Настройки отображения

Размер шрифта:
Цвета сайта:
Ностройка изображения
Ностройка изображения

Настройки

Алтайдын Чолмоны

«Победа» авиакомпания — Горно-Алтайсктыҥ аэропортында

19.07.2019

«Победа» авиакомпанияныҥ самоледы Москва–Горно-Алтайск деген маршрут аайынча баштапкы рейсин бӱдӱрерде, оныла учуп келген улусты АР-дыҥ удурумга башчызы Олег Хорохордин республикан аэропортто уткыган.

«Бис «Победа» авиакомпанияныҥ Москва–Горно-Алтайск маршрут аайынча баштапкы рейсин уткып јатканыска сӱӱнедис. Улус самолетло јакшы учуп келген деп бодойдым. Јорыктап јӱрген улуска  јарамыкту баалар учун быйанысты айдадыс, олор билдирлӱ јабызаган. Бистиҥ ӧмӧ-јӧмӧ ижис узак ӧйгӧ улаларына иженедим» — деп, Олег Хорохордин кӧдӱриҥилӱ туштажу ӧйинде айткан.

Бистиҥ аэропортко учуп келген самолет јаҥжыкканы аайынча самолеттор учар-конор јердеги суу арканыҥ —  солоҥыныҥ алдыла ӧдӱп чыккан. Самолетло келген улусты ла оныҥ командазын орус ла алтай чӱм-јаҥдарла уткыгандар — калаш-тусту, чегендӱ, боорсокту.

«Москвадаҥ Горно-Алтайскка учуп келген самолет пассажирлерле толо болгоны, мынаҥ да кайра толо барып јатканы сӱӱндирет. Бир айдаҥ эмеш кӧп ӧйдиҥ туркунына 5 муҥ кире билеттер садылган. Бис баалар јанынаҥ шиҥжӱ ӧткӱреристе, бери учуп турган ӧскӧ компанияныҥ тарифтериниҥ кеми, биске «Победа» келгениле колбой, 8 процентке јабызай бергени јарталган. Онызына бис сӱӱнедис, јорыктап јӱрген улуска ла мынаҥ адакыда туза болот» — деп, авиакомпанияныҥ пресс-качызы Елена Селиванова айткан.

Аэропорттыҥ директоры Сергей Кругловтыҥ темдектегениле, Москва јаар јаҥы рейс — республикага сӱрекей керектӱ. Баштапкы јарымјылдыктыҥ туркунына пассажирлердиҥ тоозы 41 процентке кӧптӧгӧн, онызы ортоотраслевой кеминеҥ 4,5 катапка кӧп. Эксперттердиҥ шӱӱлтезиле, бу тоо оноҥ до ары кӧптӧӧр, анчада ла ӧзӱмниҥ келер ӧйиниҥ аргаларынаҥ кӧрзӧ.

«Победа» авиакомпанияныҥ бу рейси  јорыктап јӱрген улусла толо болгон. Ол ок ӧйдӧ кажы ла кӱн Москвадаҥ бис јаар учуп келип турган ӧскӧ авиакомпанияныҥ пассажирлериниҥ тоозы астабаган. «Победа» ижиниҥ кемин элбедерин сакыйдыс. Аэропорт онызына белен, кӧп улусты шиҥжӱниҥ пункты ажыра тӱрген ӧткӱрерге, келер јылда терминалды јаҥыртар деген јӧп јарадылган» — деп, директор айткан.

Олег Хорохординниҥ айтканыла, «Победа» авиакомпанияла бис јаар неделеде ӱч рейс эдери јанынаҥ јӧптӧжӱ тургузылган, келер ӧйдӧ оныҥ самолетторы бери кажы ла кӱн учардаҥ айабас. Авиаперевозкалар — туристтердиҥ тоозын кӧптӧдӧрине, тергеениҥ ӧзӱмине јаан учурлу тӧзӧлгӧ. Ӧскӧ дӧ ууламјылар аайынча рейстер тӧзӧӧри јанынаҥ иш ӧдӧт.

«Тургуза ӧйдӧ бисте Москва–Горно-Алтайск–Москва маршрутта эки перевозчик, Новосибирск ле Красноярск јаар кажы ла кӱн самолеттор учат, Екатеринбург ла Казань јаар неделеде эки катап — бу ууламјылар быјыл ачык. Келер ӧйдӧ Санкт-Петербург, Новокузнецк, Омск ло Иркутск јаар маршруттар јанынаҥ белетеништӱ иштер ӧдӧт» — деп, удурумга башчы айткан.

Оныҥ эзеткениле, тергеениҥ аймактары јаар авиамаршруттарды орныктырары јанынаҥ иш ӧдӧт, бу јуукта Кош-Агаш јаар технический рейс болгон. Андагы аэропортто инфраструктура јаҥыртылза, ол  јаар самолет учуп баштаар.

Аэропортко албатылар ортодо статус берери јанынаҥ иш ӧткӧнчӧ. Керектӱ бастыра документтер јӧптӧштирерине Россияныҥ башкарузына аткарылган. Јӧп јарадылза, ӱлекер тургузары, 2021 јылдаҥ ала перронды јаҥыртары башталар. Аэропорт андый бийик статусты 2024 јыл кирезинде алар деген ижемји бар.

Кӧдӱриҥилӱ туштажуныҥ кийнинеҥ 170 кижи бу ла самолетло ойто Москваныҥ «Внуково» аэропорты јаар уча берген. Олег Хорохордин база бу самолетло Москва јаар ишмекчи јол-јорыкла атанган.

Јаҥы маршрут аайынча учуштар неделеде ӱч катап болор — вторник, четверг ле суббот кӱндерде. «Победаныҥ» бастыра рейстерин завод-производительдеҥ кӧндӱре аткарган Boeing 737-800 таҥмалу самолетторло бӱдӱрер.

АР-дыҥ башкарузыныҥ пресс-службазы

Е. БУТУШЕВТИҤ фотојуругы

«Баалары ла јеткилдештери меге јараган…»

Яна Гурина, Москваныҥ кижизи, кичӱ ле орто аргачылыктыҥ «Опора России» деген текшироссиялык јондык организациязыныҥ ӱлекер иш аайынча бӧлӱгиниҥ јааныныҥ ордынчызы:

«Победа» авиакомпания Горно-Алтайск јаар маршрутта иштеп баштаганыла колбой, тергеениҥ эл-јонына ла айылчыларына ары-бери јорыктаары јеҥил боло берди. Улуста Алтай јаар барып келер кӱӱн бар да болгон болзо, је транспорттыҥ баалары бийик болгонынаҥ улам олор Европа јаар јорыктап туратан болгон.

Мен «Победаныҥ» самолетторыла бир канча катап јорыктагам, олордыҥ баалары ла јеткилдештериниҥ чыҥдыйы меге јараган. Ӧскӧ компанияныҥ бааларын кӧрзӧ, сезон ӧйинде ары-бери јорыктаганыныҥ билеттериниҥ баазы 40 муҥ салковойго јуукташ. «Победаныҥ» самоледыла анайып ла учсаҥ, багажла кожо — 17 муҥ салковой.

Былтыр мен андый ла баага «Победа» авиакомпанияныҥ самоледыла Горно-Алтайск јаар Новосибирск ажыра учкам. Новосибирскке једип келеле, Горно-Алтайскка јетире алты сааттыҥ туркунына једер керек болгон. Эмди дезе кӧндӱре учуп келериҥ. Куран айда бу ла авиакомпанияныҥ самоледыла бери келерим ле јаҥы јолдыҥ развязказын кӧрӧрим.

Учуп келер ӧй јарамыкту, мен самолетко отурала, уйуктаарын јакшызынадым. Тӱнде учуп чыгала, тӧрӧл республикаҥга эртен тура једип келериҥ.

Рейстер кӧптӧгӧни сӱрекей јакшы, онызы бистиҥ аэропортко до јарамыкту. Мындый јӧпти туку качан јарадар керек болгон».

Анна Меликян, Горно-Алтайсктыҥ кижизи, аграрный колледжтиҥ преподаватели:

«Победа» авиакомпанияныҥ самоледыла мен Горно-Алтайсктаҥ Москвага јетире јаан изӱ айдыҥ 18-чи кӱнинде учкам, оноҥ ары — Краснодардӧӧн. Меге јарамыкту стыковочный рейс болгон: бастыразы бир ле аэропортто, кайдӧӧн дӧ барбазыҥ, рейстер ортодо арбынду ӧй келишкен. Ол авиакомпанияныҥ сайтында кижи талдап алгадый бир канча рейстер болгон.

Мен јай ӧйинде учкам учун кӧп кийим-тудум керек јок болгон — кожо алып јӱрген кожым јаан эмес. Билетти садып алар ӧйдӧ самолетто кандый јер сеге јараганын талдап алар арга бар. Слер баштапкы пассажир эмес болзогор, сервис слердиҥ јаныгарда кем отурарын талдап алар арга берет — эр кижини эмезе ӱй кижини. Баалар ла јеткилдештиҥ чыҥдыйы јарамыкту. Бу рейсле учканымныҥ баазы, Новосибирсктеҥ бу ла авиакомпанияныҥ самоледыла учканына кӧрӧ, јабыс».

Урсул Аныев, Алтай Республиканыҥ Москвадагы студенттериниҥ јерлежӱзиниҥ совединиҥ председатели:

«Улус бойыла кожо јаан кош-јӱк јогынаҥ јорыктаарын јакшызынар, самолеттогы комфорт-немеге јаан ајару этпей турган болзо, «Победа» авиакомпанияныҥ самоледыла бир де алаҥзыбазынаҥ јорыктаарга јараар. Бу рейс Москва јаар ишмекчи јол-јорыкла, бойыныҥ керек-јарактарыла јорыктап тургандарга јарамыкту.

S7 авиакомпания ыраада учуп барып јаткан студенттерге јарамыкту айалгалар тӧзӧйт, субсидированный билеттер садылат. Оныҥ да учун бу авиакомпанияныҥ самоледыла учары эптӱ — кош-багажыҥ да јаан, колго алып јӱрер тудунчак коштыҥ бескези 10 килограмм, самолеттыҥ ичинде азырап јат — онызы кажы ла студентке јаан учурлу.

Экинчи авиаперевозчик иштеп баштаганы рейсти талдап алар арга берет — баазы ла комфорт-јеткилдежи аайынча.

База бир јаан авиакомпания иштеп баштаганы бистиҥ оогош тергееге кӧп јакшы айалгалар тӧзӧйт, анчада ла туризмниҥ ӧзӱмин ајаруга алза».

Ольга Грушина, Барнаул каланыҥ кижизи, кожоҥчы:

«Бис Горно-Алтайсктаҥ Москва јаар баштапкы рейсле учканыс. Јол-јорыктыҥ эҥ ле јарамыкту бааларын талдап, бис Барнаулдаҥ Горно-Алтайсктӧӧн ӧнӧтийин келгенис. «Победа» авиакомпанияныҥ баштапкы рейсине туштаарыс деп сананбаган да болгоныс.

Самолетло учуш јакшы болды. Јаҥыс ла самолеттыҥ отургыштарын бойыҥа јарамыкту болзын деп келиштиртип болбозыҥ. Оныҥ да учун агаш отургышта отурала учкаҥдый сезим арткан. Кошты апарары јанынаҥ аҥылулар бар.

Бистиҥ самолет улусла толо болгон. Алтай Республиканыҥ удурумга башчызы Олег Хорохординге туштаганыс, бир эмеш куучындашканыс та. Москва бисти јаҥмырла уткыган. Јаан изӱ айдыҥ 25-чи кӱнинде бу ла рейсле кайра јанарыс».

 

 

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина