«Единая Россия» талдаштарга белетенет

05.03.2019

«Единая Россия» партияныҥ озолодо талдаштары быјыл кӱӱк айдыҥ 26-чы кӱнинде ӧдӧр.

Ого белетеништиҥ сурактары партияныҥ тергеелик бӧлӱгиниҥ озолодо талдаштар ӧткӱрери аайынча тӧзӧмӧл комитединиҥ кочкор айдыҥ 25-чи кӱнинде ӧткӧн јуунында кӧрӱлген. Быјыл сыгын айда Эл Курултайдыҥ ээчий тудуузыныҥ депутаттарын тудар талдаштар ӧдӧр. Ондо «Единая Россиядаҥ» туружатан кандидаттар партияныҥ озолодо ӧткӱрген талдаштарында талдалып јарталар.

«Единая Россияныҥ» озолодо талдаштары республикада баштапкы катап эмес ӧдӱп јат, оныҥ учун ондо туружарга кӱӱнзегендер ас эмес болоры иле – деп, партияныҥ тергеелик бӧлӱгиниҥ качызы, Алтай Республиканыҥ парламентиниҥ спикери Владимир Тюлентин айткан. – Озолодо талдаштар баштапкы, ачык бӱдӱм аайынча ӧдӧр. Олор канча ла кире ачык, ончо улуска јарт ла кандидаттар ортодо тартыжу бийик эрчимдӱ ле ак-чек ӧдӧр учурлу».

Тӧзӧмӧл комитеттиҥ чыдуларына озолодо талдаштарда туружарга кӱӱнзегендердеҥ документтер алары ла келген улуска јарт эмес болгон сурактарды јартаары, регистрация керегинде јӧп чыгарары, чоттоор камыстар тӧзӧӧри, кандидаттардыҥ дебаттарын, туштажуларын белетеери ле ӧткӱрери, анайда ок талдаштардыҥ турулталарын эдери кирип јат деп, Владимир Тюлентин темдектеген.

Партияныҥ тергеелик бӧлӱгиниҥ бӱдӱреечи комитединиҥ башкараачызыныҥ баштапкы ордынчызы, тӧзӧмӧл комитеттиҥ турчызы Татьяна Щеголькова јуунда озолодо талдаштардыҥ ӧдӧр аайын јартаган. Онойдо, кандидаттарды кӧстӧӧри кочкор айдыҥ 25-чи кӱнинде башталган. «Единая Россияныҥ» турчылары да, јӧмӧӧчилери де, анайда ок кандый да партияга кирбей турган граждандар озолодо талдаштарда кандидат болуп туружар аргалу.

Озолодо талдаштарда туружарга кӱӱнзегендер партияныҥ тергеелик тӧзӧмӧл комитедине угузу бичигин ле керектӱ документтерди, ол тоодо паспортын, ӱредӱзин керелеген бичикти ле јаргылатпаганы керегинде справканы экелер учурлу. Документтер «Единая Россияныҥ» тергеелик бӧлӱги иштеген јерде (адрези Горно-Алтайск кала, Чорос-Гуркинниҥ оромы, 36-чы тура; тел. (38822) 2-51-84) понедельниктеҥ ала пятницага јетире 10.00 сааттаҥ ала 17.00 саатка јетире алылып јат.

Кандидаттарды кӧстӧӧри кандык айдыҥ 30-чы кӱнине јетире ӧдӧр лӧ оноҥ кӱӱк айдыҥ ортозына јетире кандидаттар ортодо дебат-тартыжулар ӧдӧри темдектелген.

Кӱӱк айдыҥ 26-чы кӱнинде ӱн берер участокко келер аргазы јок улус ӱнин озолодо, кӱӱк айдыҥ 20-24-чи кӱндеринде электрон эп-аргала берер аргалу. «Јараган кандидат учун ӱнин электрон эп-аргала берерге госјеткилдештиҥ федерал порталында озолодо регистрация ӧдӧр керек. Бир кижиге ӱнин эки катап берер арга бар» – деп, партияныҥ тергеелик бӱдӱреечи комитединиҥ башкараачызы Эмиль Тюхтенев јуунда темдектеген.

18 јажы кӱскиде ӱнбериштиҥ бирлик кӱнине јетире толо берер, эм тургуза 17 јашту јииттер озолодо талдаштарда база туружар аргалу.

«Единая Россия» партияныҥ кӱӱк айда ӧткӱрген озолодо талдаштарыныҥ турулталарыла Алтай Республиканыҥ Эл Курултайына депутаттар тудар талдаштарда бу партиядаҥ туружатан кандидаттардыҥ тооломы тургузылар.

«ПолитСтартап» – јиит политиктер белетеер ӱлекер

«Единая Россия» партияныҥ јаантайын иштеген база бир ӱлекери «ПолитСтартап» деп адалат. Ол тергеениҥ јон-политикалык јӱрӱминде бойын ченеерге кӱӱнзеген, јӱрӱмде эрчимдӱ кӱӱндӱ 35 јашка јетире јиит улуска учурлалган.

«ПолитСтартап» – партияныҥ озолодо ӧткӱрген талдаштарыныҥ айрылбас бӧлӱги болуп јат. Бу ӱлекерде туружарга кӱӱнзеген јиит улус «ПолитСтартаптыҥ» сайтында бойын темдектеер учурлу. Регистрация кочкор айдыҥ 13-чи кӱнинеҥ ала ачылган. Кандидат болорго кӱӱнзеген улуска керектӱ документтерди јууп, тӧзӧмӧл комитетке, ол партияныҥ тергеелик офизинде иштеп јат, табыштырар керек.

Партия ӱлекерде турушкандарга бойын озолодо ӱнбериштиҥ кандидады ла кандидаттыҥ политехнологы болуп, ченеп кӧрӧр арга берип јат.

Регистрацияны једимдӱ ӧткӧн кандидаттар талдаачы кампанияларды ӧткӱрери аайынча билгирлерди заочный ла очный бӱдӱмле алар аргалу болор. Олорго партияныҥ тергеелик бӧлӱгиниҥ эҥ тоомјылу турчылары, эҥ артык туружаачыларга дезе федерал болушчылар болуш эдер.

«ПолитСтартап» ӱлекердиҥ озолодо талдаштарда јеҥӱ алган туружаачылары Эл Курултайга депутаттар тудар талдаштарда партияныҥ кандитаттарыныҥ тооломына кирер ле талдаачы кампаниязын ӧткӱрерге технологиялык јӧмӧлтӧ алар.

Партияныҥ «ПолитСтартап» деген ӱлекери 2018 јылда ороонныҥ 24 тергеелеринде, администрациялык тӧс јерлердиҥ чыгартулу јаҥыныҥ ла тергеелик парламенттердиҥ депутаттарын тудар талдаштарда ченелген. «Единая Россияныҥ» озолодо ӧткӱрген талдаштарында 1600 јиит кижи турушкан, олордоҥ кажы ла алтынчы јиит кандидат депутатка тудулган.

Бистиҥ тергееде ӱлекер иштеп баштаган баштапкы неделеде 28 јиит кижи партияныҥ озолодо талдаштарында туружарга регистрация ӧткӧн. «Јиит гвардияныҥ» республикадагы бӧлӱгиниҥ башкараачызы Роман Гордеевтиҥ айтканыла, «ПолитСтартап» ӱлекерле таныштыру јуук ӧйдӧ ӱредӱлик учреждениелерде, иштеер ӧмӧликтерде, республиканыҥ аймактарында ӧдӧри темдектелет.

Светлана КЫДЫЕВА

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина