Настройки отображения

Размер шрифта:
Цвета сайта:
Ностройка изображения
Ностройка изображения

Настройки

Алтайдын Чолмоны

Ајаруда — медишчилерге тӧлӧйтӧн тӧлӧмирдиҥ сурактары

21.05.2020

Россия Федерацияныҥ президентиниҥ Сибирьдеги федерал округтагы чыдулу чыгартулу кижизи Сергей Меняйло Сибирьдиҥ тергеелеринде коронавирусный инфекцияны болдыртпазы ла оныҥ таркаарыла тартыжары аайынча координационный штабтыҥ јуунын ӧткӱрди.

Видеоконференцияныҥ ээжизи аайынча ӧткӧн јуунда Алтай Республиканыҥ башчызы Олег Хорохордин турушты.

Јуунда COVID-19-ту граждандарга болуш јетиреринде туружып турган медишчилерге јилбиркедиштӱ тӧлӧмирлерди тӧлӧӧри ле онойдо ок эл-јонды санитарно-эпидемиологиялык јарамыкту айалгала јеткилдеер эп-аргалардыҥ ӧйин узадары јанынаҥ сурактар шӱӱжилди.

«Ооруныҥ анда-мында табылып турганын, ол тоодо кемиле јаан да болгонын ајаруга алып, ончо талаларда айалга коомой јаны јаар кубулгадый болгонын ажындыра ајаруга тудуп, ӱзеери коечный фондты элбеде белетеери јанынаҥ темдектелген чокым иш болор керек» — деп, С. Меняйло айткан.

Полпредтиҥ темдектегениле, коронавирусла оору улуска болуш јетирип турган су-кадыкты корыырыныҥ ишчилерине ӱзеери јилбиркедиштӱ кожулта акча тургуза ӧйдӧ аҥылу ајаруда турат. Округтыҥ медишчилери тулаан ла кандык айларда 560 миллион салковойдоҥ ажыра акча алган.

«Јарадылган, јӧптӧлгӧн акча-манат ӧйинде ле толо кеминде тӧлӧлӧр учурлу. Шак бу сурак баштапкы јерде турат. Нениҥ учун дезе тургуза ӧйдӧ шак ла медициналык специалисттер «тӧс јерде» иштеп јат» — деп, ол темдектеп тура, тӧлӧмирлерди тӧлӧӧри аайынча ээжини јартаар ишке аҥылу ајару эдер деген. Келип турган комыдалдарды кӱнӱҥ сайын кӧрӧри јанынаҥ кожулта этти.

РФ-тыҥ Президентиниҥ јарлыгы аайынча талалардыҥ башчыларына јербойында кирелендириштер эдерин эмезе этпезин тургуза ӧйдӧги санитарно-эпидемиологиялык айалгадаҥ кӧрӱп, чокымдап этсин деп јакылта берилген. Сибирьдиҥ тергеелеринде кандык айда строительный, јолдор бӧлӱктерине, тӧс промышленный предприятиелерге иштеерге јарадылган болгон. Промышленный товарлар садар предприятиелер, парикмахерскийлер, химчисткалар ла ӧскӧ дӧ организациялар ижин табынча ойто баштап, кӧндӱктирер.

Чыдулу чыгартулу кижи аҥылап, чокымдап темдектеди: бӱгӱнги кӱнде кирезинде тудулу эп-аргаларды јабызадып тура, эпидемиологиялык айалганы уйададарын чек болдыртпазы сӱреен керектӱ. Шак оныҥ учун мынаҥ да ары эл-јон ортодо коронавирусный инфекцияга тестти ӧткӱретен ишти элбедер, социальный дистанцияныҥ ээжизин артыргызар, коруланып-чеберленетен ӧскӧ дӧ аргаларды тузаланар. Оноҥ башка, айалганыҥ аайын ажындыра кыракы кӧрӱп, тудуларды табынча чечер белетеништӱ ишти бойыныҥ ӧйинде ӧткӱрер.

Алтай Республика јанынаҥ айдар болзо, коронавирусный инфекциялу оору улуска медболуш јетиреринде турушкан ончо медицинский ишчилер кандык ай учун јилбиркедиштӱ тӧлӧмирлерди толо кеминде алган. Шак бу керекке талага федерал бюджеттеҥ 16 млн салковойдоҥ ажыра акча чыгарылган.

Таланыҥ су-кадыкты корыырыныҥ системазыныҥ ишчилери коронавирусла оорыган улусла иштегени учун тӧлӧмирди РФ-тыҥ башкарузыныҥ эки јӧбиле, АР-дыҥ башкарузыныҥ јӧбиле алып јат.

Россия Федерацияныҥ бир јӧбиле тӧлӧмирдиҥ кеми 2019 јылдыҥ 9 айыныҥ туркунына иштеген ижиниҥ ортоайлык кирелтезинеҥ чоттолып јат. Кандык ай учун текши тӧлӧмирдиҥ кеми 2 млн 233 муҥ салковой акчаны 262 медишчи алган, олордыҥ ортозынаҥ 65 врач, орто медперсоналдыҥ 158 ишчизи, кичӱ медперсоналдыҥ 39 ишчизи. Тӧлӧмирлер иштиҥ аҥылу айалгазы ла коронавирусный инфекциялу граждандарга медјеткилдеш јетирген медишчилерге ӱзеери иш-јӱк учун тӧлӧлгӧн.

Россия Федерацияныҥ база бир јӧби аайынча медишчилерге эдилген јилбиркедиштӱ тӧлӧмирлер фиксированный. Ӱзеери акчаны «скорыйдыҥ» ишчилери алып јат: врачтар ай сайын — 50 муҥ салковойдоҥ, орто медперсонал ла тискинчилер 25 муҥ салковойдоҥ алат. Стационарлардыҥ врачтарына ай сайын 80 муҥ салковойдоҥ, орто медперсоналга — 50 муҥнаҥ, кичӱ медперсоналга 25 муҥ салковойдоҥ тӧлӧлӧр. Шак мындый јӧмӧлтӧ-болуш коронавирусный инфекция табылган граждандарга медболуш јетиреринде турушкан ла аҥылу каруулу иш бӱдӱрген ӧскӧ дӧ ишчилерге јарадылган.

Кандык ай учун јилбиркедиш учурлу тӧлӧмирди медорганизациялардыҥ 166 ишчизи — 39 врач, орто медперсоналдыҥ 72 ишчизи, кичӱ медперсоналдыҥ 31 ишчизи, 24 тискинчи алган. Текши кеми 13 млн 926 муҥ салковой акча-манат.

Таланыҥ бюджединеҥ медиктерге кандык ай учун 12 млн 692 муҥ салк акча чыгарылган. Тӧлӧмирлерди коронавирусный инфекцияла југужар чочыдулу группага кирип турган ла федерал јӧптӧргӧ кирбеген ишчилер алар.

Кӱӱк ай учун јилбиркедиштӱ тӧлӧмирлер кичӱ изӱ айдыҥ 15-чи кӱнине јетпей јадып чоттолып калар.

Алтай Республикада коронавирусный инфекцияла оору улуска болуш јетирип турган ишчилерге јилбиркедиштӱ тӧлӧмирлерди тӧлӧӧри јанынаҥ сурактарла «изӱ линия» иштеп јат.

АР-дыҥ башкарузыныҥ пресс-службазы

ТОП

Олег Хорохордин. Алтай Республиканыҥ бажында — бир јыл

       Олег Хорохордин Алтай Республиканы туй ла бир јылдыҥ туркунына башкарып јат. Бу кыска ӧйгӧ тергееде ондор тоолу школдор, балдардыҥ садиктери, фельдшерско-акушерский пункттар, јолдор ло кӱрлер чыныкталып тудулган. Башчы келер ӧйгӧ оноҥ до кӧп иштер темдектеп алган.        Олег Хорохордин, Алтай Республиканыҥ башчызы, башкарузыныҥ председатели: «Мени Алтай Республиканыҥ удурумга башчызыныҥ молјуларын бӱдӱрер јамыга тудардаҥ  озо

«Подвиг и Слава!»

Положение о республиканском конкурсе детских рисунков и сочинений «Подвиг и Слава!», посвященного  75-летию Победы в Великой Отечественной войне 1941 — 1945 гг., на страницах республиканских газет «Алтайдын Чолмоны» и «Звезда Алтая» Общие положения Республиканский конкурс творческих работ «Подвиг и Слава!» (далее — Конкурс) направлен на повышение интереса детей Республики Алтай к изучению российской истории, сохранению

«Эҥ баштапкы болуп Гуркин артар…»

«Jаҥы jурукчылар чыгар, оны (кеендик-санатты) европей кемине кӧдӱрер, jе бу jолдо эҥ баштапкы болуп Г. И. Гуркин артар…»—деп, 1907 jылда Григорий Ивановичтиҥ Томск калада ӧткӧн таҥынаҥ баштапкы кӧрӱзи керегинде  Петербургтыҥ критиги М. Далькевич бичиген. Оноҥ бери  чактаҥ ажыра ӧй ӧтти. «Гуркин» деген телекейди эмдиги улус бойына ӧткӧн чактыҥ 80-90 jылдарында ачып баштаган. Ороондо башталган политикалык