Удурумга башчы Кош-Агаш аймакта болгон

07.05.2019

Алтай Республиканыҥ башчызыныҥ молјуларын удурумга бӱдӱрип турган Олег Хорохордин Кош-Агаш аймакла ӧткӧн јол-јорыгында Тӧбӧлӧр јуртта база болгон.

Анда ол јербойыныҥ улузыла эл-јонды чыҥдый ичер суула јеткилдеериниҥ сурагын шӱӱшкен ле социальный объекттердиҥ айалгазын кӧргӧн.

«Бу јурттыҥ эл-јоныныҥ тӧс курч сурактарыныҥ бирӱзи – ичип турган сууныҥ чыҥдыйы јабыс болгоны. Мен андагы скважинага барып јӱргем, улусла куучындашкам. Андагы суу некелтелерге келишпейт. Оныҥ да учун јаҥы скважина казар керек. Бу ишти ӧткӱрерге кайда да 6-10 миллион салковой керек дежет. Иштиҥ сметный баазын шиҥдезин деген јакару бергем. Айса болзо, оныҥ баазы бийиктедилген. Скважинаныҥ гарантийный јеткилдежиниҥ айалгаларын ла ӧйин чокымдап ла темдектеп алатан ишти база эдер керек» — деп, Олег Хорохордин айткан.

Ол анайда ок јуртта бир муҥга јуук кижи јуртап јатканын темдектеп, бу сурактыҥ аайына тӱрген чыгар керек деген.

Алтай Республиканыҥ башчызыныҥ молјуларын удурумга бӱдӱреечи О. Хорохордин Тӧбӧлӧрдиҥ школында, бу ла школдо балдардыҥ сады бар, јурттыҥ врачебный амбулаториязында болгон. Быјыл Тӧбӧлӧрдӧ 7 миллион салковойго ФАП тудары темдектелген, је ол акча-манат кайдаҥ чыгарылатаны эмдиге јарт јок. «Мен бюджеттиҥ бастыра аргаларын шиҥдеп, бу медучреждениени тудуп баштаар ӧйди чокымдаары аайынча јакару бергем» — деп, Олег Хорохордин айткан.

Ол Јаҥы Белтирде јербойыныҥ эл-јоныла туштажып, тудулып јаткан Культураныҥ туразын кӧргӧн. 2003 јылда болгон јерсилкиништиҥ кийнинде тудулган јуртта Культураныҥ туразы болбогон, оны планировкага кийдирбегендер. Оныҥ да учун мынаҥ озо јылдарда Јаҥы Белтирдиҥ јайаан ӧмӧликтери арендовать эдип турган кыптарда иштеген.

150 кижиге келиштирте чоттолгон Культураныҥ туразын тудар иштер ӧткӧн јылда башталган. Федерал ла тергеелик бюджеттердеҥ 1,6 миллион салковой чыгарылган. Бу акчага котлован казылган ла фундамент салынган.

«Бу объект «Культура» деп национальный ӱлекер аайынча иштеп турган «Культурная среда» деген федерал ӱлекерге кирген. Быјыл Алтай Республикага 10,776 миллион салковой акча чыгарылган. Бу акчага объекттиҥ стенелери кӧдӱрилер, полы ла јабынтызы салынар. Тудум иштер келер јылда тӱгенер. Бис иштердиҥ чыҥдыйын ла бӱдӱрер ӧйин шиҥжӱде тударыс» — деп, Олег Хорохордин айткан.

Алтай Республиканыҥ башчызыныҥ молјуларын удурумга бӱдӱреечи анайда ок јурттыҥ эл-јоныла куучындашкан. Педагогтор кыш ӧйинде балдардыҥ садында соок болуп турганына, школдыҥ полдорыныҥ айалгазы коомой болгонына комыдагандар. Олег Хорохордин сурактыҥ аайына чыгарга, бу объекттер аайынча документацияларды берзин деп сураган. Анайып, документация шиҥделип, чокым шӱӱлтелер эдилер.

Кош-Агаш аймакла ӧткӧн јол-јорыгында Олег Хорохордин муниципал тӧзӧлмӧниҥ активиле: јурт јеезелердиҥ башчыларыла, депутаттарла, учреждениелердиҥ башкараачыларыла, јондыктыҥ чыгартулу улузыла туштажу ӧткӱрген.

Туштажуга келген улус ӱредӱчилердиҥ ижиниҥ тӧлӧмирлериниҥ јаҥы системазыныҥ, сугарар системаны тузаланарга табыштырарыныҥ, казах тилге ӱредериниҥ, јолдор јазаарыныҥ, таштанчылардыҥ сурактарын ла оноҥ до ӧскӧ сурактарды кӧдӱрген.

Аймактыҥ тӧс јуртына озо ло баштап керектӱ болуп турган объект деп, Культураныҥ туразы адалган. Кош-Агашта ДК кайда да он беш јыл кайра кӱйӱп калган. Оноҥ бери бастыра учурлу культуралык керек-јарактар келиштире јазалган кыпта ӧткӱрилет. Эл-јон јаҥы клубты тудуп баштаар керек деп айдыжат. Олег Хорохордин олорло јӧпсинген. «Кош-Агаштый 11 муҥ кижи јуртап јаткан јуртка клуб керек. Проектный документацияны белетеп, тудум иштердиҥ планына кийдирер керек» —деп, ол айткан.

Олег Хорохордин анайда ок В. И. Чаптыновтыҥ адыла адалган школго барып јӱрген. Тургуза ӧйдӧ бу объекттиҥ пищеблогында, спортзалында јазашту иштер ӧткӱрер керек. Школдыҥ туразыныҥ јабынтызы ла электропроводказы база солылар учурлу. Аймактыҥ башчызы Серикжан Кыдырбаевке керектӱ чоттомолдорды белетеп, бу сурактыҥ аайына чыгатан тӱп-шӱӱлтелерди ууламјылазын деген шӱӱлте эдилген.

О. Хорохордин Кош-Агаш аймактыҥ эмчилигинде база болуп, оныҥ ижин јакшы деп темдектеген.

Алтай Республиканыҥ башчызыныҥ молјуларын удурумга бӱдӱреечи Тошоҥтыда Алтайский таможняныҥ таможенный постына јетире барып, оныҥ ижиле танышкан. Анайда ок ол погранкомендатурада болгон ло пограничниктердиҥ службазыныҥ айалгаларын кӧргӧн.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина