Јаҥы кӧлӱктер табыштырылды

15.01.2019

Чаган айдыҥ 11-чи кӱнинде Горно-Алтайск калада Јеҥӱниҥ паркында Алтай Республиканыҥ башчызы Александр Бердников муниципалитеттердиҥ јаандарына, аймактардагы эмчиликтердиҥ ле ӱредӱликтиҥ башкартуларыныҥ башкараачыларына јаҥы 19 санитарный кӧлӱктиҥ ле 10 школьный автобустыҥ тӱлкӱӱрлерин табыштырган.

Тергеениҥ башчызыныҥ темдектегениле, бу кӧлӱктер улусты јеткер јогынаҥ ла јымжак тартар этире јепселген. Школьный автобустар ыраак јурттарда јаткан балдарга спорт маргаандарга, байрамдык ла ӧскӧ дӧ керек-јарактарга барар јакшынак арга берер. Санитарный кӧлӱктер ыраак ла једерге кӱч јурт јерлерге јӱрер аргалу.

«Бу Россияныҥ президенти Владимир Путинниҥ јурт јерде јаткан эл-јонныҥ јадын-јӱрӱминиҥ чыҥдыйын бийиктедери аайынча берген чике јакылтазын бӱдӱрерге эдилген база бир алтам болуп јат. Бу иш јаҥныҥ органдарыныҥ кыйалта јогынаҥ эдетен учурлу иштериниҥ бирӱзи. Бис кезик акчаны бюджеттиҥ чыгымдарыныҥ бир канча тизимдеринеҥ кымакайлап алганыс, транспорттыҥ кезигин республикан бюджеттиҥ акчазыла алганыс. Бӱгӱн кажы ла аймак эки-ӱч кӧлӱктеҥ алган» — деп, Александр Бердников темдектеген.

Санитарный кӧлӱктердеҥ он «Газель» ле тӧрт «УАЗ» федерал программа аайынча алылган болзо, база тӧртӱзи тергеениҥ башчызыныҥ ыраак јурттарда јаткан эл-јонло ӧткӱрген туштажуларыныҥ кийнинеҥ ӱзеери алылган. Ол туштажуларда эл-јонноҥ санитарный кӧлӱктер алып берзин деген баштанулар болгон.

Јаҥы транспортты Кӧксуу-Оозы, Кош-Агаш, Чой, Шабалин, Оҥдой, Турачак, Улаган, Чамал, Кан-Оозы аймактардыҥ эмчиликтери ле Катастрофалардыҥ медициназыныҥ тӧс јери алган.

Федерал ла республикан бюджеттердиҥ акчазына республикага баштапкы ла катап јорыктап јӱрер фельдшерско-акушерский пункт алылган. Ол Оҥдой аймактыҥ эмчилигине табыштырылган ла кичинек јурттар сайын иштеер.

Анайда ок Россияныҥ башкарузы Алтай Республикага балдар тартар 10 школьный автобус (јети «ПАЗ», бирдеҥ — «Форд Транзит», «КАвЗ», «Газель») чыгарган. Бу кӧлӱктерди Кош-Агашта В. И. Чаптыновтыҥ адыла адалган школ, Улаганныҥ баштамы школы, Кан-Оозы аймакта Јалаҥай-Бажында Ю. В. Антарадоновтыҥ адыла адалган школ, Оҥдойдо С. Т. Пекпеевтиҥ адыла адалган школ, Шабалинниҥ, Катандуныҥ, Талдуныҥ, Муны-Оозыныҥ, Дмитриевканыҥ ла Чопоштыҥ школдоры алган.

Адакыда тергеениҥ башкараачызы Александр Бердников тискинчилерге кӧлӱктерди чебер тузаланзын деп кӱӱнзеген.

К. ЯШЕВ

Е. БУТУШЕВТИҤ фотојуруктары

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина