Ајаруда – ылтам бӱдӱретен иштер

06.03.2020

Алтай Республиканыҥ башчызы Олег Хорохордин муниципал тӧзӧлмӧлӧрдиҥ јаандарыла, башкаруныҥ турчыларыла видеоколбула конференция ӧткӱрген.

Јуунда Ада-Тӧрӧл учун Улу јууда Јеҥӱ алганыныҥ 75 јылдыгына белетеништиҥ сурактары шӱӱжилген. Аҥылу ајаруны Олег Хорохордин јууныҥ ветерандарына ла тылда иштегендерге «Ада-Тӧрӧл учун Улу јууда Јеҥӱниҥ 75 јылдыгы» деген медальдарды табыштырарына эткен. Республикага бир муҥнаҥ ажыра мындый медальдар келген. Олорды табыштырар ишти эрчимделтер керек деп, тергеениҥ башкараачызы айткан.

Карды арчыыры ла суулар кӧпшип јаанаар ӧйгӧ белетенери јуунда шӱӱжилген сурактардыҥ бирӱзи болгон. Онойдо, кӧп квартираларлу туралардыҥ ла јонјӱрӱмдик учурлу тудумдардыҥ јабынтыларында кӧп кар јуулганына ајару эдилген.

Јаан кар тӱжӱп турган муниципал тӧзӧлмӧлӧргӧ – Горно-Алтайскка, Майма, Чой ло Турачак аймактарга карды чыгара тартарга ӱзеери акча-манат чыгарылганын Олег Хорохордин јетирген.

«Јабынтылардагы карды тӱжӱрер ле эл-јон јаткан јерлердеҥ карды чыгара тартар ишти эки неделениҥ туркунына бӱдӱрип салар керек» – деп, республиканыҥ башчызы айткан. Ол анайда ок суулар јаанар ла ӧрттӧр чыгар чочыдулу ӧйгӧ белетенип, јеткер болдыртпас ууламјылу эдилген иштер керегинде кӱнӱҥ сайын јетирӱ эдерин каланыҥ ла аймактардыҥ јаандарына јакыган.

Јуунда кӧрӱлген база бир сурак сӱрее-чӧпти јуунадарына учурлалган. Эл-јонноҥ јонјӱрӱмдик сетьтер ажыра комыдалдар келери улалганын Олег Хорохордин темдектеп, сӱрее-чӧпти ле таштанчыларды ӧйлӱ-ӧйинде чыгара тартарын тӧзӧзин деп јакыган. Горно-Алтайск каланыҥ башкартузыныҥ јааны Ольга Сафронованыҥ јетиргениле, калада сӱрее-чӧп салатан 526 јерде 1326 јаҥы контейнерлер тургузылган, олордоҥ 1074 контейнер – таҥынаҥ улустыҥ туралары турган јерлерде. Сӱреени чыгара тартар график ӱзӱлбези аайынча тергеелик операторлорло иш ӧдӱп турганын ол айткан.

Эл ӱлекерлерди јӱрӱмде бӱдӱргениниҥ сурактары јуунда база шӱӱжилген. Алтай Республиканыҥ јеринде тургуза ӧйдӧ 11 эл ӱлекер аайынча 47 тергеелик ӱлекерди бӱдӱрер иш ӧдӧт. Профильный ведомстволордыҥ башкараачылары ӧткӧн иш керегинде јетирӱлер эткендер.

Онойдо, АР-дыҥ иш, јонјӱрӱмдик ӧзӱм ле эл-јонды ишле јеткилдеери аайынча министри Адар Суминниҥ јетиргениле, «Демография» деп эл ӱлекердиҥ «Јаан јашту ӱйе» деген программазы аайынча тергеениҥ ыраак јурт јерлеринде јаткан 65 јаштаҥ јаан улуска медициналык болуш алары јеҥил болорын јеткилдеерге беш мобильный бригадалар тӧзӧлгӧн.

Јӧптӧлгӧн график ла диспансеризация ӧдӧр улустыҥ озолодо тургускан тооломы аайынча јаан јаштуларды аймактардыҥ тӧс эмчиликтерине су-кадыгын шиҥдеерге, диспансеризацияны ӧдӧргӧ лӧ ӱзеери шиҥжӱлер ӧткӱрерге јетиредилер. Су-кадыгыныҥ айалгазынаҥ улам арга-чыдалы ас улусты јетирерге келиштире јазалган ла јепселген кӧлӱктер бар. Быјыл тергееде мындый база беш бригада тӧзӧӧр сурак шӱӱжилет.

«Экология» деп эл ӱлекердиҥ «Ару суу» деген программазы аайынча Горно-Алтайсктыҥ эл-јонын чыҥдый ичер суула јеткилдеерге Катунский водозабордыҥ ӱлекер документтерин белетеер иш быјыл башталарын АР-дыҥ тергеелик ӧзӱм аайынча министри Олег Пьянков айткан. Ол анайда ок «Јеткер јок ло чыҥдый кӧлӱк јолдор» деген эл ӱлекер аайынча темдектелген иштер тутак јок ӧткӧнин, тергеелик 22 јолды јазаары аайынча јӧптӧжӱлер тургузар иш учына једип келгенин куучындаган.

Быјыл «Цифровая экономика» деген эл ӱлекерди јӱрӱмде бӱдӱрип, 600 кире кижи узын бийиктедер ӱредӱ ӧдӧр. Јуук ӧйлӧрдӧ јал тӧлӧбӧс баштапкы вебинарлар ӧдӧрин АР-дыҥ цифровой ӧзӱм аайынча министриниҥ молјуларын бӱдӱрген Николай Степанов айткан.

«Эл ӱлекерлерди јӱрӱмде бӱдӱрер иштер јолдыҥ карталарында темдектелген ӧй аайынча чике ӧдӧр учурлу» – деп, Олег Хорохордин јуунда темдектеген.

АР-дыҥ башкарузыныҥ пресс-службазы

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым