Алтайдын Чолмоны

Почтальондор — сакылталу айылчылар

09.07.2020

Јаан изӱ айдыҥ 12-чи кӱнинде Россияныҥ почтазыныҥ кӱни — почтаныҥ ишчилериниҥ профессионал байрамы темдектелет. Бу јакшынак байрам Россия Федерацияныҥ президентиниҥ 1994 јылдыҥ кӱӱк айыныҥ 16-чы кӱнинде јараткан 944 таҥмалу јарлыгыла темдектелет.

Бистиҥ Кан-Оозы аймакта Јабаган јурттыҥ почта бӧлӱгинде ченемелдӱ, ачык-јарык кылык-јаҥду Рита Бильтинова ла Наталья Бокова деген почтальондор иштеп јат. Почтаныҥ бӧлӱгин Айжана Ялбакова башкарат, бойыныҥ ижин јакшы билер ченемелдӱ башкараачы. Айжана Дмитриевнадаҥ озо ОПС-тыҥ јааны болуп Марина Бурбуева иштеген. Ижинде јеткен једимдери ле 2012 јылдыҥ турулталары учун оныҥ фотојуругы Алтай Республиканыҥ «Почта России» УФГС-ныҥ Кӱндӱниҥ доскозына тургузылган болгон. Бу  ок јылда ол кӧп јылдардыҥ туркунына ак-чек ле једимдӱ ижи учун «Почта России» ФГУП-тыҥ Быйанду самаразыла кайралдаткан.

Каруулу иштиҥ кандый ла бӱдӱминиҥ кӧп лӧ јанын почтаныҥ јааны апарат. Јылула јеткилдешти, иштеерге јарамыкту айалганы олор бойлоры чыҥдый тӧзӧп алат. Почтаныҥ тегин ишчизине единица (кочегар ла техперсонал) чыгарылбай јат. Почтада кандый да ӧйдӧ улус та, иш те кӧп. Мында ла келген корреспонденцияны алып, сорттоп-ылгаштырып, суруузы-адрези аайынча бичип јат. Газет-журналдардыҥ ортозында, темдектезе, су-кадыктыҥ, маала ажыныҥ, садтыҥ сурактарына учурлалган журналдар, онойдо ок балдарга, ӱредӱчилерге ле о. ӧ кӧп тузалу журналдар. Улуска келген посылкалар, бандерольдор база кӧп. Јурттыҥ эл-јоны мында ла свет, телефон, коммунальный јеткилдеш учун тӧлӧп јат. Газет-журналдарга бичидиш ле оноҥ до ӧскӧзи бар. Бу ижине ӱзеери почтаныҥ Јабагандагы бӧлӱги аш-курсакла, промышленный товарла эл-јонды јеткилдейт. Керек дезе бистиҥ јерге јарамыкту сӱреен јараш чечектердиҥ ӱренин садат.

Почтаныҥ ишчилери эл-јонго ачык-јарык, јалакай кӱӱндӱ. Шак оныҥ учун олордыҥ товары болзын, курсак-тамагы болзын, чӱрче ле таркай берет. Калганчы ӧйдӧ почтаныҥ эл-јонго јетирип турган јеткилдежиниҥ кеми база элбеп јаанады. Јеткилдештиҥ јаҥы бӱдӱми — Почта Банк иштеп кӧндӱкти. Интернетте тузаланаачылардыҥ тоозы база кӧптӧди. Ӧмӧликтиҥ ӧмӧ-јӧмӧ ижиниҥ шылтузында газет-журналдарга бичидиш аайынча јакылта база јакшы бӱдет.

Почта колбуныҥ ижинде, азыйдагызы ла чылап, тӧс јерде почтальондор турат. Эҥ ле керектӱ улус олор ине: јылдыҥ кандый ла ӧйинде јурттыҥ эл-јонына газет-журналын, онойдо ок пенсионерлерге пенсияларын јетирет, олордыҥ айылдарына сӱӱнчи экелет.

Јурттыҥ почтальондорыныҥ айтканыла, кӧп кычырып, газет-журналдарга бичидип турган эрчимдӱ кычыраачылар кӧп. Олордыҥ тоозында: Л. Еркина, Т. Тайтакова, А. Калкин, Н. Папандыев,
С. Селешева, В. Кармандаева, Р. Терпекова, Т. Мерушева, В. Тулентина, Г. Ильмекова ла ӧскӧлӧри де. Јуртта эҥ ле кӧп кычырып, јилбиркеп тургандар — јаан ӱйениҥ улузы. Јаш ӱйе дезе јетирӱлерди Интернеттеҥ кӧрӧрин артыксынат. Пенсиязын, сӱӱген газедин, журналын ӧйлӱ-ӧйинде алганы почтальонныҥ ак-чек ижинеҥ кӧнӱ камаанду эмей. Јаан ӱйениҥ улузына почтальон сакылталу айылчы деп айдарга јараар.

Почтальондорго пенсияны ӱлеер тужында ајарыҥкай, каруулу, ак-чек болотоны сӱреен керектӱ. Мында јастырарга јарабас. Бистиҥ почтальондорыс газетке бичидетен јаан ишти билгир тӧзӧп ӧткӱрет. Бис,  кычыраачылар, темдектезе, «Алтайдыҥ Чолмоны» эл газетти, онойдо ок бойыстыҥ аймагыстыҥ «Ӧйдиҥ ӱни» газедин энчикпей сакып, бажынаҥ ала учына јетире кычырадыс.

Почтальоныс Рита Бильтинованыҥ ченемели байлык, ол узак јылдардыҥ туркунына јакшы иштеп јат. 2016 јылда аймактыҥ газеди ӧткӱрген «Подпиши и выиграй приз» деген кӧрӱ-маргаанда туружып, ол экинчи јер алган. Ол дипломло, аймактыҥ јааныныҥ Кӱндӱлӱ грамотазыла кайралдаткан. Рита Марышевна онойдо ок «Почтальон — надежный друг!» деп кӧрӱ-маргаанныҥ туружаачызы, «ЮНИЛАЙН» ИД-ныҥ эрчимдӱ туружаачызы, «1000 советов» деген јарлу журналла кычыраачыларды јакшы таныштырып  турганы учун баалу сыйла, Быйанду самарала база кайралдаткан. Почтаныҥ ончо ишчилери ак-чек ле једимдӱ ижи учун федерал почта колбузыныҥ Алтай Республикада башкартузыныҥ  Кӱндӱлӱ грамоталарыла кайралдаткан.

Бистиҥ јурт јеезениҥ школы, клубы, врачебный амбулаториязы, СПК-ныҥ туразы капремонттыҥ кийнинеҥ кижи таныбас болуп јаранып калган. Олор ончозы ӧйдиҥ некелтелерине келиштире јазалган, чыныкталган. Балдардыҥ «Сказка» деген јаҥы садиги ончобысты сӱӱндирет.

Је бистиҥ чыйрак, турумкай почтальондорыстыҥ иштеп јаткан туразы сӱреен эски, элентизи јеткен деп айдарга јараар. Бис, јурттыҥ эл-јоны, почтаныҥ туразына капремонтты ӧткӱрерине иженедис, энчикпей сакыйдыс. Бу база јондык јер ине, бери улай ла кӧп улус туура салбас керектериле кирип-чыгат.

Јабагандагы јурт јеезениҥ эл-јоныныҥ, пенсионерлериниҥ адынаҥ почтаныҥ ишчилерин, почтальондорды, амыралтадагы ветерандарын профессионал байрамыла уткуп, бек су-кадык, ижинде једимдер кӱӱнзейдис. База почтада иштеп јаткан улустыҥ иштеги айалгазы јаранзын, ӧйдиҥ некелтелериле чыныкталзын деген јаан кӱӱнземелисти айдадыс.

Г. КЕСТЕЛЕВА,

иштиҥ ветераны, Јабаган јурттаҥ