Алтайдын Чолмоны

Ижис ороон до, тала да кеминде каруулу

21.01.2020

Чаган айдыҥ 17-чи кӱнинде П. В. Кучияктыҥ адыла адалган эл театрда Россияныҥ Печадиниҥ кӱнине учурлалган кӧдӱриҥилӱ керек-јарак ӧткӧн.

Анда республиканыҥ элбек јетирӱлер эдер эп-аргаларыныҥ чыгартулу улузы: печатный СМИ-лердиҥ, радионыҥ ла телекӧрӱлтениҥ, бичик чыгартулардыҥ, типографияныҥ ишчилери турушкан.

Алтай Республиканыҥ башчызыныҥ адынаҥ олорды Алтай Республиканыҥ башкарузыныҥ председателиниҥ баштапкы ордынчызыныҥ молјуларын бӱдӱрип турган Алексей Тюхтенев уткыган. Ол баштапкы российский газет —  «Ведомости» кепке базылганынаҥ ала ӱч јӱс јылдаҥ кӧп ӧй ӧткӧнин айдып, «Алтайдыҥ Чолмоны» ла «Звезда Алтая» республикан газеттер эки јылдаҥ јӱс јылдыктарын темдектеер деген.

Алексей Тюхтенев бӱгӱнги кӱнде технологиялар ичкери тыҥ ӧзӱм алынганын, элбек јетирӱлер эдер эп-аргалардыҥ тоозы кӧптӧгӧнин, печатный чыгартуларга радио, телекӧрӱлте, Интернет кожулганын, мынаҥ улам конкуренция јаандаганын темдектеген.

—Бу ок ӧйдӧ улуска, алдында ла чылап, чыҥдый, тӱрген, тузалу јетирӱ керек болуп јат. Алтай Республиканыҥ журналисттери ижин толо кеминде бӱдӱрет – деп, ол айткан.  Алексей Тюхтенев Россияныҥ президенти Владимир Путинниҥ элбек јетирӱлер эдер эп-аргалардаҥ келип турган турулталу критика, тузалу баштаҥкайлар башкараачыларга улусты санааркадып турган сурактардыҥ аайына јарамыкту чыгарга болужын јетирет, социальный ла јондык учурлу ӱлекерлерди јӱрӱмде бӱдӱрерге туружарында улустыҥ бойлорыныҥ јӱткӱмелин тыҥыдат деген сӧстӧри керегинде база айткан.

Вице-премьер: «Мынаҥ да ары ӧйдиҥ кычыруларына једимдӱ каруу бергер, озо ло баштап кычыраачыларарга иштегер, јаантайын тоомјыда болугар деп кӱӱнзейдим» — деген.

Алтай Республиканыҥ Эл Курултайыныҥ председатели Владимир Тюлентин бойыныҥ уткуулду сӧзинде бӱгӱнги телекей јаан јетирӱлик телкем болгонын темдектеген. Мыны эртен тура телекейде ле тергеелерде культура, экономика, политика бӧлӱктеринде болгон калганчы солундарла таныжып тура, кажыбыс ла сезет деген.

—«Ведомости» деп баштапкы газет чыгып баштаганынаҥ ала ӱч јӱс јылдаҥ кӧп ӧй ӧткӧн. Бу ӧйдиҥ туркунына государственный да, таҥынаҥ да элбек јетирӱлер эдер эп-аргалар олорго салынган амадуларды – јетирӱ берер эп-арганы јаҥыс ла чеберлеп алган эмес, је анайда ок јаандаткан. Эмди СМИ-лер јаҥыс ла јетирӱ эдип турган эмес, је анайда  ок јӧптӧр берет ле шиҥжӱ ӧткӱрет – деп, республикан парламенттиҥ спикери айткан.

Журналисттерле таҥынаҥ туштажуларда танышкамда, печатный СМИ-лерде ле интернет-сайттарда, видеосюжеттерде јетирӱлер аайынча слердиҥ кажыгар ла талдап алган ижигердиҥ некелтелерине келижерге кичеенип турганын кӧрӧдим деген.

Владимир Тюлентин бастыра депутаттардыҥ адынаҥ элбек јетирӱлер эдер эп-аргалардыҥ ишчилерине быйанын айткан ла «слердиҥ јӧмӧлтӧгӧрдиҥ шылтузында ӱнбереечилер бистиҥ эдип турган ижис керегинде билип јат» деген. Ол бу байрамдык керек-јаракта туружып јаткандарга јаркынду, узакка санаада артар бичимелдер ле тӱгенбес јайаан ийде кӱӱнзеген.

Бу кӱн бойыныҥ уткуулду сӧзин анайда ок Россияныҥ Журналисттер бирлигиниҥ республикан бӧлӱгиниҥ јааны Борис Алушкин, министерстволордыҥ ла ведомстволордыҥ башкараачылары, экологический организациялардыҥ чыгартулу улузы айткан.

Јаҥжыкканы аайынча мындый кӧдӱриҥилӱ керек-јарактар ӧдӧр тушта кайралдар база табыштырылат. Бу да учуралда јаҥжыккан ээжи бузулбады. Анайып, телекӧрӱлтениҥ ле радионыҥ ӧзӱмине јетирген камааны, узак јылдарга једимдӱ ижи учун «Кӱндӱлӱ радист» деген тӧшкӧ тагар темдекле «Эл Алтай» ГТРК-ныҥ телекӧрӱлтениҥ программаларын белетеер ле чыгарар группаныҥ монтажеры Ойгор Сыев кайралдаткан.

Журналистиканыҥ ӧзӱмине јетирген јаан камааны, профессионализми ле ак-чек ижи учун «Алтай Республиканыҥ нерелӱ журналисти» деген кӱндӱлӱ ат «Эл Алтай» ГТРК-ныҥ јетирӱлик программалар аайынча службазыныҥ национальный телеберилтелердиҥ шеф-редакторы Ырысту Маркитановко адалган.

Алтай Республиканыҥ Кӱндӱлӱ грамотазыла «Алтайдыҥ Чолмоны» республикан газеттиҥ фотокорреспонденти Евгений Бутушев, «Звезда Алтая» республикан газеттиҥ баш редакторыныҥ ордынчызы Наталья Манышева, «Ажуда» газеттиҥ корреспонденти Татьяна Егорова, Горно-Алтайсктагы типографияныҥ технологы Лариса Кользенова кайралдаткандар.

Алтай Республиканыҥ башчызыныҥ, башкарузыныҥ председателиниҥ Быйанду самаразы «Алтын-Туу» деп литературно-бичик чыгарма байзыҥныҥ программисти Эмиль Белековко, «Эл Алтай» ГТРК-ныҥ ведущийи Сергей Булгаковко, Горно-Алтайсктагы типографияныҥ переплетчиги Евгения Скобелевага табыштырылган.

Алтай Республиканыҥ башчызыныҥ аҥылу сыйыла «Горно-Алтайсктыҥ солундары» газеттиҥ баш редакторы Вера Байлагасова, «Эл Алтай» ГТРК-ныҥ аҥылу корреспонденти Ольга Кучукова, «Кан Чарас» газеттиҥ баш редакторы Маргарита Сапышева, «FM Продакшн Горно-Алтайск» медиагруппаныҥ башкараачызы Мария Тадина ла ТАСС јетирӱлик агентствоныҥ корреспонденти Ксения Шубина кайралдаткан.

Алтай Республиканыҥ Эл Курултайыныҥ Кӱндӱлӱ грамотазын  «Звезда Алтая» республикан газеттиҥ баш бухгалтери Наталья Боброва, Горно-Алтайсктагы типографияда полиграфический јазалдыҥ наладчиги Алексей Ефимов, «Ажуда» газетте компьютерный верстканыҥ операторы Виктор Темдеков алгандар.

Республикан парламенттиҥ «АР-дыҥ Эл Курултайыныҥ председателиниҥ таҥынаҥ сыйы» деген номинация аайынча Быйанду самаралар ла акча-сый «Алтайдыҥ Чолмоны» республикан газеттиҥ корреспонденти Светлана Кыдыевага, «Эл Алтай» ГТРК-ныҥ телеоператоры Байрам Алушкинге, «Звезда Алтая» республикан газеттиҥ корреспонденти Наталья Котенкого, «Чойские зори» газеттиҥ баш редакторы Светлана Майерге, «Эл Алтай» ГТРК-ныҥ ведущийи Алексей Параевке берилген. Узак јылдарга ак-чек ижи ле профессионал байрамы учун Быйанду самараларла «Улаганныҥ солундары» газеттиҥ корреспонденттери Лидия Адыкаева ла Чейнеш Манзырова, «Алтайдыҥ Чолмоны» республикан газеттиҥ кӧчӱреечизи Виктория Бадакина, Горно-Алтайсктагы типографияныҥ баш бухгалтери Людмила Козлова, «Алтын-Туу» деп литературно-бичик чыгарма байзыҥныҥ баш бухгалтерии Асель Покунаева ла «Кан Чарас» газеттиҥ компьютерный верстка аайынча операторы Ельвира Фирсова кайралдаткан.

Алтай Республиканыҥ прокуратуразы-ныҥ Быйанду самаразыла «Алтайдыҥ Чолмоны» газеттиҥ корреспонденти Кырчын Яшев, ӱредӱ ле билим аайынча республикан министерствоныйыла — бу ок газеттиҥ корреспонденти Эмина Кудачина, Россияныҥ ФСБ-зыныҥ Алтай Республика аайынча погранбашкартузыныйыла — баш редактордыҥ ордынчызы Артур Сулуков једимдӱ ӧмӧ-јӧмӧ иш учун кайралдаткан.

Бу кӱн залда отурган журналисттерди республиканыҥ јарлу артисттери кожоҥдорыла, бијелериле база сӱӱндирген.

К. Куртов

Е. БУТУШЕВТИҤ фотојуруктары