Тергеениҥ бюджединиҥ тӧс ууламјызы — јонјӱрӱмдик бӧлӱк

10.12.2019

Алтай Республиканыҥ башчызы Олег Хорохордин ээчиде ле пландалган 2021-2022 јылдардыҥ ӧйине бюджеттиҥ ӱлекери аайынча иштеп турган комиссияныҥ јуунын ӧткӱрди.

Республикан бюджеттиҥ ӱлекери АР-дыҥ Эл Курултайыныҥ сессиязына экинчи кычырышка чыгарылар. Ол тушта бюджеттиҥ чыгымдары чокым шӱӱжилер.

«Элдеҥ ле озо республиканыҥ бюджеди баштапкы јерде турган чыгымдардыҥ сурагын аайлаштырар — ишјал, национальный ӱлекерлерди бӱдӱрери аайынча бистиҥ алдыста турган јӧнјӱрӱмдик некелтелер ле сурактар. Тӧс башкараачыларла јӧпкӧ келбеген протоколдор аайынча керектӱ болгон ӱзеери акча-манаттыҥ кеми 4,8 млрд салковой. Мындый керексиништердиҥ кеми бюджеттиҥ аргаларынаҥ канча кире кӧп эмей» — деп, тергеениҥ башчызы ајарды.

Эдилген иштиҥ турулталарыла, депутаттардыҥ баштануларын ајаруга алып, Јеҥӱниҥ 75 јылдыгын темдектеерине ӱзеери акча-манат чыгарары, онойдо ок калага коммунальный техника алары, ӱренчиктерди изӱ курсакла ашкарарын јеткилдеери керегинде шӱӱлте айдылды.

«2020 јылга бисте јаан учурлу бир канча керек-јарактар темдектелген. Ол тоодо Григорий Чорос-Гуркинниҥ чыкканынаҥ ала 150 јылдыгы, эл библиотеканыҥ 100 јылдыгы. Јыл туркунына олорго учурлалган керек-јарактар ӧткӱрерине акча-манатты озолондыра темдектеп алар керек» — деп, башчы айтты.

Алтай албатыныҥ тергеелер ортодогы Эл Ойын байрамын бийик кеминде ӧткӱрерин јеткилдеер керек деп, ол айткан. Ого ӱзеери 2020 јылда Алтай Республика албатылар ортодогы «Наш общий дом — Алтай» деген координационный советти башкарар. Ого база акча-манат чыгарарын аайлаштырар керек. Јылдыҥ учына јетпей, ончо бу керектер аайынча тӧзӧӧчи комитеттердиҥ јуунын ӧткӱрер керек деп, тергеениҥ башкараачызы айтты.

АР-дыҥ башкарузыныҥ председателиниҥ ордынчызы, акча-манат аайынча министр Ольга Завьялова Алтай Республиканыҥ 2020 ле пландалган 2021-2022 јылдарга бюджединиҥ ӱлекерин экинчи кычырышка белетеериниҥ аҥылулары керегинде јетирди.

Бюджеттиҥ акчазын бӧлӱктер аайынча келиштирте ӱлештиреринде тӧс ајару озо ло баштап национальный ӱлекерлерди бӱдӱрерине ле учурыла баштапкы јерде болуп турган чыгымдарга эдилген. Экинчи кычырышка адылу акча-манат аайынча кирелтелердиҥ кеми 1,17 млрд салковойго кӧптӧӧр эдип тӱзедилет.

Министр чыгымдардыҥ аайы кандый болоры керегинде элбеде јетирди. Онойып, бюджет бӧлӱктиҥ ишчилериниҥ ишјалына 7,355 млрд салковой темдектелген, ӧскӱс балдарды јадар јерлерле јеткилдеерине — 60 млн салковой, ӧскӱс балдарга ӱзеери быжулаштар — 71 млн салковой.

Парламенттиҥ шӱӱлтелерин ле баштануларын ајаруга алып, Ольга Завьялова шӱӱжӱге эҥ учурлу сурактарды чыгарары керегинде айтты. Ол тоодо Јеҥӱниҥ 75 јылдыгыныҥ байрамына чыгымдаар акча-манат, јууныҥ балдарына болуш эдери, спорттыҥ кышкы бӱдӱмдериниҥ аҥылу школын не-немелерле јеткилдеери ле чанала јыҥылаар трассаны јарыдары, республикан ветлабораторияны јазаары, ӱренеечилерди изӱ аш-курсакла азыраарын јеткилдеери.

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым