Ижи улустыҥ јӱректерин јылыдат

04.02.2020

М. В. Чевалковтыҥ адыла адалган эл библиотека тоолу ӧйдӧҥ бойыныҥ 100 јылдыгын темдектеер.

Јӱс јылдыҥ туркунына кӧп-кӧп јаҥыртулар болуп, библиотеканыҥ учуры, бӱдӱми, «кебер-чырайы» јакшы јаны јаар кубулганын аҥылап темдектеер керек: учуры-статузы, ады, иштеп јаткан ӧргӧӧ-туразы. Је библиотека алкы бойы билгирдиҥ, бичик-биликтиҥ ӧргӧӧзи болордо, оныҥ тӧс амадузы кычыраачыларга билгир телекейин ачар, олорды элбеде, тереҥжиде сананарына, ајарулу кычырарына, јайаандык јолы ачык ла јаан болорына тузалу ишти бӱдӱрери. Библиотека онойдо ок ачык-јарык куучын-эрмектиҥ, јетирӱлердиҥ тӧс јери.

Мындый каруулу ла тузалу ишти бӱдӱрип јаткан нак ла јаан ӧмӧликтиҥ ишчилерин јаан да, јаш та кычыраачылар, онойдо ок текши эл-јон јакшы билер ине. Библиотекада бойыныҥ ижине чындык, ижин сӱӱген ле баалаган, оморкогон јаан кӱӱндӱ улус иштеп јат.

Олордыҥ кажызы ла иштеп јаткан ижиниҥ учурын јакшы билер де, ченемели байлык улус деп айдар керек. Библиотеканыҥ ишчилериниҥ кӧп јаны сӱӱген ижинде узак јылдар туркунына ак-чек иштеп, јаантайын ла бедиренип, ченеп, профессионал узы ӧзӧт.

Кычыраачыларды ондый улустыҥ бирӱзи, иштеп јаткан коллегабыс, эл библиотеканыҥ байлык ченемелдӱ, билгири бийик ле јалакай библиотекари Марина Мереевна Алушкинала јууктада таныштырып ийерге санандым.

Марина Мереевна эл библиотеканыҥ јааныныҥ ордынчызы болуп иштейт. Биске, библиотекалардыҥ кӧп тоолу ишчилерине, оныҥ чыйрагы, турумкайы, ак-чек ле ару кӱӱн-санаазы, бойыныҥ ижиниҥ узы болгоны јаҥыс ла јакшынак јозок болгонын темдектеер керек.

Марина Мереевна кӧп јылдар туркунына једимдӱ иштеп, иштиҥ јаҥыртулу башка-башка бӱдӱмдерин тапкан, јӱрӱмде кийдирген. Ол јаҥы ишти јаҥыс та кычыраачылар ортодо ӧткӱрген эмес, је онойдо ок кожо ӧмӧ-јӧмӧ иштеп јаткан кажы ла кижиге баштанып, оныҥ јайаандык аргаларын ајарулу кӧрӱп, ишти билгир тӧзӧгӧн. Темдектезе, библиотекарьларга јыл туркунына ӧткӱретен кӧдӱриҥилердиҥ ӧдӧр аайын тургузары, башка-башка ӱлекерлерди, јайаандык ишти белетеп ӧткӱрерге болужат. Шак мындый тӧзӧмӧлдӱ иштиҥ шылтузында кычыраачыларга бийик кеминде ле чыҥдый болуш эдилет.

Ол бойы јайаан јайалталу ла кандый ла кӧрӱ-маргаандарды, акцияларды ла кӧдӱриҥилерди ӧткӱреринде эрчимдӱ туружат.

Је ол јаҥыс та солун шӱӱлтелер айдып, ӱлекерлер аайынча иштеп турган эмес. Ончо јаҥыга, јаҥыртуларга сескир эпши, јаҥыс та каланыҥ эмес, је анайда ок бӱткӱл республиканыҥ библиотечный ла культурный јӱрӱминде ӧдӱп турган керектерин ајарузына алып, тузалузын ижинде ченеерге меҥдейт. Бу јымжак кӱлӱмјилӱ коллегабыстыҥ байлык ченемелин, бӱдӱрип јаткан ижин тоолу эрмекле кӧргӱзип болбозы јарт. Је оныҥ бӱдӱрген јайаандык ижиниҥ кажызын ла эҥ артык, талдама деп айдарга јараар. Бойына ла эбире коллегаларына некелтелӱ болгоны оныҥ иштеп јаткан ижиниҥ бек тӧзӧгӧзи ле мынайда директордыҥ ордынчызыныҥ ла библиотекарьлардыҥ ӧмӧлигиниҥ ӧмӧ-јӧмӧ ижи билгир тӧзӧлгӧн.

Марина Мереевна ӧмӧлигинде, онойдо ок кӧп тоолу кычыраачылар ортодо јаан тоомјыда болгонын аҥылап темдектеер керек. Јылу, јолду сӧслӧ, онойдо ок јӧмӧлтӧ-болужыла ончо ло улуска болужып јӱргенин бис кӧп јылдардыҥ туркунына кӧрӱп, јарадып јӱредис.

Алтай Республиканыҥ культуразыныҥ нерелӱ ишчизи Марина Мереевна једимдӱ ижи учун кӧп тоолу кайралдарла кайралдаткан.

Эл библиотеканыҥ 100 јылдыгыла колбой коллегаларыска, библиотеканыҥ ишчилерине бичикле бек колбуда ижинде јаҥы јаан једимдер кӱӱнзейдис. Јакшынак, ойгор бичиктердиҥ куулгазын оды, ийдези, јарыгы слердиҥ кӱнӱҥги јӱрӱмерди, керектерерди јаантайын јарытсын. Шак ла слердиҥ болужар, ајаругар бичиктердиҥ, журналдардыҥ кайкамчылу телекейинде ичкери јолды табарга болужат.

А. ТАЛКЫБАЕВА,

балдардыҥ республикан библиотеказыныҥ

библиотекарь-краеведи

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина