелӱ журнализи, радиожурналист Зинаида Торбокова, актер, АР-дыҥ нерелӱ артизи Игорь Тодошев, республикан чӱмдӱ бичик кепке базар «Алтын Туу» деп байзыҥ-јурттыҥ редакторы Сергей Торбоков ло жюриниҥ председатели балдардыҥ республикан библиотеказыныҥ јааны Айсулу Белекова болды.

Жюри маргаанныҥ туружаачылары сценада бойын јайым тудунары, ӱлгерди, кажы ла эрмекти, сӧсти чокым, јарт ӱниле аҥылап кычырары, јайаан иштиҥ тӧс учурын угаачыларга јетирери, айдылганын ӱренчик бӱткӱл бойынча кӧрӧр, сезер учурлу деген некелтеле башкарынды. Олор кажы ла баланыҥ ижин ајарулу уктылар. Балдарды мындый каруулу кӧдӱриҥиге ӱредӱчилери сӱреен јакшы белетеген. Кеп-кийимдери, таныштырулары тыҥытту болды. Маргаанда орус балдар база јилбиркеп турушты. Олор Лазарь Кокышевтиҥ јайаан чӱмдемелдерин орус ла алтай тилдерле кычырдылар.

«Тӧрӧл јериниҥ кожоҥчызы» деп маргаанныҥ јеҥӱчилдери болуп Екатерина Токоекова, Роман Маташев, Данияр Бакиянов, Евгений Гончаренко чыктылар. Жюри онойдо ок Слава Какаевти, Айана Айтпасованы, Айдомир Смаиловты темдектеди. Ончо туружаачылар ла јеҥӱчилдер Быйанду самараларла, грамоталарла, бичиктерле, тату сыйларла кайралдатты. Быйанду самаралар Акбар Кинеге, Айкеми Модоровага, Далана Кымындыновага, Карина Куюковага, Оля Ивановага, Рамиль Кужлековко, Изабелла Попошевага ла о. ӧ. табыштырылды.

Актер Игорь Тодошев тузалу мастер-класс ӧткӱрди. Ол чӱмдемел сӧслӧ таҥынаҥ бойына канайда иштеери јанынаҥ, ӱлгерди јаҥыс ла эске ӱренип, бир тынышла айдары эмес, је ӱлгерде айдылганын сӱр-кеберлер ажыра кӧргӱзерине таскаары јанынаҥ айтты. Качан сценага чыгып, эске кычырар тушта токынап, бир ле јер јаар кӧрӱп кычырар керек. Кӧс ары-бери «јӱгӱрзе», ајару јылыйар…

Лазарь Кокышевтиҥ чӱмдемелдерин кычырып, оныҥ телекейин бойына ачып, эске кычырып, кураа балдарла ӱлешкени база јаан једим деп, жюриниҥ турчылары темдектеди.

Маргаанныҥ туружаачылары Лазарь Кокышевтиҥ јайаандык ижи керегинде роликти, онойдо ок алтай мультиктерди јилбиркеп кӧрдилер. Алтай тилис Лазарь Кокышевтиҥ энчи байлыгыла ӱзӱлбес-туузылбас тизӱле улалат….

К. ПИЯНТИНОВА

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина