Алтайдын Чолмоны

«Манјӱрек» курортто канатный јаҥы јол ачылган

10.09.2019

Алтай Республиканыҥ удурумга башчызы Олег Хорохордин ле Россияныҥ Сбербанкыныҥ јааны Герман Греф сыгын айдыҥ 7-чи кӱнинде Майма аймакта јыл туркунына иштеер «Манјӱрек» курортто канатный јаҥы тӱрген јол ачкан.

«Бис Сбербанкка ла Герман Оскаровичке Туулу Алтайга улайын ајару ла кеми сӱрекей јаан инвестициялар эдип турганы учун јаан быйанысты айдып турус. Комплекстиҥ ӧзӱми оноҥ ары улалат, келер јуук јылдарда слер мындый европей ле телекейлик кеминде курорт болуп калганын кӧрӧригер. Андый курорт болуп калган кийнинде, биске бери јаҥыс ла јер-телекейдиҥ башка-башка јерлеринеҥ туристтерди јилбиркедер эмес, је анайда ок иштеер јаҥы јерлер тӧзӧӧр арга болор» — деп, Олег Хорохордин кӧдӱриҥилӱ ачылта ӧйинде айткан.

«Сбербанк» ПАО-ныҥ башкартузыныҥ јааны Герман Грефтиҥ темдектегениле, эмдиги ӧйдиҥ некелтелерине келижип турган мындый подъемниктер бистиҥ ороондо тургуза ӧйдӧ јӱк ле Сочи калада бар. Манјӱректиҥ јанында Синюха кырдыҥ бажына јетире узуны 1,02 муҥ метр јолды бу подъемниктиҥ болужыла алты минут ӧдӧр арга тӧзӧлгӧн. Мынаҥ озо болгон кресельный јолло ол кырдыҥ бажына једерге јарым саат кире ӧй ӧдӱп туратан.

«Бу комплекске ууландырылган инвестициялардыҥ баштапкы бӧлӱгин бис бӱгӱн тӱгезип јадыс. Ого јыл туркунына 220 муҥ кижи келип јат. Тӱрген баштапкы јолды ачканы туучаналык комплекстиҥ јеринде бир сааттыҥ туркунына 2,4 муҥ кижини ары-бери тартар арга берер. Ол туучаналык курорттыҥ, анайда ок јайдыҥ ӧйинде туулык курорттыҥ ӧзӱминиҥ керексиништерин артыкташтыра јеткилдеер» — деп, ол айткан.

Алдында ӧйдӧ тузаланылган кресельный подъемникти јӱк ле јай ӧйинде тузаланары эмезе соҥында јоголтып салары темдектелет. Улус јыҥылаар јол-трассаны карла искусственный эп-аргала јеткилдеер системаны, ол эмдиге јетире учына јетире тӧзӧлбӧгӧн, тӧзӧӧри јанынаҥ Сбербанк иштеер. Анайда ок курорттыҥ ээзи курорттыҥ оноҥ арыгы ӧзӱмине арбынду акча-манат чыгарарга јазанат. Темдектезе, мында 200 номерлӱ коночылык комплекс, инфраструктураныҥ тӧс объекттери, смотровой площадкалар тудулар. Олег Хорохординниҥ темдектегениле, кичӱ бизнестиҥ ӧзӱмине керектӱ бастыра айалгалар, улус иштеер јаҥы јерлер тӧзӧлӧр.

Герман Грефтиҥ айтканыла, бу комплекс јаҥыс ла албаты-јон амыраарына ла соотоорына тузаланылар эмес. Курорт улус эмдеериниҥ, медициналык реабилитацияныҥ, оору-јоболдор болдыртпазыныҥ ла улустыҥ су-кадыгын орныктырарыныҥ санаторийи эдип тузаланылар. Бери келип турган туристтердиҥ тоозын келер јуук јылдардыҥ туркунына тӧрт катапка кӧптӧдӧри темдектелет — јыл туркунына 220 муҥнаҥ 800 муҥ кижиге јетирери.

«Туризм — улус иштеер јерлер тӧзӧӧрине ле кичӱ бизнестиҥ ӧзӱмине эҥ ле мультипликативный бӧлӱк болуп јат. Комплекстиҥ јеринде ле оны айландыра јерде улус иштеер муҥдар тоолу јерлер тӧзӧлӧр. Анайда ок балдарга учурлалган инфраструктураны ӧскӱрери темдектелет, јаан ајару су-кадыгыныҥ аргалары кирелӱ балдарла иштеерине эдилер. Тургуза ӧйдӧ андый балдардыҥ реабилитациязына аҥылу кышкы школ бисте ӧдӧт, бис ижистиҥ кемин оноҥ ары элбедерге ле оны јаҥжыктырып аларга кичеенерис» — деп, Сбербанктыҥ јааны айткан.

Олег Хорохординниҥ темдектегениле, Алтай Республикага јербойына туристтер кӧбизинде јай ӧйинде келип турганынаҥ јыл туркунына келерине кӧчӧр керек. Кыш та ӧйинде туристтер кӧптӧҥ келерине јарамыкту айалгалар тӧзӧӧр деген сурак турат.

«Манјӱрек» комплекстий ӱлекерлер шак ла андый суракты аайлаштырарына болуш јетирет. Бис объекттиҥ ээзине кыш ӧйинде, кайда да кочкор айы кирезинде јаан керек-јарак ӧткӱрери јанынаҥ шӱӱлте эдерге турус» — деп, тергеениҥ удурумга башчызы айткан.

Оныҥ эзеткениле, тургуза ӧйдӧ «Манјӱректе» Уралдыҥ бери јанында баштапкы профессионал байк-парк иштеп јат, даунхиллдиҥ узуны 11 километр јети јолы, агаш скилл-парк, памп-трек бар.

Комплексте ачылта ӧйинде јаан байрам ӧткӱрилген. Мында Black Star Ternovoy лейблдиҥ јылдыстарыныҥ концерти, кӧдӱриҥилӱ ачылтаныҥ айылчыларына соотошту керек-јарактар ӧткӧн. Байрамныҥ спортивный бӧлӱгинде «Манјӱрек» деп велобайк-фестиваль ӧдӧрдӧ, анда профессионалдар ла бастыра Сибирьдеҥ ле Россияныҥ тӧс бӧлӱгинеҥ велоспортты сӱӱчилер турушкан.

«Манјӱрек» курорттыҥ ӧзӱминиҥ концепциязы эмдиги ӧйдиҥ некелтелерине келиштирте тургузылган. Бу ӱлекерди јӱрӱмде бӱдӱрерге, 2019 јылдыҥ кандык айында курорттыҥ архитектурно-градостроительный концепциязын белетеери јанынаҥ конкурс ӧткӱрилген. Конкурста Австрияныҥ Coop HimmeIb (I) компаниязы јеҥген, ол јер-телекейдиҥ эҥ артык он архитектурный бюрозыныҥ тоозына кирип јат.

Эмдиги ӧйдиҥ некелтелерине келижип турган канатный јаҥы јолды ачканы курорттыҥ комплексный ӧзӱминиҥ баштапкы бӧлӱги болуп јат. Ӱлекер толо кеминде бӱткен соҥында айылчыларга конекторло, чанактарла јыҥылаарына, ийттерди чанактарга јегеле јарыжарына, кар полого, туу-чананыҥ спортына, сноубордко, даунхиллге, атту јорторына, квадроциклдерле маҥтадарына ла ӧскӧ дӧ бӱдӱмдерге јарамыкту айалгалар тӧзӧлӧр. Анайда ок парк, пляж, бассейн, чананыҥ тӧс јери, Кичӱ Синюханыҥ бажында ресторан ачылар. Курорт јыл туркунына иштеер. Концепцияны јӱрӱмде бӱдӱрери келер эки-ӱч јылдыҥ туркунына ӧдӧр.

АР-дыҥ башкарузыныҥ

пресс-службазы