Туулу Алтайдаҥ волонтерлор иштеер

26.02.2019

Россия бойыныҥ тӱӱкизинде мынаҥ озо Студенттердиҥ телекейлик кемдӱ универсиадазын качан да ӧткӱрбеген. Быјыл дезе Сибирьдиҥ эҥ јаан калаларыныҥ бирӱзине — Красноярскка андый арга келижип јат. Тоозыла 29-чы Универсиада Красноярскта тулаан айдыҥ 2-12 кӱндеринде ӧдӧр. Ого ӧскӧ ороондордоҥ кӧп делегациялар келери темдектелет. Телекейлик кемдӱ маргаандарды ӧткӱреринде волонтерлор база туружар. Туулу Алтайдаҥ ого беш кижи талдалган.

Кочкор айдыҥ 19-чы кӱнинде Алтай Республиканыҥ ӱредӱ ле билим аайынча министерствозында Студенттердиҥ Красноярскта ӧдӧтӧн телекейлик универсиадазында иштейтен волонтерлордыҥ турушканыла пресс-конференция ӧткӧн. Ӱредӱ ле билим аайынча министр Алексей Бондаренко јонјӱрӱмдик учурлу керектерде бойлорыныҥ кӱӱниле туружып турган волонтерлорды уткып, олор кандый кыймыгуда туружып ла кандый учурлу иш бӱдӱрип турганы керегинде куучындаган. Оныҥ айтканыла, универсиадада беш муҥнаҥ ас эмес волонтерлор иштеер. Маргаандарда бойлорыныҥ кӱӱниле иштеерге кӱӱнзеген јииттерге тӧзӧмӧл комитеттиҥ сайтында аҥылу анкета јарлалган. Кандидаттардыҥ регистрациязы бу сайтта 2018 јылдыҥ сыгын айыныҥ он сегизинчи кӱнине јетире ӧткӧн. Алтай Республикадаҥ анкетага карууларды 50 кижи берген. Регистрацияны дезе толо кеминде јӱк ле 15 јиит кижи ӧткӧн. Тӧзӧмӧл комитеттиҥ ишчилери олордыҥ бастыразын онлайн-куучынга кычырып, 15 кандидаттыҥ ортозынаҥ Универсиадага адакыда беш кижини талдап алгандар.

Студенттердиҥ телекейлик универсиадазында туружар ырыс Горно-Алтайсктагы госуниверситеттиҥ студенттери Серафима Бутенкого ло Эльнура Салмановага, ЦСКА-ныҥ Самарадагы филиалыныҥ спортчызы, сууда эжинер бӱдӱмдер аайынча Россияныҥ спортыныҥ узы Дмитрий Лошкаревко (бу јиит уул тургуза ӧйдӧ черӱде службазын Горно-Алтайскта ӧдӧт), ӱредӱлӱ-консультационный тӧс јердиҥ специализи Анастасия Ялбачевага ла ӧскӧ тилдердеҥ кӧчӱреечи Айгерим Осатаевага келишкен. Министр Алексей Бондаренко пресс-конференцияда јиит волонтерлорго сӧс берерде, олордыҥ кажызы ла кыскарта мынайда куучындагандар:

Серафима Бутенко: «Јарлалган анкетага карууларды берип, угузу бичигимди аткарып, каруузын энчикпей сакыгам. Талдаштарда јеҥгеҥ деген сӱӱнчилӱ табыш Јаҥы јылдыҥ алдында келген. Мен Универсиадада «Енисей» стадиондо мячту хоккейле болотон маргаандарда иштеерим. Ажындыра билеримле, анда уулдар ла кыстар ортодо командалар ойноор. Олорло туштажуларды энчикпей сакып турум».

Дмитрий Лошкарев: «Мен Красноярскта ӧдӧтӧн Кышкы универсиада керегинде баштапкы ла катап 2017 јылда Казахстанда болгон Универсиадада волонтер болуп турала уккам. Ол тушта Алма-Атыда «Универсиада-2019» деп адалган кийис айыл тудулган. Бир кӱн мен ого кирип јӱргем. Анда иштеп турган волонтерлорло танышкам. Анда иштеген ачык-јарык кӱӱндӱ јииттер меге јараган. Удабас Красноярскта ӧдӧтӧн Универсиадага конкурс јарлалар, арга-чыдалыҥды ченеп кӧр дешкен. Јайгыда тӧзӧмӧл комитетке угузу бичик аткаргам. Конкурсты јеҥӱлӱ ӧдӧримде, мени кӧрӧӧчилердиҥ трибуназында иштеер эдип кӧстӧгӧндӧр. Оныҥ кийнинде ӱредӱ ӧткӧм. Профсменада бисти кӧрӧӧчилерле канайда иштеерине, олордыҥ кӱӱн-санаазын канайып кӧдӱрерине ӱредип таскаткандар. Је быјыл кышкыда маргаандардыҥ тӧзӧӧчилери мени ӧскӧ стадионго кӧчӱрер шӱӱлте эткендер. Меге јӧпсинерге келишкен. Красноярскта бойымды туу-чананыҥ бӱдӱмдериниҥ бирӱзинде ченеп кӧрӧргӧ турум. Универсиадада волонтер болуп, «Сопка» деп кластерде фристайлда иштеерим».

Эльнура Салманова: «Мен тургуза ӧйдӧ эки јерде ӱренип турум. ГАГУ-ныҥ физкультура аайынча факультединиҥ туризм аайынча бӧлӱгинде заочно, М. З. Гнездиловтыҥ адыла адалган политехнический техникумда дезе очный бӧлӱкте ӱренедим. Красноярскта Универсиадада волонтер болуп туружатан ченемелим мениҥ туризм аайынча курсовой реферадыма јаан јӧмӧлтӧлӱ болор деп сананып турум. Студенттердиҥ маргаандарыныҥ тӧзӧмӧл комитедине угузу бичигимди туку јайгыда аткарган болгом. Ырызым тарткан болбой. Универсиадада Серафимала кожо «Енисей» деп стадиондо кожо иштеерис».

Айгерим Осатаева: «Мен бойыныҥ ӧйинде Томсктогы госуниверситетти ӱренип божотком. Менде кыдат ла английский тилдердеҥ кӧчӱрер јаан ченемел бар. 2014 јылда Сочиде ӧткӧн Олимпий ойындарда волонтер болуп иштеерге сӱрекей тыҥ кӱӱнзегем. Је конкурсты ӧдӱп болбогом. Телекейлик кемдӱ кандый бир маргаандарда, симпозиумдарда ол эмезе туштажуларда волонтер болуп туружар кӱӱним ӧчпӧгӧн. Красноярскта болотон Универсиадага угузу бичигимди озо баштап спорт аайынча волонтерго бичиген болгом. Онлайн ажыра ӧткӧн эрмек-куучында английский тилле текстти јакшы табыштыргам. Красноярскта ӧскӧ ороондордоҥ келген делегацияларды уткыырында туружып, кӧчӱреечи болорым. Анайда ок спортчылар јадатан деремнеде иштеерим».

Алтай Республикадаҥ Студенттердиҥ телекейлик универсиадазында иштейтен волонтерлор Красноярск јаар кочкор айдыҥ 23-чи кӱнинде атангандар. Олор анда алты кӱнниҥ туркунына ӱредӱ ӧдӧр. Тулаан айдыҥ 2-12 кӱндеринде дезе спорттыҥ јаан байрамын ӧткӱреринде туружар. Олордыҥ ӱредӱзин ле јадар јерин Универсиаданыҥ генеральный спонсор-јӧмӧӧчизи «Норникель» компания јеткилдеер. Волонтерлордыҥ ары-бери јӱрген акчазын Алтай Республиканыҥ башкарузы тӧлӧп јат.

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина