Башчы государственный кайралдарды табыштырган

16.06.2020

Культураныҥ ла искусствоныҥ бӧлӱгинде једимдерге јеткен улуска Григорий Чорос-Гуркинниҥ адыла адалган государственный сыйды, анайда ок Алтай Республиканыҥ башкарузыныҥ сыйын Алтай Республиканыҥ башчызы Олег Хорохордин кичӱ изӱ айдыҥ 11-чи кӱнинде табыштырган.

«Бистиҥ республиканыҥ эҥ ле јайалталу улузын государственный сыйларла кайралдаарга бӱгӱн бис мында јуулыштыс, олордыҥ кажызы ла — јайалталу кижи, бистиҥ тергеениҥ оморкодузы. Онызын мен республиканыҥ аймактарыла ишмекчи јол-јорыктарда болуп турала, јаантайын кӧрӱп јадым» — деп, башчы айткан.

Оныҥ аҥылап темдектегениле, Григорий Чорос-Гуркинниҥ адыла адалган бу сыйды табыштырары оныҥ чыкканынаҥ ала 150 јылдыгы темдектелип турган ӧйдӧ анчада ла јаан учурлу. Литератураныҥ ла искусствоныҥ бӧлӱгинде јаан једимдерге јеткени учун 75 муҥ салковойлу сыйла быјыл РФ-тыҥ Бичиичилер биригӱзиниҥ турчызы, РФ-тыҥ культуразыныҥ нерелӱ ишчизи, Алтай Республиканыҥ Албаты кайчызы Иван Шинжин кайралдалган. Анайда ок бу сыйла культураныҥ ла искусствоныҥ ӧзӱмине јаан камаанын јетиргени, ойноор киноны тергееде таркадып турганы учун «Эл Алтай» телекомпанияныҥ телекӧрӱлте аайынча режиссеры Михаил Кулунаков база кайралдаткан.

Алтай Республиканыҥ башкарузыныҥ культураныҥ ла искусствоныҥ бӧлӱгинде 2019 јылда јеткени учун 50 муҥ салковойлу сыйы база јӧптӧлгӧн болгон.

Культураныҥ ла искусствоныҥ, кӱӱлик искусствоныҥ бӧлӱгинде једимдӱ ӱредӱлик ижи, орус культураны чеберлеерине ле ӧскӱрерине, јаш ӱйениҥ эстетический таскамалына јаан камаанын јетиргени учун мындый сыйла орус албаты ойноткылардыҥ «Ырысту» оркестриниҥ башкараачызы, балдардыҥ Горно-Алтайсктагы 2-чи таҥмалу кӱӱлик школыныҥ преподаватели, Алтай Республиканыҥ нерелӱ артисти Юрий Михеев кайралдаткан.

Јурукчы, Россияныҥ Јурукчылар биригӱзиниҥ турчызы, Алтай Республиканыҥ культуразыныҥ нерелӱ ишчизи, «Россияныҥ јурукчыларыныҥ биригӱзи» деген текшироссиялык јайаандык јондык организацияныҥ Алтай республикан бӧлӱгиниҥ председатели Елена Тодышева јуранарыныҥ искусствозын эрчимдӱ таркадып, јуруктардыҥ кӧрӱлерин тӧзӧп, јурукчыларды текшироссиялык ла албатылар ортодо кеминде ичкерледип турганы учун кайралдаткан.

Искусствоныҥ Чамалдагы школыныҥ художественный бӧлӱгиниҥ преподаватели Яков Янкинов балдарды јуранарыныҥ узына ӱредеринде бийик профессионализми, јайаандык иште кӧп јылдардыҥ туркунына ак-чек иштеп, јашӧскӱримниҥ эстетикалык, кӧгӱстик таскамалына камаанын јетиргени учун кайралдатты.

Анайда ок бу кӧдӱриҥи ӧйинде Олег Хорохордин тӧшкӧ тагар «Изӱ јӱрек» деген темдекти Маймадагы В. Ф. Хохолковтыҥ адыла адалган 3-чи таҥмалу орто текшиӱредӱлик школдыҥ 6 «К» клазыныҥ ӱренчиктери Евгений Брошевке ле Владислав Мирошниченкого тӱбекке алдырткан улуска болужар тушта јалтанбазын, турумкайын, ат-нерезин кӧргӱскени, улуска кижилик кӱӱндӱ болгоны учун табыштырган.

«Слердиҥ јалтанбазыгар — слерге кураа балдарга јакшынак јозок. Слер тураныҥ јанында ӧрт-тӱбекти бойыгар ӧчӱрип, јаан ӧрт-тӱбек болбозын јеткилдегенигер. Оныҥ јаныла ӧткӱре баспай, ӧчӱрип салганыгар. Чындап та, изӱ јӱрегер учун слерге јаан быйан. Чындык уулдар таскаткан ада-энелердиҥ алдына бажысты эҥилтедис» — деп, тергеениҥ башкараачызы айткан.

Россияныҥ Кӱниниҥ алдында дезе Олег Хорохордин Алтай Республиканыҥ ӱренчиктерине паспорттор табыштырган: Горно-Алтайсктагы 7-чи таҥмалу школдыҥ ӱренчиги Алтынсай Керексибесовага, 4-чи таҥмалу кадет школдыҥ ӱренчиги Роман Мальцевке ле И. З. Шуклинниҥ адыла адалган 6-чы таҥмалу лицейдиҥ ӱренчиги Арина Володинага. Олорго анайда ок Алтай Республиканыҥ башчызыныҥ, башкарузыныҥ председателиниҥ Кереес адрези табыштырылган.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина