Алтайдын Чолмоны

Эпшилер сӱӱжинде – бӱткӱл телекей

13.03.2020

Ӱй улустыҥ телекейлик кӱнине учурлалган кӧдӱриҥилӱ јуун Павел Кучияктыҥ адыла адалган эл театрда тулаан айдыҥ 6-чы кӱнинде ӧтти.

Байрамдык кӧдӱриҥиниҥ туружаачыларын Алтай Республиканыҥ башчызы, башкарузыныҥ председатели Олег Хорохордин, Эл Курултайдыҥ председатели Владимир Тюлентин ле онойдо ок ӧскӧ дӧ чыгартулу улус уткудылар.

«Јастыҥ јараш байрамыныҥ алдында мен слерди, телекейди кееркеткен эпшилерди, акту кӱӱнимнеҥ уткуп, слерге айыл-јурттагы, биледеги амыр-энчӱ, сӱӱш ле ајару, керсӱ ле чындык тоомјы учун јаан алкыш-быйанымды айдадым» – деп, республиканыҥ башкараачызы уткуулду сӧзинде айтты.

Таланыҥ башчызы О. Хорохордин онойдо ок ветеран эпшилерге, Ада-Тӧрӧл учун Улу јууныҥ туружаачыларыныҥ тул арткан эш-нӧкӧрлӧрине, тылда иштеген эпшилерге јаан быйанын айдып, јастыҥ јараш байрамыла уткыды. «Слер от-калапту јуу-чактыҥ јылдарында јурт ээлемде турумкай, нерелӱ, ак-чек иштеп, фронтты бары-јогорло, керектӱ ончо не-немеле јеткилдеп, Улу Јеҥӱни јууктатканар. Быјыл бис Улу Јеҥӱниҥ 75 јылдыгын кӧдӱриҥилӱ айалгада темдектеерис» – деп, ол аҥылап чокымдады.

Ол онойдо ок уткуулду куучын-эрмегинде Алтай Республиканыҥ ичкери ӧзӱмдӱ јолы учун башка-башка ууламјыларда – ӱредӱликте, су-кадыкты корыырында, јурт ээлемдикте, экономикада ак-чек иштеп јаткан эпшилерге јаан быйанын айтты.

Талада јаш ӱйеге оморкогодый, јозок алгадый эпшилер, энелер кӧп. Алтай Республикада беш ле оноҥ кӧп балдар азырап таскаткан 926 энеге «Быйанду Эне» («Почитаемая мать Республики Алтай») деген кӱндӱлӱ ат адалган. Алтай Республиканыҥ «Таҥ Чолмон» («Утреняя Звезда») деген бийик кайралыла 18 эпши кайралдаткан.

Кӧдӱриҥи ӧйинде «75 лет Победы в Великой Отечественной войне 1941-1945 г.г.» деген юбилейлик медальдарла тылда иштеген Мария Алексеевна Барантаева, Раиса Михайловна Жданова, Адесса Федоровна Рыбакова, Екатерина Васильевна Сафронова, Нина Владимировна Суразакова, Клара Антоновна Тобоева, Людмила Николаевна Штанакова кайралдаттылар.

Россия Федерацияныҥ нерелӱ ӱредӱчизи Ирина Картополовага бойыныҥ профессионал ла јондык ижинде једимдери, онойдо ок таланыҥ јондык-экономикалык ӧзӱмине јетирген јӧмӧлтӧ-болужы, калыктар ортодо амыр-энчӱни, најылыкты тыҥыдары ла ӧмӧ-јӧмӧ ижи учун «Алтай Республиканыҥ кӱндӱлӱ кижизи» деген кӱндӱлӱ ат адалды.

«Алтай Республиканыҥ ӱредӱлигиниҥ нерелӱ ишчизи» деген кӱндӱлӱ атла Маймадагы балдардыҥ санаттар школыныҥ ӱредӱчизи Нина Кулиева ижинде јеткен једимдери учун адатты.

«Алтай Республиканыҥ нерелӱ ишчизи» деген ат Турачак аймактыҥ јурт јеезелер ортодогы «Јайаандыктыҥ ла амыраштыҥ туразы» деген библиотеказыныҥ балдардыҥ бӧлӱгиниҥ јааны Ольга Нетешавага таланыҥ культуразыныҥ ӧзӱминде једимдӱ ижи учун адалды.

«Быйанду Эне» («Почитаемая мать Республики Алтай») деген кӱндӱлӱ ат-јолло Кан-Оозы аймактыҥ Моты-Оозы јуртынаҥ Чачак Казакулова балдарын јакшынак, шыраҥкай таскатканы ла билениҥ тӧзӧлгӧзин бектештирериндеги јозокту ижи учун кайралдатты.

Алтай Республиканыҥ Кӱндӱлӱ грамотазыла Алтай Республикада баланыҥ тап-эриктери аайынча чыдулалган чыгартулу кижи Надежда Манзырова балдардыҥ ла эр кемине јеткелек балдарлу билелердиҥ тап-эриктерин ле јасакла чыдулалган јилбӱлерин корыыры аайынча иште јеткен једимдери ле кӧп јылдардыҥ туркунына ак-чек ижи учун кайралдатты.

Кӧдӱриҥиде Алтай Республиканыҥ Эл Курултайыныҥ председатели Владимир Тюлентин эпшилерди Ӱй улустыҥ телекейлик байрамыла база уткуды.

«Бу јылу, јарык јаскы байрам эпши кижиниҥ сӱр-кебериле колбулу ла сӱӱшке, амыр-энчӱге учурлалат. Бӱгӱнги кӱнде слер эр улусла теҥ-тай ла ижерде јаан једимдерге једип јадыгар. Алтай Республиканыҥ јадын-јӱрӱминиҥ башка-башка ууламјыларында, темдектезе, аргачылыкта ла јайаандыкта, јондык ла культуралык јӱрӱминде бойоорды бастыра јанынаҥ чындык ла толо кӧргӱзедер.

Јаҥыс ла эпши улус јаҥы јӱрӱмди сыйлап јат. Телекейди сӱӱшле јарыдат, билелик очоктыҥ јылузын чеберлейт. Кандый да ӧйдӧ бек ле нак биле су-кадык јондыктыҥ – улу ороонныҥ тӧзӧгӧзи болгон. Билениҥ тӧзи, очогыныҥ коручылы болуп эпши кижи артат» –деп, ол айтты.

Кӧдӱриҥиниҥ туружаачыларына В. Тюлентин быјылгы јылда ороонныҥ президенти В. Путинниҥ РФ-тыҥ Федерал Јуунына ийген Баштанузында јаан ајаруны билениҥ аҥылу учурына эткенин эзетти. Билеге јондык јӧмӧлтӧ лӧ онойдо ок кӧп балдарлу билелерди јӧмӧп-болужары јанынаҥ айтканын чокымдады. Спикердиҥ айтканыла, бистиҥ республикада энеликти ле бала тужын јӧмӧӧри, билелик јаҥжыгуларды тыҥыдып, ичкери ӧскӱрери аайынча јаан иш ӧткӱрилет.

Спикер аҥылу алкыш-быйанын энелерге, јаанактарга айтты. Шак олор Ада-Тӧрӧл учун Улу јууныҥ јылдарында тылда нерелӱ иштеген. Јалтанбас јуучылдарла-јайымдаачыларла теҥ-тай, јана баспай иштеп, Улу Јеҥӱни јууктаткан.

«Кару бистиҥ баалап, оморкоп ло тооп јӱрген эпшилерис! Салым слердиҥ јӱрӱмигерде сӱӱнчини, ачык-јарык кӱӱн-санааны, кӱлӱмјини јаантайын сыйлазын. Кандый да ӧйдӧ сӱӱш экијандай болзын, јаныгарда јаантайын јуук ла кару улузар јӱрзин» – деп, спикер бойыныҥ кӱӱнземелин айтты.

Владимир Тюлентин Алтай Республиканыҥ Эл Курултайыныҥ Кӱндӱлӱ грамоталарын кӧдӱриҥилӱ айалгада табыштырган: ӱредӱлик бӧлӱгинде ак-чек ле једимдӱ иштегени ле бийик једимдери учун Надежда Васильевна Носовага, Маймадагы балдардыҥ «Медвежонок» деген детсадыныҥ кичӱ таскадаачызына; Наталья Анатольевна Холманскаяга, Маймадагы балдардыҥ «Олененок» детсадыныҥ таскадаачызына; Наталья Глебовна Шапошниковага, каладагы балдардыҥ 3-чи таҥмалу «Хрусталек» детсадыныҥ таскадаачызына;

Журналистика бӧлӱгинде јеткен једимдери ле кӧп јылдардыҥ туркунына ак-чек иштегени учун Марина Павловна Кулеевага, «Эл Алтай» телерадиокомпанияныҥ телекӧрӱлтениҥ јетирӱлер программазыныҥ службазыныҥ программаларын ӧткӱреечизине;

Алтай Республиканыҥ культура ла санат ӧзӱмине јетирген једимдери ле ак-чек ижи учун Лариса Петровна Бабановага, Оҥдой аймактыҥ культурно-амыраш тӧс јериниҥ методико-библиографический бӧлӱгиниҥ јаанына; Татьяна Валентиновна Пьянковага, Бешпелтирдеги Культура байзыҥыныҥ художественный башкараачызына; Галина Владимировна Стеблецовага, Чопош јурттыҥ Культура байзыҥыныҥ бӧлӱгиниҥ јаанына.

Алтай Республиканыҥ Эл Курултайыныҥ Быйанду самаразы элбек јетирӱлер эдер эп-аргаларда профессионал ижиндеги једимдери ле кӧп јылдардыҥ туркунына ак-чек ле једимдӱ ижи учун «Эл Алтай» телерадиокомпанияныҥ корреспонденти Аруна Сергеевна Монголовага табыштырылды.

Ӱй улустыҥ телекейлик кӱнине учурлалган байрамдык кӧдӱриҥи бийик кеминде ӧтти, кӧп кӱӱнземелдер айдылды, оныҥ туружаачыларына јакшынак ойын-концерт болды.

К. ПИЯНТИНОВА