Авиаколбулардыҥ учуры Сибирьде јаан

07.08.2020

Алтай Республиканыҥ башчызы Олег Хорохордин куран айдыҥ 5-чи кӱнинде РФ-тыҥ субъекттериниҥ экономикалык колбулар аайынча тергеелер ортодогы «Сибирьдиҥ јӧптӧжӱзи» деген ассоциациязыныҥ совединиҥ јуунында турушкан.

Видеоконференция аайыла ӧткӧн јуунда «Сибирьдиҥ јӧптӧжӱзи» МА-ныҥ исполкомыныҥ председатели Геннадий Гусельников ло Алтай Республиканыҥ башкарузыныҥ турчылары база турушкан.

Јуунда кӧрӱлген сурактардыҥ бирӱзи округтагы тергеелер ортодогы авиаколбуларды ӧскӱрери болгон. РФ-тыҥ президентиниҥ СФО-догы чыдулу чыгартулу кижизи Сергей Меняйлоныҥ темдектегениле, јербойыныҥ ар-бӱткениниҥ ле географический аҥылулары бар учун, Сибирьде авиаколбуныҥ учуры јаан.

«Ол аҥылуларды федерал структуралар ајаруга алып јат, оныҥ да учун Сибирьдиҥ авиациязыныҥ ӧзӱминиҥ ле аэропорт-комплекстериниҥ модернизациязыныҥ сурактарын ӧмӧ-јӧмӧ аайлаштырар арга болот. Јербойындагы авиалиниялардыҥ курч сурактары јарлу, олордыҥ тоозында кейле учар авиатранспорт, аэродромдордыҥ јердеги инфраструктуралары, самолеттор конор-учар площадкалар эскирип калганы» — деп, ол айткан. Тергеелерде акча-манат јанынаҥ уур-кӱчтер бар да болзо, олор јонјӱрӱмдик учурлу маршруттарла улусты тартарын јӧмӧӧр, авиабилеттердиҥ бааларын бийиктетпес аргаларды табып јадылар.

Темдектезе, Алтай Республикада Кош-Агаш ла Кӧксуу-Оозы аймактар јаар канча онјылдыктарга токтоп калган авиамаршруттар орныктырылган. Маршруттардыҥ субсидированиезине тергеелик бюджеттеҥ 50 миллион салковойдоҥ кӧп акча чыгарылган, оныҥ шылтузында авиабилеттердиҥ баазы эл-јонго јарамыкту кеминде болуп калган.

Алтай крайда дезе авиатранспорт конор-учар «Белокуриха» деген площадка јаар рейстер тӧзӧӧри јанынаҥ сурактарла иштейт. Бу иш-керек једимдӱ бӱтсе, албаты-јонго туризмниҥ объекттерине једери јанынаҥ јарамыкту айалгалар тӧзӧлӧр.

Россия Федерацияныҥ президентиниҥ болушчызы Игорь Левитин шӱӱжӱде туружып, Сибирьдеги федерал округта транспортный јеткилдешти тӧзӧӧри эҥ учурлу сурактардыҥ бирӱзи болот деп темдектеген. Нениҥ учун дезе кезик тергеелерде јердеги јол инфраструктура јок эмезе аргалары кирелӱ, авиационный транспорт тӧс транспорт болуп јат.

Тергеелер ортодогы «Сибирьдиҥ јӧптӧжӱзи» деген ассоциацияныҥ бӱдӱреечи комитеди Сибирьдиҥ тергеелер ортодогы маршрутный сетин ӧскӱрери аайынча шӱӱлтелер белетеген. Анда темдектелгениле, авиамаршруттардыҥ ууламјылары кӧптӧдилер ле авиапарктар јаҥыртылар.

Ӱлекерде темдектелгениле, округтыҥ 31 јери јаар улайын рейстер 2020 јылдыҥ учына јетире ӧйдиҥ туркунына орныктырылар. Анайда ок јаҥы маршруттарды 2024 јылдыҥ учына јетпей јадып ачар, авиатранспорт конор-учар площадкаларды орныктырар иштер темдектелген. Ол иштер бӱтсе, 40 јер јаар учуштарды ӱзеери орныктырар арга болор.

Олег Хорохордин мынаҥ озо ӧйдӧ Кӧксуу-Оозы аймакта ишмекчи јол-јорыкла бололо, келер јылда Улаган јаар авиарейс ачары, Кош-Агаш ла Кӧксуу-Оозы јаар маршруттарды јай ӧйинде кӱнине эки учушка јетирери аайынча сурактар кӧрӱлет деп айткан болгон.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина