Улу Јеҥӱниҥ байрамына белетениш

15.10.2019

Алтай Республиканыҥ башчызы Олег Хорохордин совет албатыныҥ Ада-Тӧрӧл учун Улу јууда Јеҥӱзиниҥ 75 јылдыгын темдектеерине белетенишке учурлалган јуун ӧткӱрген.

Јуунныҥ ижинде Алтай Республиканыҥ башкарузыныҥ турчылары, тергеениҥ ийде-кӱчтӱ ведомстволорыныҥ, јондык организацияларыныҥ чыгартулу улузы турушкан. Анда Горно-Алтайскта 9 Майда ӧдӧтӧн черӱчил парадка белетенери ле ӧткӱрери аайынча сурак шӱӱжилип кӧрӱлген.

«Јеҥӱниҥ байрамын бийик кеминде ӧткӱрерге, бис бастыра ийде-аргаларды чуктаар учурлу» — деп, тергеениҥ башкараачызы айткан.

Республиканыҥ черӱчил комиссары Олег Денисенконыҥ айтканыла, байрам јаҥжыкканы аайынча Јеҥӱниҥ паркындагы мемориал комплексте ӧдӧр. Мында театрализованный кӧрӱ, митинг, «Ӱргӱлјик полктыҥ» базыжы, «Солдаттыҥ кашазы» деген акция, бедиреечилердиҥ кыймыгузыныҥ «Јуу-чактыҥ јаҥылгазы» деген кӧрӱзи болор.

Парадта 500-теҥ кӧп кижи туружар — Алтай Республика аайынча МВД-ныҥ, погранбашкартуныҥ, Росгвардияныҥ, јаргыныҥ приставтарыныҥ федерал службазыныҥ башкартузыныҥ, МЧС-тыҥ, кезедӱлерди бӱдӱрери аайынча федерал службаныҥ башкартузыныҥ ишчилери, юнармеецтер, черӱчил-тӧрӧлчи таскамалдыҥ ла јииттерди черӱге белетеериниҥ зональный тӧс јерлериниҥ курсанттары, казак јашӧскӱримниҥ чыгартулу улузы туружар.

Олег Денисенконыҥ темдектегениле, Бийсктеги гарнизонныҥ черӱчил бӧлӱктериниҥ јуучыл техниказын бисте ӧдӧтӧн байрам ӧйинде албаты-јонго кӧргӱзерге экелери планда база бар. Ол анайда ок парадтыҥ туружаачылары ла техника канайда турарыныҥ ла ӧдӱп барарыныҥ схемаларын кӧргӱскен.

Тергеениҥ башчызы муниципал тӧзӧлмӧлӧрдиҥ јаандарына мемориалдарды ла кереестерди байрам алдында арутап јарандырары јанынаҥ аҥылу ајару эткен. Бастыра 180 объектти јазап јарандырары темдектелген.

Јуунда анайда ок Ада-Тӧрӧл учун Улу јууныҥ туружаачызы Ташлай Мерусович Иртаковтыҥ ады-јолын Кан-Оозы аймакта Оро јурттагы Мактыҥ мемориалындагы тооломго кийдирери јанынаҥ сурак кӧрӱлген.

Олег Хорохординниҥ эзеткениле, эл-јонло туштажу ӧдӧр тушта Кан-Оозы аймактаҥ эпши бу суракла баштанган болгон. Ол кижи Ада-Тӧрӧл учун Улу јууга Оро јурттаҥ 25 кижи атанган, је Мактыҥ мемориалында 20 кижиниҥ ады-јолы бичилген деп куучындаган болуптыр. Беш јуучылдыҥ, ол тоодо Ташлай Иртаковтыҥ ады-јолы анда бичилбеген болуптыр.

Тергеениҥ башкараачызы муниципал тӧзӧлмӧниҥ башкартузына аймактыҥ военкомадыла кожо мемориал тооломдорго кубулталар эдери јанынаҥ суракла иштезин деп јакылта берген. Анайда ок Олег Хорохордин Ада-Тӧрӧл учун Улу јууда Јеҥӱниҥ 75 јылдыгына учурлалган керек-јарактарды белетеери ле ӧткӱрери јанынаҥ тӧзӧмӧл комитеттиҥ баштапкы јууны јуук ӧйдӧ ӧдӧр деген.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина