Олег Хорохордин јууныҥ ветераныла тушташкан

14.05.2019

Алтай Республиканыҥ башчызыныҥ молјуларын удурумга бӱдӱрип турган Олег Хорохордин Јеҥӱниҥ кӱни алдында Ада-Тӧрӧл учун Улу јууныҥ ветераны Мария Ивановна Ждановага барып, оны бу байрамла уткыган.

«Кош-Агаш аймакта болгон јеткер керегинде јетирӱ јӱрӱмниҥ кандый бортык болгонын ла бой-бойысты чеберлеп јӱрер керек болгонын биске такып кӧргӱсти. Мынызы анчада ла Улу Јеҥӱниҥ байрамыныҥ алдында јакшы сезилет. Оныҥ да учун бош ӧй јок то болзо, Мария Ивановна Ждановага келбес аргам јок болгон» — деп, тергеениҥ башчызыныҥ молјуларын удурумга бӱдӱреечи айткан.

«Слер бастыра јӱрӱмигерди улустыҥ јӱрӱмин аргадаарына учурлаганар, јууны бажынаҥ ала учына јетире медсанбата санитарка болуп ӧткӧнӧр, соҥында Майма аймактыҥ эмчилигинде иштегенер. Алтайдыҥ канча кире улузыныҥ јӱрӱмин аргадаганаарды тоолойтоны кӱч керек. Слердиҥ эткен ижигер учун бажымды јабыс эҥчейтедим» — деп, Олег Хорохордин айткан.

Мария Ивановна республиканыҥ башкараачызыныҥ молјуларын бӱдӱреечиге јууныҥ јылдарында шыркалу улусты канайда кичеегени керегинде куучындаган. Ол шыркалу јуучылдарды аргадап аларга болуп, кӧп катап канын табыштырган. Јууныҥ да кийнинде јылдарда донор болгон. «Јуу ӧйинде мениҥ колдорым ажыра кӧп тоолу шыркалу јуучылдар ӧткӧн. Улу Јеҥӱниҥ кӱни, 1945 јылдыҥ кӱӱк айыныҥ 9-чы кӱни, бӱгӱнги ле кӱн ошкош јылу болгон. Мен оны качан да ундыбазым» — деп, ветеран айткан.

«Слердиҥ ийде-кӱчерге јаҥыс ла јакшы кӱйӱнер керек! База да кӧп јаш јажагар деп кӱӱнзейдим. Слер чыдап јаткан ӱйеле, школдыҥ ӱренчиктериле, јашӧскӱримле ӧткӱрип турган иште база эрчимдӱ туружадар. Ол учун Слерге јаан быйан» — деп, Олег Хорохордин темдектеген.

Мария Ивановна Жданова 1922 јылдыҥ чаган айыныҥ 10-чы кӱнинде Новосибирский областьтыҥ Доваленский районыныҥ Волчанка јуртында чыккан. Бийсктиҥ медшколын ӱренип божоткон соҥында, Свердловский областьта балдардыҥ туразында медсестра болуп иштеп баштаган. 1941 јылдыҥ јаҥар айында јууга атанган. Бастыра јуу-чакты јуучыл медсестра болуп ӧткӧн лӧ 1-кы Белорусский фронтло Берлинге јеткен. Рейхстагтыҥ стенезинде бойыныҥ кыс ӧбӧкӧзин – Черникова – бичиген.

Јууныҥ кийнинде јылдарда Мария Ивановна Алтай крайда Красногорсктыҥ эмчилигинде ле Горно-Алтайсктагы областной эмчиликте, 1953 јылдаҥ ала Майма аймактыҥ эмчилигинде иштеген. Эмди бу эмчилик ветеранды јаантайын јӧмӧйт. 1986 јылда амыралтага чыккан. Эмди Маймада барказыныҥ билезиле кожо јадат.

Алтай Республиканыҥ башчызыныҥ молјуларын удурумга бӱдӱрип турган Олег Хорохордин Јеҥӱниҥ кӱни алдында Ада-Тӧрӧл учун Улу јууныҥ ветерандарыла, јууныҥ туружаачыларыныҥ тул арткан ӱйлериле, тылдыҥ ишчилериле, иштиҥ ветерандарыла тушташкан.

Туштажу П. В. Кучияктыҥ адыла адалган эл театрда ӧткӧн. Анда тергеениҥ башчызыныҥ молјуларын удурумга бӱдӱреечи ветерандарла чай ичип, эптӱ-јӧптӱ куучындашкан.

«Јуу-чак бистиҥ ороонныҥ бастыра улузына табарган. Кажы ла биледе таадалары канайда јуулашканы керегинде эзем агару чеберлелет. Ол керегинде балдарга, баркаларга айдылат. Таадалары кандый јалтанбас улус болгоны керегинде куучындар ӱйедеҥ ӱйеге улалат» — деп, Олег Хорохордин темдектеген.

Ойротияныҥ улузыныҥ фронтто јалтанбай јуулашканын, Туулу Алтайда Советский Союзтыҥ Геройлоры ас эмес болгонын, кӧп саба јуучылдар ордендерле, медальдарла кайралдатканын ол база темдектеди. Тергеениҥ башчызыныҥ молјуларын удурумга бӱдӱреечи Ада-Тӧрӧл учун Улу јууныҥ фронтторында јуулашкан таадалары керегинде база куучындаган.

О. Хорохордин чыдап јаткан ӱйени тӧрӧлчи кӱӱндӱ болорына таскадарында јаан јашту ӱйениҥ камаанын темдектеп, олорго эрчимдӱ гражданский кӧрӱми учун быйанын айткан.

Ветерандар Јеҥӱге канайда јеткендери, ат-нерелӱ керектер, најылык ла бой-бойын јӧмӧжӧри, јууныҥ кийниндеги уур јылдар керегинде куучындаган. Олор эрмек-куучын ӧйинде бир канча сурактар кӧдӱрген. Ол сурактар медициналык јеткилдешле, јаан јаштуларды јеҥилтелерле јеткилдеериле, јайаан ветеран ӧмӧликтерди јӧмӧӧриле колбулу болгон. Олег Хорохордин ачык-јарык эрмек-куучынга јаантайын белен болгонын, бастыра сурактар ла кӱӱнземелдер јазап шиҥделерин темдектеген.

Туштажу эл театрдыҥ јаан залында кӧдӱриҥилӱ керек-јаракла улалган. Анда Олег Хорохордин јуулган улусты Јеҥӱниҥ кӱниле уткыган.

«Бу кӱнди бис фашизмди јеҥген бастыра албатыныҥ јаан ат-нерелӱ кереги деп тоойдыс ла ундыбайдыс. Бис јаан јашту ӱйеге ӱстистеги амыр-энчӱ теҥери, ченемел ле ойгорлык, ат-нере ле јалтанбас, јууныҥ кийнинде јылдарда Туулу Алтайды чеберлеп ле орныктырып алган учун быйанду јӱредис» — деп, республиканыҥ башчызыныҥ молјуларын удурумга бӱдӱреечи айткан.

Ол јууныҥ ветерандарына, тылдыҥ ишчилерине, јууныҥ туружаачыларыныҥ тул арткан ӱйлерине бек су-кадык, јакшы јадын-јӱрӱм, узун јӱрӱм ле амыр-энчӱ кӱӱнзеген.

Бу керек-јарак республиканыҥ бастыра аймактарынаҥ келген ветерандардыҥ јайаан ӧмӧликтериниҥ байрамдык ойын-концертиле тӱгенген.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина