Настройки отображения

Размер шрифта:
Цвета сайта:
Ностройка изображения
Ностройка изображения

Настройки

Алтайдын Чолмоны

Аэропорттыҥ терминалын элбедери башталар

25.08.2020

АР-дыҥ башчызы Олег Хорохордин «Аэропорт Горно-Алтайск» АО-ныҥ директорлорыныҥ совединиҥ председатели, «Система» АФК-ныҥ партнерыныҥ управляющийи Али Узденовло ишмекчи туштажу ӧткӱрген. Туштажу ӧйинде авиапредприятиениҥ ле тергееде авиацияныҥ ӧзӱми јанынаҥ сурактар шӱӱжилген.

Туштажуда аэропорттыҥ директоры Сергей Круглов база турушкан. Оныҥ айтканыла, былтыр пассажиропотоктыҥ кеми баштапкы ла катап 100 муҥ кижинеҥ ашкан болгон ло аэропорт јыл туркунына  пассажиропотогыныҥ кеми јӱс муҥнаҥ ала 300 муҥ пассажирге  јетире группага кирген.

Бӱткӱл отрасльдыҥ пассажиропоток аайынча јылдык кӧргӱзӱлериниҥ кеми 6,9 процент болгон болзо, 2019 јылдыҥ уч-турулталары аайынча Алтай Республикада бу тоо он катап кирези кӧп болгон — 65 %. Коронавирустаҥ улам кезик рейстер экинчи кварталда токтодылган да болзо, быјыл бу тоо оноҥ кӧп болорын сакыйдылар. Тургуза ӧйдӧ кажы ла кӱнде пассажиропотоктыҥ кеми, ӧткӧн јылдыҥ бу ок ӧйине кӧрӧ, эки катапка шыдар кӧп.

Олег Хорохординниҥ эзедип айтканыла, быјыл тергееге јаҥы авиатартаачылар келген. Санкт-Петербургла, Омскло баштапкы авиаколбулар ачылган, республика ичинде рейстер орныктырылган.

«Бу ууламјылар тургуза ӧйдӧ јаан сурууда — самолеттордо пассажирлердиҥ тоозы кӧп болот, иш улалганча. Тургуза ӧйдӧ кӱнине аэропорт ажыра 1,7-1,8 муҥ кижи јорыктайт, неделе туркунына 47 рейс болот. Јаҥыс ла Москва јаар тӧрт авиакомпанияныҥ самолетторы учат. Бир кӱн туркунына эртен тура ӱч ле эҥирде эки рейс болот, олорло јорыктап турган улустыҥ тоозы кӧп. Мындый тоо-кӧргӱзӱлер  мынаҥ озо качан да болбогон. Керектиҥ аайы мынаҥ ары мынайып ла барза, бӱгӱнги терминал келер ӧйдӧ тапчы боло берердеҥ айабас» — деп, башчы айткан.

Али Узденов аэропорттыҥ ээлери, Сбербанк ла «Система» АФК, пандемия да болзо, пассажиропотоктыҥ кеми 140 муҥ кижиге једерине иженип турганын угускан. Тургуза ӧйдӧ бу тооныҥ текши ӧзӱминиҥ кеми 34 %.

«Мындый айалгаларда аэропорттыҥ јери тапчы болуп калардаҥ айабас. Бис аэровокзальный комплекстиҥ ӧзӱмине акча-манат чыгарарына белен. Терминалды элбедерис, аэровокзалга колбойтон тудумныҥ ӱлекери бисте бар. Бу иш бӱтсе, кӱнине 5 муҥ кире пассажирлерди јарамыкту айалгада јеткилдеер арга болор. Бу баштапкы бӧлӱк. Аэродромный службаны ла самолетторго перронды элбедери јанынаҥ сурак тура берет. Оныҥ да учун мындагы јерди элбедери пландарда база темдектелет. Ӧскӧ субъекттер јаар ла ичбойындагы авиарейстердиҥ тоозы кӧптӧзӧ, онызы керектӱ болор» — деп, Али Узденов айткан.

План аайынча болзо, ӱлекерлерди тургузары 2021 јылдыҥ јазы кирезинде учына једер, 2022 јылдыҥ јайы кирезинде — терминалды јаҥыртары аайынча иштер тӱгенер керек.

Али Узденов тергееде ичбойында авиацияныҥ ӧзӱминиҥ учуры јаан болгонын темдектеп, ол авиарейстерди јербойыныҥ албаты-јоны керексип јат деген. Олег Хорохординниҥ айтканыла, келер јылда Кош-Агаш ла Кӧксуу-Оозы аймактар јаар учуштардыҥ тоозын эки катапка кӧптӧдӧри, Улаган јаар јаантайын рейстер ачары кӧрӱлет. Турачак аймакта Иогач јуртта авиатранспорттыҥ площадказын тӧзӧӧри јанынаҥ сурак база кӧрӱлип јат. Јуук ӧйдӧ — Томск ла Новокузнецк јаар маршруттар ачары.

Эзедип ийели: былтыр Россияныҥ Президенти Владимир Путинниҥ темдектегениле, Горно-Алтайсктыҥ аэропорты оныҥ чике јакылтазы аайынча тудулган, нениҥ учун дезе мынаҥ озо ӧйдӧ Алтай Республикадӧӧн јӱк ле Барнаул ажыра учар арга болгон. Оныҥ кийнинеҥ президентле таҥынаҥ туштажу ӧдӧр тушта республиканыҥ башчызы Олег Хорохордин авиаучуштардыҥ географиязын элбедери ле ичтергеелик авиацияныҥ ӧзӱми јанынаҥ иш-амадулар керегинде айткан болгон.

Тургуза ӧйдӧ Горно-Алтайсктыҥ аэропортынаҥ Москва, Санкт-Петербург, Екатеринбург, Казань, Красноярск, Омск, Новосибирск, Белокуриха јаар авиарейстер бар. Кажы ла кӱн сайын Кош-Агаш ла Кӧксуу-Оозы јаар самолеттор учат.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина