Настройки отображения

Размер шрифта:
Цвета сайта:
Ностройка изображения
Ностройка изображения

Настройки

Алтайдын Чолмоны

Јылдыҥ ӱренчиги – оморкодулу ла каруулу

06.03.2020

Балдардыҥ ӱзеери ӱредӱзиниҥ республикан тӧс јеринде тулаан айдыҥ 2-3 кӱндеринде «Јылдыҥ ӱренчиги-2020» деген талалык кӧрӱ-маргаан ӧтти.

Быјыл ӧткӧн кӧрӱ-маргаанда таланыҥ ончо аймактарыныҥ школдорынаҥ ла онойдо ок республикан классический лицейдеҥ, В. К. Плакастыҥ адыла адалган республикан гимназиядаҥ одус бала турушты.

Кӧрӱ-маргаан балдардыҥ јаштары аайынча ӱч бӧлӱкле ӧткӧн: оогош, орто ло јаан. Оогош бӧлӱкте (4-5 кл.) – 9, орто бӧлӱкте (6-8 кл.) – 11, јаан бӧлӱкте (9-10 кл.)  10 ӱренчик маргышты.

Эки кӱнниҥ туркунына ӧткӧн ченелтелӱ кӧрӱ-маргаанда оныҥ туружаачылары башка-башка ууламјыда маргыштылар: јайаандык таныштыру, «Широка страна моя родная» деген краевед маргаан, «Формула успеха» деп мастер-класс, «Лепбук «Семейная хроника войны» деп адалган айылга берилген јакылта, ачык-јарык айалгада куучын-эрмек, портфолио.

Талалык кӧрӱ-маргаанныҥ туружаачы-ларыныҥ кажызы ла бойыныҥ јерлеринде, аймактар кеминде, ӧткӧн кӧрӱ-маргаандарды ӧдӱп, байгалу баштапкы јерлерге чыккан балдар. Быјылгы кӧрӱ-маргаанныҥ туружаачыларыныҥ белетенижи де тыҥ, онойдо ок балдардыҥ бойлорыныҥ билгири, тӧзӧгӧзи бийик болгонын окылу жюри аҥылап темдектеген. Туружаачылардыҥ кажызы ла јеҥӱге турумкай јӱткип, кӱннеҥ кӱнге ӱредӱзиндеги арай когус, јабыс јерди илелеп, јаан ајару салып белетенгени иле.

Кӧрӱ-маргаанныҥ кӧдӱриҥилӱ јабылтазы ӧйинде балдардыҥ ӱзеери ӱредӱзиниҥ республикан тӧс јериниҥ јааны Оксана Митрофанованыҥ айтканыла, туружаачылардыҥ кажызы ла тыҥытту болгон. Мындый билгири бийик, ачык-јарык, јайаан јайалтазы бастыра јанынаҥ кӧнӱ јолыла барып јаткан балдардыҥ јанында тӧрӧл школы, класстагы башкараачызы турат деп, Оксана Сергеевна айтты. Ол  онойдо ок бу мындый јакшы балдарды таскадып јаткан ада-энелерге, олордыҥ јааналарына-таадаларына јаан быйанын айткан.

Быјылгы туружаачылар республикада амыр-энчӱ, эптӱ-јӧптӱ јаткан башка-башка укту-тӧстӱ калыктардыҥ культуразын, чӱм-јаҥын, јаҥжыгуларын јакшы кӧргӱскенин   балдарын ӱйдежип јӱрген ада-энелер, ӱредӱчилер аҥылап темдектедилер. Темдектезе, Чамалдаҥ Илья Попов алтай албатыныҥ чокчок деген аш-курсагын белетеерин јартап кӧргӱскени солун болды. Маймадаҥ келген балдар алтай кеп-кийимниҥ учуры јанынаҥ јетирӱ эдип, алтайлап куучындаганы јарамыкту. Республикада бир биледий јуртап јаткан калыктардыҥ балдары  бой-бойлорыныҥ культуразын тооп, јилбиркеп, сценадаҥ кӧргӱскени јакшы. Онойдо ок Улу Јеҥӱниҥ 75 јылдыгына учурлалган јайаан иштер база тыҥытту болды.

Окылу жюриниҥ турчылары иштеп јатканча, залда балдар сценага чыгып, бијелеп-ойноп јатканын кӧрзӧ, каруулу, ченелтелӱ эки кӱн олорго ӱзеери ийде-кӱч, омок, байрамдык кӱӱн-санаа кошкондый бодолду јакшынак айалга болды. Коштой отурган ӱредӱчиниҥ айтканыла, јурт та јердиҥ, каланыҥ да балдары теҥ-тай — бијелезе, бијелеер, кожоҥдозо, кожоҥдоор. Оноҥ балдар эки ле кӱнниҥ туркунына бир нак ӧмӧликтий, бой-бойына јуук ла таныш болгонын кӧрдис. Актовый залда јуулгандардыҥ ортодо бир јап-јакшынак алтай кызычак колында бичигин ондый ајарулу кычырып отурганын ајарып кӧрдис. Мында јаан да, јаш, оогош то улус ончозы колында телефондорлу, та кем де ойноп јат, та кем де селфи эдип, шакпырап-сандырап турды. Бичик кычырып отурган кыс Каспа јурттаҥ Ангелина Самыкова болуптыр. Ӧй келижерде, бичиктер садар магазиннеҥ садып алган бичиги, байла, сӱреен јилбилӱ болгон. Эмдиги ӧйдӧ колында бичиктӱ улусты ас кӧрӧриҥ ине. Айдарда, кычырып турган балдар бар ла болуптыр.

Кӧдӱриҥилӱ, байрамдык айалгада респупбликада «Јылдыҥ ӱренчиги» деп ададып, байгалу баштапкы јерлерге мындый ӱренчиктер чыкты.

Јаштары аайынча оогош бӧлӱкте:

1-кы јерде – Анна Казанцева, 6-чы таҥмалу лицей (Горно-Алтайск); 2-чи јерде – Кирилл Мерзляков, В. Ф. Хохолковтыҥ адыла адалган 3-чи таҥмалу школ (Майма); 3-чи јерде – Полина Болтовская П. В. Железновтыҥ адыла адалган школ (Мульта).

Орто  бӧлӱкте:

1-кы јерде – Денис Курумчин, 9-чы таҥмалу «Гармония» гимназия (Горно-Алтайск); 2-чи јерде – Ильмира Маскутова, 1-кы таҥмалу школ (Майма); 3-чи јерде – Кристина Итпалина, Ч. К. Кыдрашевтиҥ адыла адалган школ (Кан-Оозы).

Јаан бӧлӱкте:

1-кы јерде – Белла Стасикова, Ч. К. Кыдрашевтиҥ адыла адалган школ (Кан-Оозы); 2-чи јерде – Андрей Поносов, Е. Ф. Трофимовтыҥ адыла адалган школ (Паспаул); 3-чи јерде – Алина Тудашева, РКЛ.

Республикан кӧрӱ-маргаанныҥ башка-башка ууламјыларында бойлорыныҥ јаштары аайынча кӧп тоолу ӱренчиктер призерлор болуп чыктылар. Олордыҥ тоозында – Анна Казанцева (Горно-Алтайск), Ильмира Маскутова (Майма), Андрей Поносов (Паспаул), Толунай Санакова (Кулады), Денис Курумчин (Горно-Алтайск), Быйан-Суу Темеева (Улаган), Елизавета Бакашева (Сейка), Анастасия Бокова (Ыныргы), Кирилл Мерзляков (Майма), Илья Попов (Чамал), Ангелина Самыкова (Каспа), Айсуна Садыкова (Моты-Оозы), Кристина Итпалина (Кан-Оозы), Санал Мекечинов (Боочы). Окылу жюриниҥ аҥылу сыйыла В. К. Плакастыҥ адыла адалган республикан гимназияныҥ ӱренчиги Данил Дугашев кайралдатты.

Јеҥӱчилдердиҥ Москвада ӧдӧтӧн бастырароссиялык кӧрӱ-маргаанында Алтай Республикадаҥ Белла Стасикова туружар. Беллага једимдӱ, јеҥӱлӱ ачык јол кӱӱнзейдис.

К. ПИЯНТИНОВА

Е. БУТУШЕВТИҤ фотојуругы

ТОП

Положение о конкурсе рисунков «Јакшыга экелген бир учурал» («Случай, сподвигнувший к совершению доброго поступка»)

  УТВЕРЖДАЮ Приказом главного редактора АУ РА «Редакция газеты «Алтайдын Чолмоны» от 04.02.2022 № 6/1 __________ Триянова С.В.      Положение о конкурсе рисунков «Јакшыга экелген бир учурал» («Случай, сподвигнувший к совершению доброго поступка»), посвященном 100-летию национальной газеты «Алтайдын Чолмоны»   Общие положения Положение определяет условия, основы организации и проведения творческого конкурса, посвященного 100-летию республиканской

Положение о литературном конкурсе «КУУЛГАЗЫН КААЛГА» («Волшебные ворота»)

УТВЕРЖДАЮ Приказом главного редактора АУ РА «Редакция газеты «Алтайдын Чолмоны» от 04.02.2022 № 6/1 __________ Триянова С.В.        ПОЛОЖЕНИЕ о литературном конкурсе юных писателей—авторов сказок, посвященный 100-летию национальной газеты «Алтайдын Чолмоны», «КУУЛГАЗЫН КААЛГА» («Волшебные ворота»).   Организатор: АУ РА «Редакция газеты «Алтайдын Чолмоны».   Общие положения Положение определяет условия, основы организации и проведения

Положение о конкурсе молодых журналистов «МӦҤӰН КАЛАМ» («Серебряное перо»)

  УТВЕРЖДАЮ Приказом главного редактора АУ РА «Редакция газеты «Алтайдын Чолмоны» от 24.01.2022 № 6/1 __________ Триянова С.В.       Положение о конкурсе молодых журналистов, посвященном 100-летию национальной газеты «Алтайдын Чолмоны», «МӦҤӰН КАЛАМ» («Серебряное перо»)     Общие положения Положение определяет условия, основы организации и проведения творческого конкурса, посвященного 100-летию республиканской массовой газеты «Алтайдын Чолмоны». Настоящее Положение