Лицей М. В. Карамаевтиҥ адыла адалган

15.03.2019

Горно-Алтайск калада 1-кы таҥмалу лицейге Туулу Алтайдыҥ јарлу государстволык ла политикалык ишчизи Михаил Васильевич Карамаевтиҥ ады адалганы керегинде кереес досконыҥ ачылтазы бу кӱндерде ӧтти.

Кӧдӱриҥини ачып, Горно-Алтайсктыҥ мэри Виктор Нечаев бу школ каланыҥ тӱӱкизинде јаантайын эҥ артык школдордыҥ бирӱзи, тӧрӧл јериниҥ ӧзӱмине јаан камаанын јетирген Михаил Васильевичтиҥ балдарыныҥ салымы оныла бек колбуда болгонын темдектеди.

АР-дыҥ башкарузыныҥ председателиниҥ баштапкы ордынчызы Наталья Екеева кереес досконыҥ ачылтазына јуулгандарга, школдыҥ ӱренчиктерине ле ӱредӱчилерине тергеениҥ башчызы, башкарузыныҥ председатели Александр Бердниковтыҥ, башкаруныҥ адынаҥ баштанды. Наталья Михайловна оныҥ ӱренген бу тӧрӧл школы ӧткӧн јылда 90 јылдыгын темдектеп, эмди дезе лицей кемине једип, М. В. Карамаевтиҥ адыла адалганы јолду болгонын темдектеди. Михаил Васильевич текши ороонын, кичӱ Тӧрӧлин, калазын акту сӱӱп ле бастыра ижин олорго учурлаган. Ол иштеген ӧйдӧ Горно-Алтайскта Јеҥӱниҥ паркындагы Мактыҥ кереези, эмчиликтиҥ калачагы, эл театр, эл музей, Коммунистический проспект ле оноҥ до ӧскӧ кӧп объекттер тудулган ла јарандырылган. Ол тоодо 1965 јылда Горно-Алтайскта 1-кы таҥмалу школдыҥ (эмди 1-кы таҥмалу лицей) туразы тузаланышка табыштырылганы темдектелди.

Н. Екеева: «Биске, Михаил Васильевичтиҥ ӱч балазына ла тӧрт барказына, бу школ тӧрӧл школыс болуп јат. Ончобыс бу школды ӱренип божотконыс. Эмди ол биске оноҥ до јуук ла кару болуп калды. Бу школ оны божоткон балдарыла јарлу. Бӱгӱн де АР-дыҥ башкарузында башкараачы иште иштеп турган ӱч кижи 1-кы таҥмалу школды божоткон улус. Кару балдар, слерде оморкоор јаандарар бар. Слер бойоор до бу школдыҥ адын бийик кӧдӱрип, келер ӧйдӧ улу орооныстыҥ тоомјылу граждандары болорыгарга алаҥзыбай турум». Онойдо ок Наталья Михайловна лицейдиҥ музейине М. В. Карамаевтиҥ јӱрӱмине ле ижине учурлалган кӧмзӧ-документтер сый эдип берилерин темдектеди.

Ӱренчиктерди ле ӱредӱчилерди баштапкы таҥмалу школ лицей деп адалганыла, оны М. В. Карамаевтиҥ адыла адаганыла АР-дыҥ Эл Курултайыныҥ комитединиҥ јааны В. Уханов уткыды. Тергеебистиҥ школдоры — Тӧрӧлистиҥ келер ӧйиниҥ тӧзӧлгӧзи. Олор тоомјылу, ат-нерелӱ јерлештеристиҥ ады-јолдорыла адалып турганы јакшынак јаҥжыгу болуп баратканын ол темдектеди.

Кереес досконы Наталья Екеева ла каланыҥ администрациязыныҥ јааны Ольга Сафронова кӧдӱриҥилӱ айалгада ачтылар.

Оноҥ ээчиде сӧс ӱредӱлик иштиҥ ветераны, РСФСР-дыҥ нерелӱ ӱредӱчизи Александра Васильевна Таушкановага берилди. Тоомјылу ӱредӱчи јуулгандарга Михаил Васильевичле танышканы, оныҥ билези, бала-барказы, тӧрӧл јерине учурлу ижи, бу школло колбузы, ого болушканы керегинде јилбилӱ куучындап, М. Карамаев чындап та албатылык, кижиге кӱӱндӱ депутат болгонын темдектеди.

Эмдиги ӧйдиҥ јиит ӱйезиниҥ адынаҥ 10-чы класстыҥ ӱренчиги, балдардыҥ «Лидер и команда» деген јондык биригӱзиниҥ јааны Екатерина Мокасеева А. Таушканованыҥ јакылтазына каруу берип, јуулгандардыҥ алдына тоомјылу јерлежистиҥ адын јиит ӱйе бийик кӧдӱрип јӱрер деп чертенди.

Э. КУДАЧИНА

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина