Алтайдын Чолмоны

Кажы ла ӱренчик јайалталу

12.03.2019

Балдардыҥ ӱзеери ӱредӱзиниҥ республикан тӧс јеринде ӧткӧн неделеде «Јылдыҥ ӱренчиги-2019» деп республикан конкурс ӧтти. Мында текши тоозыла 32 ӱренчик ортодо ӧткӧн маргаандарда эҥ артыктарыныҥ ады-јолы адалды.

«Јылдыҥ ӱренчиги-2019» деп республикан конкурста аймактарда ӧткӧн конкурстардыҥ јеҥӱчилдери турушкан. Маргаанда турушкан балдар јажы аайынча ӱч бӧлӱкке бӧлинген: оогош (4-5 класстар), орто (6-8 класстар), јаан (9-10 класстар).

Конкурс-маргаанга туружарга келген балдарды Алтай Республиканыҥ ӱредӱ ле билим аайынча министриниҥ ордынчызы Елена Дадочкина, конкурстыҥ камызыныҥ председатели Елена Кудрявцева уткыган.

Эки кӱнниҥ туркунына ӧткӧн маргаандарда ӱренчиктер бойлорыныҥ билерин, узын, тапкырын башка-башка бӱдӱмдерде кӧргӱскен. Конкурс-маргаан «Мениҥ јӱрӱмимниҥ бир кӱни» деп презентация-таныштырудаҥ башталган. Айылдыҥ ижи «Лэпбук «Профессиялар керегинде јилбилӱ» деп тема аайынча болгон. «Тӧрӧлим мениҥ элбек», «Ачык эрмек-куучын», «Портфолио», мастер-класс деп конкурстыҥ бӧлӱктери ӱренчиктердиҥ јайаандыгын бастыра јанынаҥ баалап кӧрӧрине јарамыкту болды.

Туружаачылар ортодо тартыжу кызу болгон деп айдарга јараар. Ӱренчиктер бу маргаандарга сӱрекей јазап белетенген. Олор јӱзӱн-јӱӱр эп-аргаларла, јепселдерле тузаланып билерин бийик кеминде кӧргӱстилер. Оныҥ да учун жюриниҥ турчыларына ӱренчиктердиҥ эҥ артыгын талдап алары кӱчке келишкен болор.

Маргаандардыҥ туружаачыларын  Алтай Республиканыҥ ӱредӱ ле билим аайынча министриниҥ ордынчызы Елена Дадочкина конкурстыҥ тӱгенгениле уткып, олорго јылу баштанган: «Бӱгӱн слер ончогор сӱрекей сӱӱнчилӱ кӱӱн-санаалу, кече ле бу конкурска санааркаганар чек болбогондый. Бу конкурста јеҥдирткен улус јок. Слер мында кӧп балдарла таныжып, нӧкӧрлӧр табып алганар. Мынызы сӱрекей учурлу». Ол јаан быйанын ӱренчиктердиҥ эне-адаларына, ӱредӱчилерине, класстыҥ башкараачыларына, школдордыҥ директорлорына, жюриниҥ турчыларына айткан.

«Јылдыҥ ӱренчиги-2019» конкурс-маргаанныҥ уч-турулталарында бӧлӱктер сайын эҥ артык иштер аҥылу дипломдорло темдектелген. Эҥ јакшы бойын кӧргӱскен туружаачылар конкурстыҥ башка-башка номинацияларында кайралдаткан.

Мастер-класс деп бӧлӱкте Купава Волкова (Иогачтыҥ школы),  Алина Кучуганова (Майманыҥ 3-чи школы), Камила Туйденова (Экинурдыҥ школы) лауреаттыҥ дипломдорыла кайралдаткан.

«Портфолио» деп номинацияда эҥ артык иштериле Виктория Баженова (РКЛ), Арина Кушерова (РКЛ), Амира Матаева (Л. И. Тюкованыҥ адыла адалган Кош-Агаштыҥ школы) темдектелген.

«Тӧрӧлим мениҥ элбек» деп бӧлӱкте Данил Новоселов (Каракокшоныҥ школы), Елизавета Ничкова (Верх-Уймонныҥ школы) ла Валентина Шпиляева (Кӧксуу-Оозыныҥ школы) эҥ артыктары болуп лауреаттыҥ дипломдорын алдылар.

«Ачык эрмек-куучында» билгирлерин эҥ јакшы кӧргӱскени учун Сӱмер Унутовко (Шабалинниҥ школы), Милена Тонжераковага (РГ), Аруна Шикаковага (РГ) дипломдор табыштырылган.

Айылдыҥ ижи «Лэпбук. Профессиялар керегинде јилбилӱ» деп бӧлӱкте эҥ артыктары Арсений Манышев (3-чи гимназия), Владимир Зорин (Акјолдыҥ школы), Василий Уткин (Г. К. Жуковтыҥ адыла адалган школ-интернат) болгондор.

«Мениҥ јӱрӱмимниҥ бир кӱни» деп презентация кӧрӱниҥ лауреаттары болуп Рустам Челчушев (Улаганныҥ баштамы школы), Сергей Алтайчинов (Г. К. Жуковтыҥ адыла адалган школ-интернат), Алина Пугачева (3-чи гимназия) чыкты.

Эҥ учында јеҥӱчилдер ле призерлор јарлалды. Олордыҥ ады-јолы тӧмӧн берилет.

Оогош ӱренчиктердиҥ бӧлӱгинде:

1-кы јерде – Сӱмер Унутов (4-чи класс, Л. В. Кокышевтиҥ адыла адалган Шабалинниҥ школы);

2-чи јерде – Арсений Манышев (4-чи класс, Горно-Алтайсктыҥ 3-чи гимназиязы);

3-чи јерде – Амира Матаева (4-чи класс, Л. И. Тюкованыҥ адыла адалган Кош-Агаштыҥ школы).

Орто јашту ӱренчиктердиҥ бӧлӱгинде:

1-кы јерде – Федор Зяблицкий (Горно-Алтайсктыҥ 12-чи школы);

2-чи јерде – Данил Новоселов (7-чи класс, С. В. Тартыковтыҥ адыла адалган Каракокшоныҥ школы);

3-чи јерде – Данил Исмаилов (8-чи класс, Ч. К. Кыдрашевтиҥ адыла адалган Кан-Оозыныҥ школы).

Јаан ӱренчиктердиҥ бӧлӱгинде:

1-кы јерде – Илья Наговицын (10-чы класс, Ыныргыныҥ школы);

2-чи јерде – Алина Пугачева (10-чы класс, Горно-Алтайсктыҥ 3-чи гимназиязы);

3-чи јерде – Алина Кучуганова (В. Ф. Хохолковтыҥ адыла адалган Майманыҥ 3-чи школы).

«Јылдыҥ ӱренчиги-2019» конкурс-маргаанныҥ јеҥӱчилдери 1-кы степеньдӱ дипломло, јымжак ойынчык сыйларла, ого ӱзеери кажы ла бӧлӱктиҥ јеҥӱчили аҥылу сыйларла кайралдаткан.  Онойып, эҥ оогош јеҥӱчил Сӱмер Унутов Москва калада ӧдӧтӧн Президенттиҥ ёлказына баратан јол-јорыкка путёвкала сыйлаткан. Орто јашту јылдыҥ ӱренчигине Федор Зяблицкийге Алтай Республиканыҥ башкараачызыныҥ ёлказына барар ла П. Л. Казанцевтиҥ стипендиязын алар арга берилди. Јеҥӱчил болуп чыккан Илья Наговицын бистиҥ республиканыҥ адынаҥ Ульяновск калада болотон текшироссиялык конкурста туружар. Ол онойдо ок Алтай Республиканыҥ башчызыныҥ премиязына јӧптӧлӧр аргалу.

Конкурс-маргаанныҥ јеҥӱчилдери болуп ончо уулчактар чыкканы сӱрекей оморкодулу. Олор кайралдар табыштырылган кийнинде бойыныҥ адынаҥ кӱӱн-санааларын ачык айдып, ӱредӱчилерине, жюриниҥ турчыларына, эне-адаларына јаан быйанын јетирдилер. Онойдо ок олор ӱредӱчилерин келип јаткан Ӱй улустыҥ байрамыла уткыды.

Быјыл болотон текшироссиялык конкурста бистиҥ јеҥӱчилис, јылдыҥ ӱренчиги Ильяга ачык јолдор, јаан једимдерге јетсин, республикабыстыҥ адын  бийик кӧдӱрип апарзын деп  кӱӱнзеп јадыбыс.

С. АБЫСОВА