Башчы профсоюзтардыҥ чыгартулу улузыла тушташкан

18.10.2019

Алтай Республиканыҥ башчызы Олег Хорохордин ӱлӱрген айдыҥ 15-чи кӱнинде тергеедеги профсоюзтардыҥ чыгартулу улузыла туштажу ӧткӱрер тушта ишчилердиҥ ишјалыла, олорго служебный туралар берериле колбулу сурактар шӱӱжилип кӧрӱлген.

Алтай Республиканыҥ су-кадыкты корыыры аайынча министриниҥ молјуларын бӱдӱреечи Андрей Макин медицинаныҥ ишчилерине служебный туралар садып алар акча 2019 јылдыҥ республикан бюджединде темдектелип калган деп айткан. Шабалин аймактыҥ эмчилигиниҥ врачына, јаргы-медициналык эксперттерге Кош-Агашта ла Горно-Алтайск-та служебный туралар садып алылган. Каланыҥ медорганизацияларыныҥ ла аймактардыҥ эмчиликтериниҥ медишчилерине служебный 11 тураны јылдыҥ учына јетире ӧйдиҥ туркунына садып алары темдектелип калган.

Кара-Кӧпшиде, Чаргыда, Оҥдойдо, Акташта, Кош-Агашта, Мультада, Турачакта ла Кӧксуу-Оозында медишчилерге служебный туралар садып алары јанынаҥ аукционды министерство јарлап салган. Майма аймактыҥ эмчилиги аайынча угузу бичик федерал тӧс јерде кӧрӱлип јаткан.

Россия Федерацияныҥ президенти-ниҥ 2012 јылда кол салган Јарлыгына кирбеген бюджет бӧлӱктиҥ квалифицированный специалисттериниҥ ле болушту ишчилериниҥ ишјалыныҥ дифференциациязыла колбулу сурак јаан учурлу болуп калган. АР-дыҥ иш, јонјӱрӱмдик ӧзӱм ле эл-јонды ишле јеткилдеери аайынча министриниҥ молјуларын бӱдӱреечи Адар Суминниҥ јетирӱзиле, бюджет бӧлӱктиҥ специалисттериниҥ ле болушту ишчилериниҥ ишјалдарын келиштиртери аайынча суракты аайлаштырарга федерал бюджеттеҥ ӱзеери јӧмӧлтӧ этсин деген суракту баштану Россияныҥ башкарузына аткарылган.

Алтай Республиканыҥ јеринде ӱредӱликтиҥ системазыныҥ ишчилериниҥ ишјалыныҥ системазын кубултары јуунда база шӱӱжилип кӧрӱлген, бу суракта Россияныҥ ӧскӧ тергеелериниҥ ченемели шиҥделип кӧрӱлер. Ӱренчик-часка тӧзӧлгӧлӧнгӧн ээжини окладка (ставкага) тӧзӧлгӧлӧнгӧн јаҥы системала солыыры јанынаҥ шӱӱлте эдилет. Ишјалды тӧлӧӧрине темдектелген акча-манатты ӱлештирер тушта ишчилердиҥ окладтарыныҥ, ставкаларыныҥ кеми ишјалдыҥ кеминеҥ 70 проценттеҥ ас эмес болор учурлу деп шӱӱлте эдилет.

Онызы, профсоюзтардыҥ чыгартулу улузыныҥ айтканыла, акча-манатты чоттооры канайда ӧдӱп турганы ачык-јарык болорын јеткилдеер. Олег Хорохордин бу керектиҥ учуры јаан болгонын темдектеп, оны шиҥжӱде тутсын деп јакылта берген.

Профсоюзтардыҥ Алтай республикан организациязыныҥ председатели Елена Григоренко медишчилердиҥ ишјалыныҥ системазында модернизация ӧткӱрери керектӱзин темдектеген. Медишчилердиҥ ишјалыныҥ тӧзӧлгӧзи ле ӱзеери кожулта акча ортозында башкаланышта кубулталар эткедий арганы шиҥдеп кӧрзин деген јакылта јуунда база эдилген. Профсоюзтардыҥ чыгартулу улузы ишјалдыҥ тӧзӧлгӧ бӧлӱгиниҥ кемин 22 проценттеҥ 60 процентке јетире кӧптӧдӧри јанынаҥ шӱӱлте айткан. Республиканыҥ башкараачызы бу јанынаҥ чоттомол ишти быжу ӧткӱрерине ајару эдип, профсоюзтарла болотон келер туштажуда бир канча эп-сӱмелердеҥ бирӱзин талдап алар керек деген.

Јуунда анайда ок Россияныҥ агаш бӧлӱгиниҥ ишчилериниҥ профсоюзыныҥ «Агаш ээлемде мергендӱ иш учун» деген кампаниязыла колбулу сурак база кӧрӱлген. Алтай республикан профсоюзный организацияныҥ председатели Ольга Бородина агаш бӧлӱктиҥ ишчилериниҥ ишјалыныҥ кеми јабыс болгоны ла бу бӧлӱк акча-манатла кирелӱ јеткилделип турганы керегинде куучындаган. Мындый айалгадаҥ улам бӧлӱкке иштеер улус кӧп учуралдарда једишпейт. Олег Хорохордин айалганы кубултары аайынча шӱӱлтелер этсин ле олорды оноҥ ары шӱӱжерине Росагашээлемниҥ башкартузына чыгарар керек деп айткан.

Профсоюзный кыймыгуныҥ турчылары ӱредӱчилердиҥ агару ла јеҥил эмес ижи учун ла олорго јаан тоомјыны кереестеп, бастыра педагогторго учурлай тергееде кереес тургузарына акча-манат канай јуулып турганы керегинде куучындаган. Кереестиҥ эскизный ӱлекери ле оны кайда тургузары јӧптӧлип калган. Акча-манат јуулза, оны 2020 јылда Ӱредӱчиниҥ кӱниниҥ алдында ачары темдектелет.

АР-дыҥ башкарузыныҥ

пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина