Медучилище ойто кычырган...

Медучилище ойто кычырган…

02.04.2020

Быјыл кочкор айда Горно-Алтайсктагы медицинский колледжти 1947-1975 јылдарда божоткондордыҥ туштажузы ӧтти. Бу туштажуны ӧткӱрер баштаҥкайды бистиҥ акушерлер белетеер группаныҥ 1970 јылдагы выпускниктери эткен. Тӧзӧмӧл комитет тӧзӧлип, белетеништӱ иш 2019 јылдыҥ јаҥар айынаҥ ала башталган.

Туштажу ӧткӱреечи комитет колледжтиҥ башкараачыларыла колбу тудуп, туштажу ӧткӱрери јанынаҥ јӧптӧшкӧн. Олор ажыра архивтердеҥ выпускниктерди бедирегенис. Јарды телекӧрӱлте, газет ле республиканыҥ ончо медучреждениелери ажыра бергенис, телефон до сокконыс.

Кочкор айдыҥ учында медколледжте бисти студенттер уткуп, бӱткӱл эҥир биске ајару эткендер. Колледж ӱредӱни божоткон јылы бичилген «Выпускник» деп юбилейлик значок белетеп, ончо келгендерге тагып берген. Онойдо ок колледжте выпускниктердиҥ озолодо берген фотографиялары илилген стенд болгон. Бир группада ӱренгендердиҥ педагогторло туштажузы эҥ ле ӧкпӧӧриштӱ болгон. Колледжтиҥ студенттери ле башкартузы келген улуска колледжле таныштыру ӧткӱрген. Выпускниктер аудиторияларла базып, ӱредӱде не кубулганын, не кубулбаганын бойлорыныҥ кӧстӧриле кӧргӧн. Студенттердиҥ ӱредӱзи чын ла стационарда ошкош, бӱгӱнги кӱнниҥ јепселдериле јеткилделген палатада ӧдӱп турганын олор тыҥ кайкашкан.

Эҥир-туштажуныҥ сценарийи јакшы тургузылган. Байрамдык ла сӱӱнчилӱ айалгада колледжтиҥ јайаандык ӧмӧликтериниҥ концерти ӧткӧн. Актовый залда кожоҥныҥ «Пульс», бијениҥ «Вдохновение» студиялары, «Учар» ансамбль ойын-концерт берген. Олордыҥ кеп-кийимдери кандый јараш! Бис эмдиги студент-медиктер кандый јайалталу болгонына сӱӱндис! Олор Шуну Четпоев, Арина Архипова, Артем Купчин, Елена Жиленкова, анчада ла ончо улусты кожо кожоҥдоорына кӧкиткен Суркун Серкин. Јуулган ветерандардыҥ кӧстӧрине ӧкпӧӧргӧнинеҥ јаш та толгон эди.

Туштажуга 1947 јылдаҥ ала 1975 јылга јетире выпускниктер јуулган — 125 кижи. Ӧскӧ тергеелерде де иштеген улус келген: Саха (Якутия) Республикадаҥ, Томсктоҥ, Белокурихадаҥ, Барнаулдаҥ, Алтай крайдыҥ коштойында Платово ло Ая јурттарынаҥ. Олордыҥ ортозында эҥ ле кӧп улус 1970 ле 1973 јылдардыҥ выпускниктери болгон. 1947 јылда ӱредӱзин божоткон кижи
Л. М. Жданова, 1948 јылда — Н. И. Казанина, 1949 јылда божоткон Р. И. Берегошева болдылар. Туштажуда сӱӱген преподавательдер, педагог иштиҥ ветерандары З. А. Голубева (ӧскӧ ороондордыҥ тилдерине ӱреткен), Е. К. Байрымова (Россияныҥ нерелӱ врачы, хирургияла ӱреткен), Л. М. Астафьева (анатомияныҥ преподаватели), А. А. Котов (обществознаниениҥ преподаватели, училищениҥ комсомол организациязыныҥ качызы, завуч), ол бойыныҥ эш-нӧкӧриле, база бистиҥ выпускницала кожо болдылар.

Училищениҥ выпускниктериниҥ ортодо мындый јарлу врачтар болды — Э. Я. Бедюрова, В. Д. Потехин, Т. К. Кудирмекова, су-кадыкты корыырыныҥ отличниктери В. И. Самыкова, Л. А. Красилова, Л. А. Климова, Р. В. Цыганкова ла ӧскӧлӧри де.
Р. В. Цыганкова (Иванова) керегинде тоолу сӧслӧ дӧ болзо айдып ийейин. Ол 1932 јылда Улаган аймактыҥ Чолушман јуртында чыккан. Ӧскӱс. Училищеге 1952 јылда кирген. Эки јылдаҥ оны божодып, Кош-Агаш аймактыҥ тӧс эмчилигине иштеп барган, ондо 40 јыл старший операционный сестра, оноҥ баш медсестра болуп иштеген. Ол «Су-кадыкты корыырыныҥ отличниги» темдекле, Калыктардыҥ најылыгы орденле кайралдаткан, РФ-тыҥ Иштиҥ ветераны, тылдыҥ ишчизи. Раиса Владимировнаныҥ балдары Ольга ла Игорь бу ла училищени божодып, иштеп јӱрӱлер. Келди Татьяна база мында ӱренген. Бу јӱк бир ле выпускниктиҥ салымы, билелик медишчилердиҥ јозокту јолы. Ондый укту-тӧсту медишчилер бисте ас эмес.

Туштажуныҥ учында «Медиктердиҥ гимни» кожоҥдолды, фотојуруктар согулды. Бисти, 65-90 јашту выпускниктерди, колледжтиҥ студенттери колледжтиҥ казанчыларыныҥ быжырган тату калаштарыла, чайла кӱндӱледилер. Онойдо ок кажы ла группаныҥ улузы бойлоры ортодо база да узак куучындаштылар.

Колледжтиҥ башкараачыларына, директор Елена Владимировна Кречетовага, ӱредӱлӱ бӧлӱктиҥ заведующийи Дилек Валерьевна Албановага ла тӱӱкиниҥ преподаватели, музейдиҥ јааны Анна Александровна Кофшарьга туштажуны ӧткӱреринде болушкандары учун јаан быйаныс айдадыс. Јаан јашту улуска ондый кӧп сӱӱнчи сыйлап, байрамду айалга тӧзӧӧри јаан учурлу ла быйанду керек эмей. Бис бу јаркынду ла јылу айалгада ӧткӧн туштажуны узакка ундыбазыс.

В. К. УЛТАРИКОВА (Кинстлер)

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина