Алтайдын Чолмоны

Спортто једимдер

28.12.2018

2018 јыл Алтай Республикада Хоккейдиҥ јылы деп јарлалган болгон. Ол керегинде республиканыҥ башчызы А. Бердников јылдыҥ бажында Горно-Алтайскта «Спартак» стадиондо тергееде спорттыҥ кышкы бӱдӱмдериниҥ ачылтазы ӧдӧрдӧ јарлаган. Кӧдӱриҥилӱ ачылтада Россияныҥ президентиниҥ болушчызы, Россияныҥ Олимпий комитединиҥ вице-президенти Игорь Левитин ле Татарстан Республиканыҥ транспорт ло јолдор тудары аайынча министри Ленар Сафин турушкандар.

Хоккей аайынча республикан федерация 2008 јылда тӧзӧлгӧн. Бӱгӱнги кӱнде тергееде спорттыҥ бу бӱдӱмиле ӱч јӱске јуук кижи тазыктырынат. 150 бала школдордогы секцияларга јӱрет. Спортчылар «Тӱндеги хоккейдиҥ лигазында», Алтай крайдыҥ ачык маргаандарында, Алтай Республиканыҥ чемпионадында, Кубогы учун первенствозында, «Адамды, энемди ле хоккейди сӱӱйдим» деп билелик фестивальда эрчимдӱ туружадылар.

* * *

Кочкор айда Горно-Алтайскта 13-чи таҥмалу школдо Олимпий ойындардыҥ чемпионы Евдокия Мекшилого учурлалган кереес доско ачылган. Атту-чуулу спортчы бойыныҥ ӧйинде бу школдо ӱренген ле чаналу јӱгӱрерин мында баштаган. Кереес доско Алтай Республиканыҥ олимпий совединиҥ баштаҥкайыла ачылган.

* * *

Тӱгенип јаткан јылда туу-чананыҥ «Манјӱрек» деген комплексинде јаҥыртулу иштер  оноҥ ары улалган. Быјыл бу курортто «Россия Федерацияда ич ле тууразынаҥ туризмниҥ ӧзӱми» деген федерал программа аайынча јыҥылаар јерлерди карла искусственный эп-аргала јеткилдеери јанынаҥ элбек кемдӱ иштер ӧткӧн. ГЛК-ныҥ јыҥылаар јолдорыныҥ узуны 3405 метр, олор уур-кӱч јанынаҥ јажыл, чаҥкыр ла кызыл кемдӱ бӧлӱктердеҥ турат. «Манјӱректе» амыраган улус оныҥ ӱредӱ-тазыктыру јолдорын, беби-лифтти, сноу-паркты ла узуны 1050 метр јолды кӱӱнзегени аайынча тузаланадылар. ГЛК-да келер јуук ӧйдӧ бир ле уунда 4 муҥ кижи јадып амыраар айалга тӧзӧлӧр.

* * *

Кирилл Сеткин гребной слаломныҥ Новгородский областьта Окуловкадагы тӧс јеринде Россияныҥ Кубогы учун маргаандарда туружып, каное категорияда 98,80 секунд ӧй кӧргӱзип, јеҥӱчил болуп чыккан. Россияныҥ Кубогын ойноп алган јерлеш спортчыны  ороонныҥ јуунты командазыныҥ баш тазыктыраачызы Жан-Ив-Шетан јуунты командага алган.

* * *

2018 јылда алтай албатыныҥ эҥ ле сӱӱген байрамдарыныҥ бирӱзи Эл Ойынга туй ла одус јыл толгон. Ого учурлалган ээчиде ойындар  кичӱ изӱ айдыҥ 28-30 кӱндеринде Улаган аймактыҥ Межелик деген ӧзӧгинде ӧткӧн. Юбилейге учурлалган Эл Ойында јети јӱстеҥ ажыра спортчылар турушкан. Маргаандардыҥ кайралдары учун Россияныҥ спортыныҥ 31 узы, спорттыҥ телекейлик кемдӱ 4 узы ла Россияныҥ спортыныҥ нерелӱ бир узы тартышкан. Туружаачыныҥ бескези ајаруга алынбай турган  абсолютный дейтен кӱреш-маргаанда 28 бӧкӧ турушкан. Мында јеҥӱни республикан спортшколдыҥ тазыктыраачызы Андрей Томчук алган. Ого јепселдӱ чоокыр ат сыйлалган.

* * *

Куран айда Москваныҥ кыйузында турган Одинцово калада грек-рим кӱрешле Россияныҥ эр улус ортодогы чемпионады ӧткӧн. Бу чемпионатта Алтай Республиканыҥ нерелӱ тазыктыраачызы Геннадий Бачимовтыҥ ӱренчиги Баатыр Бултаев 55 килограм бескеде 3-чи јерге чыккан.

* * *

Кӱскиде Алтай Республиканыҥ физкультура ла спорт аайынча комитединиҥ јааны Заури Казакпаев Ульяновскто тоштыҥ «Волга-Спорт-Арена» деген ӧргӧӧзинде ӧткӧн «Россия спортивная держава» деп адалган јетинчи телекейлик форумныҥ ижинде турушкан. Форумныҥ туружаачыларына уткуулду сӧзиле ороонныҥ президенти В. Путин баштанган.

* * *

Кӱчӱрген айда јуучыл самболо Румынияда ӧткӧн телекейлик чемпионатта Россияныҥ спортыныҥ узы, Россияныҥ чемпионы, телекейлик кубоктыҥ јеҥӱчили Р. Асканаков алтын медаль ойноп алган. Бу бийик једим учун кӱрешчиниҥ тазыктыраачызы  М.  Яйтаков Алтай Республиканыҥ эҥ бийик кайралыла — «Таҥ Чолмон» орденле кайралдаткан. Р. Асканаковко «Алтай Республиканыҥ кӱндӱлӱ кижизи» деген  ат адалган ла квартира садып аларга бир миллион беш јӱс муҥ салковойдыҥ сертификады табыштырылган.

* * *

Тӱгенип јаткан айда Россияда самбоныҥ тӧзӧлгӧнинеҥ ала 80 јылдыгы темдектелген. Спорттыҥ бу бӱдӱми тергеебисте база јаан јол алынган. Јаҥар айда спортчылар Туулу Алтайда кӱрештиҥ бу бӱдӱминиҥ тӧзӧлгӧнинеҥ ала 55  јылдыгын база темдектегендер. Байрамга учурлай Горно-Алтайскта «Јиит спартакчы» спортзалда «Ӱредӱчи» деген јаҥжыккан турнир, П. В. Кучияктыҥ адыла адалган эл театрда кӧдӱриҥилӱ јуун ӧткӧн.

 П. КАБАР