Нацӱлекерлерди бӱдӱрерин шиҥжӱде тудат

11.08.2020

Толгойокто јаҥы ФАП ла балдардыҥ площадказы тудулат

Тергеениҥ башкараачызы Олег Хорохордин ФАП ла балдардыҥ площадказы тудулып јаткан Толгойок јуртта болгон.

ФАП мынаҥ озо ӧйдӧ кӧп квартираларлу турада иштеген. Фельдшерско-акушерский пункттыҥ туразы болгон тураны эскиргени учун бузуп салгандар, је јаҥы тудулган турадаҥ кып берилбеген болгон. Јербойыныҥ улузын участковый врач-терапевт озолондыра угусканы аайынча айылда кӧрӱп эмдеген, тӱрген медболушты тӱрген медболуштыҥ бригадазы јетирген.

«Јурттыҥ эл-јоны медициналык болуш алары јанынаҥ уур-кӱчтер узак ӧйдиҥ туркунына чӧйилген болгон. Јаҥы ФАП-ты тузаланарына табыштырган соҥында, айалга кубулар. Ол бойыныҥ ижин быјыл, тураныҥ тыштын јылыткан ла керектӱ медјазалдарды тургускан соҥында, баштаар» — деп, Олег Хорохордин айткан. Анайда ок ол балдардыҥ площадказы канайда тудулып јатканын барып кӧргӧн. Ӱлекер аайынча мында балдар ойноор, тазыктырынар, амыраар јерлер болор. Мындагы иш РФ-тыҥ «Јурт јерлердиҥ комплексный ӧзӱми» деген госпрограммазы аайынча ӧдӧт, тудум иштердиҥ текши баазы 2,2 миллион салковой, ол тоодо консолидированный бюджеттеҥ 1,8 миллион салковой акча.

Оносто удабас школдыҥ спортзалы болор

Республиканыҥ башкараачызы Олег Хорохордин Онос ло Чопош јурттарда база болгон. Олордо школдордыҥ спортзалдары тудулып јаткан. Башчы Себи-Оозы — Чамал — Куйус деген јолдыҥ ӱзӱгин «Јеткер јок ло чыҥдый автојолдор» деген нацӱлекер аайынча јазап турганын шиҥдеп кӧргӧн.

Ол Оностыҥ Г. И. Чорос-Гуркинниҥ адыла адалган школына барып јӱрген, мында ӱренип турган балдардыҥ тоозы 70 кире. 2016 јылда школдыҥ туразы кӱйерде, јаҥызын бир јылдаҥ туткандар. Је анда бойыныҥ спортзалы эмдиге јетире јок болгон. Былтыр јербойыныҥ эл-јоныла туштажу ӧдӧрдӧ, улус Олег Хорохординге, балдар спортло јыл туркунына јарамыкту айалгада тазыктырынзын деп, спортзал тудары јанынаҥ суракла баштанган болгон.

«Балдар мынаҥ озо ӧйдӧ школдыҥ фойезинде тазыктырынган. Спортзалды тударына јараду 2019 јылдыҥ учы кирезинде берилген. Бис оны тударына керектӱ акчаны республикан бюджеттеҥ чыгарганыс, оныҥ кийнинде иштер башталган. Тургуза ӧйдӧ јабынтыныҥ плиталары салылган, тепкиштиҥ стенелери кӧдӱрилген, ӧрт болдыртпазыныҥ резервуары аайынча иштер бӱткен. Темир каркасты тургузары улалганча. Спортзал јылдыҥ учы кирезинде белен болор» — деп, башчы айткан.

Чопоштыҥ 270 бала ӱренип турган школыныҥ спортзалын текшилей јазаары «Ӱредӱлик» деген нацӱлекер аайынча ӧдӧт. Оныҥ туразы 1956 јылда тудулган. Јазашту иштер тушта тураныҥ јабынтызыныҥ кезик бӧлӱги ле инженерный сетьтер, кезик кыптарда эжиктер, јарыткыштар ла ӧскӧ дӧ не-немелер солылган ла јазалган. Объектти јазаары учына једип барааткан. Олег Хорохординниҥ айтканыла, јаҥы ӱредӱлӱ јыл башталза, физкультураныҥ урокторы јаҥыртылган спортзалда ӧдӧр учурлу.

Себи-Оозы — Чамал — Куйус деген јолдыҥ узуны 2,48 километр ӱзӱги «Јеткер јок ло чыҥдый автојолдор» деген нацӱлекердиҥ кеминде јазалып јаткан. Мында јолдыҥ јемирилген ле суу агызып апарган јерлери орныктырылган, анайда ок оныҥ эски асфальтобетон ӱсти кодорылган. Подрядчик бийиктехнологиялык техниканы — ресайклерди тузаланып, јолдыҥ тӧзӧлгӧзин соок регенерацияныҥ эп-сӱмезиле саларын баштап койгон.

«Иштер јакшы кеминде ӧдӱп јат, олордыҥ јарамызы кирези бӱткен. Јӧптӧжӱ аайынча иштер ӱлӱрген айда учына јетирилер учурлу. Јазашту иштер анайда ок јолдыҥ Чамалдагы узуны јети километр бӧлӱгинде база ӧдӧт. Мындагы иштер озолондыра темдектелген ӧйдӧҥ озо бӱдер деген ижемји бар. Бастыра узуны 10 километрдеҥ кӧп јолдор нормативный айалгага келиштирте јетирилер» — деп, тергеениҥ башкараачызы айткан.

Оныҥ темдектегениле, бу јолды јазазын деп суракла эл-јон былтыр ӧткӧн туштажулар ӧйинде айткан. Анайда ок республиканыҥ албаты-јонынаҥ ла айылчыларынаҥ бу јолды јазазын деп сурак аайынча баштанулары соцсетьтер ажыра база болгон. Озо баштап јолды јазаарын эки бӧлӱкле ӧткӱрип, 2021 јылда тӱгезер деп пландалган болгон. Је оноҥ план такып кӧрӱлип, јазашту иштерди быјыл ӧткӱрер деп јӧп јарадылган болгон.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина